[a7lashabab]

الاستفتاء على التعديلات الدستورية 19 مارس

كتير مننا اول مرة يشارك فى إستفتاء عام او إنتخابات
كتير مننا عنده حيره وخوف من اختياره .. اقول لا ولا اقول نعم ؟؟
خايف اقول لأ أضر بلدى .. وخايف اقول نعم أضر بلدى
طيب سؤال مهم
هو لما أقول نعم البلد هتستقر ازاى ؟! ايه اللى هيحصل يعنى ؟!
ولما اقول لا البلد هتتحول لفوضى فعلا ؟! ايه اللى هيحصل لو قولت لا ؟!

فى الموضوع ده وبعد متابعتى الطويله للمواضيع فى صمت
هحاول احط تصور للى هيحصل بعد ماقول نعم
واللى هيحصل بعد ماقول لا
نبدأ بـ
نعم

لو نتيجة الإستفتاء طلعت نعم ده اللى هيحصل
هتتعمل إنتخابات مجلس الشعب شهر يونيو (حسب مـ الجيش محدد) وبعد مالانتخابات تخلص فى خلال 6 شهور من بدء المجلس هيقوم أعضاء المجلس المنتخبين باختيار جمعية تأسيسية لصياغة دستور جديد
يبدأوا فى عمل الدستور لحد مايخرج للناس فى حدود 3 شهور مثلاً كافيين لصياغة الدستور
وبعد الـ 3 شهور صياغة .. هيتم طرح الدستور للشعب وتتم مناقشته إعلاميا
والموضوع ده ممكن ياخد 3 شهور ودى فترة كويسة لمناقشة الدستور بكامل جوانبه
والرأى العام يقدر يكون رأيه وبعدها يطرح الدستور للاستفتاء العام
ويأما نوافق عليه يأما نرفض وغالباً هنوافق ويكون عندنا دستور فى خلال 15 شهر من دلوقتى
وطلاما عملنا دستور جديد يبقى هنعمل الانتخابات الرئاسية طبقاً للدستور الجديد
يعنى فى حدود سنة ونص هنكون عملنا دستور جديد وبرلمان منتخب ورئيس منتخب من خلال دستور جديد
وده التصور اللى هيحصل لو كانت نتيجة الاستفتاء نعم

طاب لو النتيجة طلعت لا
هيحصل ايه ؟؟ اوعى يكون الجيش هيحكمنا وبقى ونكون خلصنا من حكم عسكرى لحكم عسكرى تانى احنا مش ناقصين ؟؟

لو النتيجة طلعت لا

هيتعمل اعلان دستورى للفترة المؤقتة وانتخاب جمعية تأسيسية لعمل دستور جديد

فهمنى الاول يعنى ايه اعلان دستورى وفهمنى بردو انتخاب جمعية تأسيسية ازاى هو احنا عملنا برلمان اصلاً ولا احنا كل مواطن مننا هينزل يختار 150 اسم عشان يكونوا الجمعية التأسيسية دى

أولاً الاعلان الدستورى ده عبارة عن مبادئ دستورية عامة يتفق عليها أغلب القوى الوطنية لانها مبادئ بتدعم الديمقراطية وإعدادها بيتم فى وقت بسيط جداً لانها بتكون فى حدود 20 مادة مثلا
وبعدها بيتم إنتخاب جمعية تأسيسية لوضع دستور جديد .. واكيد طبعاً مش واحد مننا بيروح يختار 150 اسم زى ما فى ناس بتحاول توهمنا عشان نخاف
لا اللى بيحصل إن كل حزب او جماعة او نقابة او رابطة او إتحاد بيرشح ناس تمثله فى الجمعية التأسيسية دى

يعنى مثلاً نقابة الاطباء بترشح 3 او 4 دكاترة مثلاً يمثلوا الاطباء
واللى بيختار هما الاطباء نفسهم فبالتالى بيختاروا الشخصيات المحترمة اللى هتمثلهم وتتكلم بإسمهم
ونقابة المهندسين بيرشحوا 3 او اربع أسماء يمثلوا المهندسين فى الجمعية التأسيسية دى بردو من خلال آراء المهندسين نفسهم
ونفس الكلام بالنسبة للمحاميين والتجاريين والمدرسين وهيئات التدريس فى الجامعه
وكل حزب سياسي بيرشح ناس تمثله فى اللجنة بنفس الطريقة
والاتحادات الطلابية مثلا بيرشحوا شباب من الجامعات يمثلوا فئة الشباب
والازهر مثلا يرشحوا ناس تمثل الازهريين او المسلمين عموماً فى الجمعية يمثلنا كمسلمين
والكنيسة ترشح حد يمثل الاخوة الاقباط فى اللجنة
والجمعيات الزراعية بيرشحوا اللى هيمثل الفلاحين والنقابات العمالية بترشح اللى هيتكلم بإسم العمال وهكذا
وكل ده بيتم فى وقت واحد وفى خلال شهر بالكتير اوى من دلوقتى هتبقى عندنا جمعية تأسيسية مكونة 150 شخص

