[Mr Z!dane]

بمناسبة عيد ميلاد كروم العاشر
جوجل أعلنت عن 4 مزايا جداد هينزلوا انهاردة! :O

التصميم بقى "مدوّر" أكتر :D

على الويب أو الموبايل، هتلاقي ديزاين كروم بقى داخل فيه انسيابية أكتر سواء من خلال شكل التابات أو تصميم اللوجوهات بتاعت المواقع على التابات، ده غير باليتو الألوان اللي بقت أبسط كتير عن زمان!

ضيف على كدا كمان انك هتلاقي لوجو الموقع واضح فوق التاب المفتوح فيها بحيث وانت بتتصفح التابات الكتيييييييير اللي بتبقى فاتحها تقدر تميز كل موقع عن التاني!

من ناحية التصميم، كمان كروم على iOS بقى مميز جدا في حتة ان قايمة التصفح والتحرك جوا البراوزر بقت تحت مش فوق :D

كل بياناتك متخزنة ومتأمنة!

لما تفتح على الكمبيوتر موقع بتعمل فيه اكونت وحطيت كل بياناتك زي ايميل وعنوانك ورقم تليفونك واسمك وسنة، وتيجي تزور نفس الموقع من الموبايل هتلاقي جوجل عارف باسوردك اول ما تكتب ايميلك ويدخلك فورًا، ده غير انك لو فتحت موقع تاني واستخدمت نفس الايميل هتلاقيه هو بيملالك خانات العنوان ورقم التليفون وغيره فتنجز أسرع!

فيه ميزة بقى كمان هايلة في الموضوع ده، هو انك لما تيجي تعمل أكونت جديد على أي خدمة، كروم هيقترح عليك باسوردات قوية وجديدة مفيهاش بقى تاري ميلادك ولا اسم ابنك الصغير ولا الحبشتكنات اللي ممكن تسهل انك تتهاك دي، والأعظم انه بيحفظ الباسوردات دي متأمنة ومتشفرة، فمش هتحتاج تحفظ الباسوردات ;)

إجابات وحاجات أكتر من جوا مربع السيرش!

من المزايا بصراحة اللي شدت انتباهي ان كروم دلوقتي لما تكتب سؤال في مكان مربع لينك الموقع في البراوزر، مش لازم تدوس تعمل سيرش بالسؤال عشان تشوف اجابته، انت يادوب بمجرد ما تكتب هيطلعلك الاجابة ضمن الاقتراحات من القايمة اللي نازلة تحت اللي انت كاتبه كدا :O

فممكن تكتب ترجمة كلمة أو تسأل أي سؤال أو تكتب اسم فنان مغني شخصية عامة وتطلعلك معلومات عنه، وكل ده انت لسا مدوستش Enter ! ;)

خد دي بقى، لو انت فاتح أكتر من تاب، وكنت فاتح من ضمنهم فيسبوك ونسيتها، وجيت تفتح تاب جديدة للفيسبوك، كروم هينقلك لتاب فيسبوك المفتوحة أصلا ;) والأروع انه قريب هتقدر تعمل سيرش على أي ملفات وصور وفولدرات متخزنين على جوجل درايف من جوا مربع السيرش في براوزر كروم من موبايل أو كمبيوتر! <3

دلوقتي تقدر تنزل الاصدار الجديد بتحديثاته عن طريق:
1. افتح كروم 2. دوس Alt 3. تتفتحلك قايمة دوس آخر حاجة Help 4. دوس About Chrome وهو هيعمل أبديت لوحده ولما يخلص هيقولك Relaunch بس كدا !

رقم الإصدار الجديد على الكمبيوتر 69.0.3497.81

شكرا ..