الموقع العربي الاول للعبة Silkroad Online

🌟إسرائيل أعلنت حالة طواريء بسبب طريقة جديدة لسرقة الواتساب!!

الطريقة ببساطة معتمدة على ان الهاكر يختار معاد الضحية يكون نايم عشان يبدأ الهجوم، ويسطب الواتساب على موبايله برقم الضحية، وبعدين الواتساب هيبعت كود على موبايل الضحية، والهاكر يخلي واتساب يبعت كتيييييير جدا، لحد ما خيار ارسال الكود في SMS يتقفل، والواتساب يقرر يعمل مكالمة على تليفون الضحية عشان يقوله الكود بصوت رسالة مسجلة.. وهنا اللعبة!

المكالمة مش هيترد عليها لإن الضحية نايم، فهوووب المكالمة تتحول على البريد الصوتي VoiceMail، فتتسجل المكالمة بالكود هنا :D

الهاكر ساعتها يجرب شوية الباسوردات الافتراضية اللي بيجي بيها البريد الصوتي وبيكسل المستخدم يغيرها زي 0000 وpassword وغيرها من ابداعات :D

لحد ما واحد يظبط وهوووب ياخد الكود ويفتح الواتساب وبالشفا !!
🌟كاليفورنيا مررت قانون جديد اسمه Information Privacy: Connected Devices وده بقى شارح نفسه، بص يا معلم من هنا ورايح أي جهاز ذكي تشتريه بيتصل بالانترنت في كاليفورنيا، لا هيكون admin ولا 1234 ولا password :O

ببساطة القانون الجديد بينص على ان كل جهاز يطلع من مصنع من الشركات المصنعة لازم يتعمله باسورد قوي مميز مخصوص ليه وبالتالي يقدم أمان وخصوصية للمستخدم حتى لو نسي يغيره ;)

🌟أبل سحبت محفظة عملات مشفرة اسمها EOSIO Wallet Explorer بعد ما سرقة من كم كبير من المستخدمين عملاتهم، ومن ضمنهم اتنين يوتيوبرز توأم مشهورين بـ HodgeTwins واللي اتسرق منهم عملات بقيمة 15000 دولار!!

🌟شركة HTC عايزة تحقق فيلم Ready One بحذافيره في الحقيقة!

الفيلم لو فاكر كان بيتكلم عن عالم الـVR وازاي اننا في المستقبل هنعيش جواه اكتر من حقيقتنا نفسها، وجواه هنتنقل بين أماكن كتيرة جوا كوكب اسمه Oasis وهنا مربط الفرس!

اقلع النضارة وفتحلي :D

اتش تي سي قررت انها تعمل كوكب اسمه Planet Ludus فايدته انه هيقدم تجارب تفاعلية مختلفة لمستخدمي نضارات الـVR بحيث يدخلوا جواها ويستمتعوا ويعيشوها ^_^

لحد دلوقتي اتعمل عالمين جوا الكوكب، واحدة Apex Operation ودي مهمات جوا المحيط وواحدة في عالم الأمازون بإسم Amazon Odyssey ولسا جاي جديد كتير!

🌟فاكر لعبة "كراش" على البلايستيشن 1 ؟ راجعة تاني الشهر ده :O

🌟فريق جوجل للحماية Project Zero بلغ أبل ان متصفحها سفاري فيه كوارث أمنية عمرها سنة :O

17 ثغرة قدام، وكمان 9 جداد !!

والأنقح ان أبل حبت تتلائم، فملا نزلت قايمة بالتحديثات الأمنية اللي نازلة في 17 ستمبر اللي فات، مكنش مكتوب فيها أي حاجة عن الثغرات التسعة الجداد، بس قبل ما ينزل التحديث للمستخدمين بأسبوع واحد، أبل رجعت غيرت في قايمة التحديثات وضافتهم عشان يتقال انها مجهزاهم من قبل كدا :D

🌟فايرفوكس اتعاون مع منصة ProPublica عشان يعملوا براوزر يحمي الامريكيين من المعلومات المغلوطة والكائبة خلال الانتخابات الفصلية الجاية للكونجرس!

البراوزر هو فايرفوكس بس فيه ميزتين تُقال حبتين، الأولى بتاعت فايرفوكس نفسه Facebook Conatainer ودي بتخلي فيسبوك يبقى صعب عليه جدا انه يتابع اللي انت بتعمله على أي موقع تاني وبالتالي مش هيستهدفك بسهولة بالإعلانات على الخدمة بتاعته، وكمان Political Ad Collector وده تبع بروبابليكا واللي بتشتغل على انها تجمع كل المعلومات المتاحة في الاعلانات السياسية اللي بيشوفها المستخدم وتحللها وتخزن بياناتها وتتأكد من الصور والكلام اللي في الاعلان حقيقي ولا لأ وتقول للمستخدم كمان مين اللي ورا الإعلان ده وكام مرة اتشاف!

🌟جوجل أعلنت انها في التحديث الـ 70 لجوج كروم هيبقى فيه 3 مزايا عظيمة جديدة، الأولى كروم هيطلعلك رسالة لو إعدادات البراوزر اتغيرت بدون إذنك زي تغيير الصفحة الرئيسية أو تغيير موقع السيرش اللي بتستخدمه دايما لحاجة انت معملتهاش أصلا، التانية والتالتة جوا أداة اسمها Chrome Clean Up Tool، فكرتها انها بتخلي كروم يقدر يحدد لو فيه برنامج على جهازك اتسبب في تغيير اعدادات البراوزر أو عمل أي حاجة انت مخدتش بالك منها على البراوزر، وكمان انها بتخليك تقدر تعرف لو فيه أي إضافات Plugins بيرجعوا بعد ما تشيلهم لوحدهم أو بيتعاد توجيهك لمواقع مش تمام دايما أو بيطلعلك مسدجات الـ PopUp السخيفة!

🌟أبل بتستخدم شريحة اسمها T2 من السنة اللي فاتت في أجهزة iMac Pro والسنة دي في اجهزة Macbook 2018 الجديدة، والشريحة بتدي مزايا أمنية، بس الألعن ان طلع عليها سوفت وير اسمه Bridge OS واللي بيخلي الأجهزة اللي شغالة بالشريحة دي متتصلحش إلا بسوفت وير معين عند أبل ومراكز الصيانة المعتمدة اللي تبعها، فلو حاولت تصلح الجهاز لوحدك أو عند أي مركز صيانة تاني الموضوع هيبقى مستحيل!!

🌟نينتندو سجلت براءة اختراع جديدة خاصة بجهاز عامل زي الكوفر بيحول الموبايل لجهاز جيم بوي تلعب عليه :D

صباحكم فُل 😄