(على سبيل المثال)

ممثلين للمصريين كلهم بكافة الاطياف بيبدأوا فى وضع دستور جديد لمصر وطبعاً بيكون معاهم الفقهاء الدستوريين اللى بيصيغوا الدستور الجديد ده
وإحنا عندنا فقهاء دستوريين على مستوى عالى وتقريباً هما اللى صنعوا دساتير اغلب الدول العربية

وكل فرد من اللجنة دى بيبقى على تواصل مع الفئة اللى هو بيمثلها عشان يقدر يوصل للجنة احتياجات الفئة دى
وفى خلال 3 شهور بالكتير بيخرجوا بدستور ممثل فعلاً للشعب المصرى
وبيتم عرضه على الشعب ومناقشته فى كل وسائل الاعلام فى فترة لا تقل عن 3 شهور زى ماقولنا عشان نقدر نكوّن رأى محدد عن الدستور ده
وبعدها بيتعمل إستفتاء عام وتروح تصوت بموافق او غير موافق
وغالباً بتكون النتيجة موافق لان الدستور شارك فيه كل المصريين
وكده إحنا اخدنا من الوقت : شهر
(انتخاب جمعية تأسيسية ممثلة للشعب) + 3 شهور (صياغة دستور) + 3 شهور (مناقشة الدستور)
=
7 شهور بقى عندنا دستور جديد

وبعدها بيتعمل انتخابات مجلس الشعب (طبقا للدستور الجديد)
وبعدها انتخابات رئاسة الجمهورية (طبقا للدستور الجديد)
يعنى فى خلال 8 او 9 شهور بالكتير بقى عندنا دستور جديد صنعه الشعب المصرى بكل فئاته وعندنا مجلس شعب منتخب طبقاً لدستور الشعب
ورئيس جمهورية منتخب طبقاً لدستور الشعب
يعنى عارف صلاحياته لحد فين وايه هى حقوقه وايه هي حقوق الشعب عليه
ده كده التصور للى هيحصل لو كانت النتيجة
لا



يبقى احنا كده عرفنا ايه اللى هيحصل لو وافقنا على التعديلات وايه اللى هيحصل لو رفضنا التعديلات
طاب سؤال بقى طلاما الفرق كبير اوى كده وفى مصلحتنا إننا نعمل دستور جديد من دلوقتى
اومال ليه فى اختلاف وليه فى ناس عايزة تقبل التعديلات الدستورية طلاما رفضها افضل

اول سبب هو الاستقرار السريع
لكن انا شايف إن ده وهم لان كلنا عارفين مين هما اللى بيعملوا حالة الفوضى فى البلد
هما فلول النظام السابق سواء حزب وطنى او امن دولة مش عايزينا نمشى فى الطريق الصح

هل المفروض نخاف ونسمع كلامهم ونقبل بدستورهم اللى كانوا بيسرقونا بيه ؟؟
ولا نواجه الخوف ده ونتغلب عليه ونأسس دستور يمثلنا احنا كشعب ؟؟

تانى سبب
الخوف من استمرار الجيش فى الحكم او استمراره بعيد عن وظيفته الاساسية حماية حدود البلد لفترة طويلة
طيب انا دلوقتى رسمتلكم التصور للى هيحصل بعد الاستفتاء ؟ شايف انهى اسرع ؟؟

تالت سبب
التعديلات الدستورية بتجبر مجلس الشعب انه يختار جمعية تأسيسية فى خلال 6 شهور لعمل دستور جديد
طيب دلوقتى نستنى 6 شهور بعد ال 3 شهور لحد مانعمل البرلمان يعنى 9 شهور بس عشان نبدأ نشتغل فى الدستور جديد ؟؟ طاب انهى احسن واسرع؟؟
طاب بلاش السرعه هقولكم حاجة احسن
مين اللى هيختار جمعية تأسيسية معبرة عن الشعب اكتر
احنا كشعب .. ولا نواب مجلس الشعب اللى كلنا عارفين بيوصلوا للكرسى ازاى
ومحدش يفتكر ان الطريقة هتتغير فى يوم وليلة بعد الثورة
لا كلنا عارفين ومتأكدين ان مجلس الشعب هيبقى نسبة كبيرة اخوان مسلمين وليهم كل الاحترام .. والباقى رجال اعمال الحزب الوطنى هيدخلوا كمستقلين او كاحزاب جديدة وبعدها شوية من الاحزاب التانية

يبقى انهى احسن بقى ؟؟
اسيب نواب مجلس الشعب هما اللى يختاروا الجمعية التأسيسية .. وكلنا عارفين ومتأكدين ان المصالح الشخصية هتدخل فى الاختيارات
ولا احنا اللى نختار كل واحد مننا فى مجال شغله او نقابته بيختار اللى يمثله ؟؟
الفرق واضح جداً

لا ثملا ثم لا لتعديل دستورى مفروض علينا
انا عايز اختار بنفسى واشارك بنفسى فى دستور بلدنا

بس سؤال كده بعد اذنك طلاما الفرق واضح جداً كده
اومال ازاى الناس محتارة وفى ناس كتير موافقة على التعديلات
ده المفروض الشعب كله يقول لا للتعديلات الدستورية المطروحة

زى ما قولتلك فوق فى ناس ليها مصلحة من ان الانتخابات تتعمل على الوضع الحالى للبلد وبالتالى هما اللى يكتسحوا مجلس الشعب ويكون ليهم النسبة الاكبر فى اختيار الجمعية اللى هتحط الدستور وبالتالى يقدروا يفصلوا دستور على مزاجهم يخدم مصلحتهم الشخصية سواء كانوا جماعة الاخوان او اعضاء الحزب الوطنى اللى مسيطرين على الاعلام واغلب مؤسسات الدولة
او رجال الاعمال المستقلين اللى بيدخلوا مجلس الشعب وهيدخلوا عشان يختاروا الجمعية اللى هتعمل الدستور اللى يخدم مصلحتهم هما مش مصلحتى ولا مصلحتك
وهما دول اللى بيستخدموا اسلوب التخويف عشان يخوفونا من كلمة لا ويجبرونا نقول نعم ويحققوا هما اغراضهم الشخصية

منهم اللى بيقولنا لو قولتوا لا هتعطلوا الجيش وتطولوا الفترة المؤقتة
وده طبعاً ملوش اي اساس من الصحة وانا قولت فوق ايه اللى هيحصل لو اترفضت التعديلات وده نفس كلام القوات المسلحة
ومنهم اللى بيقولوا اوعوا ترفضوا التعديلات لحسن الجيش يفضل فى الحكم ويطمع فيه ويعلن الاحكام العرفية
طاب بالذمة ده كلام يصدقه حد عاقل

ومنهم ناس بيقولوا قول نعم الموافقة على التعديلات واجب شرعى
انت بتحلل وتحرم على مزاجك وعلى مزاج مصلحتك فى كرسى البرلمان اتقى الله يا أخى في الشعب





ومنهم اللى بيقولوا
اللى بيقولوا لا دول اعداء الدين اللى عايزين يلغوا المادة التانية
ياعم الحج مصر 85 مليون منهم على الاقل 91 % مسلمين
يبقى ازاى هتتلغى المادة التانية ومين اللى يجرؤ ييجى جنبها .. ومين اللى هيجرؤ ينفذ ؟؟





ومنهم اللى بيقولوا لو قولتوا نعم هتحققوا الاستقرار السرييع

وانت تعرف منين اننا هنحقق الاستقرار السريع الا اذا كنت انت واحد من اللى بيدعموا البلطجة والسرقة اللى ماشية فى البلد
ولا هما البلطجية لو قولنا نعم هيخافوا يسرقوا الشعب ويسلموا نفسهم بعد ماهربتوهم
ولا هما هيسرقوا اللى بيقولوا لا ويسيبوا اللى بيقولوا نعم


رسالة ليهم كلهم

اتقوا الله وبلاش تضللوا الناس وتستغلوا خوفنا من الوضع اللى احنا فيه عشان تحققوا مصلحتكوا الشخصية على حساب مصلحة البلد ومصلحة الشعب المصرى

على فكرة انا مش ضد جماعة الاخوان المسلمين
بالعكس انا من الناس اللى شايفينها جماعة اتظلمت كتير
وممكن تكون اكتر جماعة ضحت فى حربها مع النظام السابق .. لكن انا شايف وضع عام ادامى وشايف صور بتطلع ومينفعش ادفن راسى فى الرمل واسكت

انا اسف انى طولت عليكم
لكن عندى يقين ان واجب عليا اوضح صورة اوسع من الصورة اللى هما حاطيننا جواها
المسألة مش مسئلة نعم ولا وناس مختلفة وبس

الموضوع اكبر من كده وهيتحدد على اساسه دستور بلدى وبلدك
يأما هيكون دستور الشعب المصرى بكافة اطيافه وانتمائاته
يأما هيكون دستور اعضاء مجلس الشعب اللى كلنا عارفين هما بينجحوا ازاى وبيوصلوا للمنصب ازاى وبيعملوا ايه بالمنصب ده