[Mr Z!dane]

الموضوع عاجل شويتين..
اقرا وركز 😎

امبارح الصبح مجلة فوربس الأمريكية نشرت حوار صحفي مع برايان أكتون، أحد مؤسسي واتساب، واللي كشف وقائع ومعلومات أول مرة تطلع للنور 😎

💀 أكتون قال إن مارك زوكربرج في 2014 اول ما قعد معاه هو وزميله چان كوم، الكلام كان واضح.. انتو مستقلين تماما ومفيش أي ضغط هيتحط عليكو بخصوص تغيير شكل خدمة واتساب وانها مجانية لحد 5 سنين قدام.. يعني لحد 2019 !

💀 ووافقوا ع الصفقة، والعقد كان فيه شرط أساسي
" الاتنين هياخدوا نصيبهم كامل في الأسهم اللي هتتوزع على مدار 4 سنين، ده في حالة لو فيسبوك طبق إجراءات تخليه يكسب من واتساب بدون رضاهم"

💀 أكتون قال ان مارك كان جاي بعرض ميترفضش أبدا، بس الموافقة عليه وقبوله معناها انه يبيع المسخدمين ويسلمهم لشركة 98% من دخلها.. إعلانات.. !

💀 بمجرد ما قبلوا العرض، الاتحاد الاوروبي قال الصفقة خطر عشان حجم الداتا اللي عند فيسبوك وعند واتساب، بس مارك وادارة فيسبوك ضغطت على أكتون انه يطلع يتكلم وينفي تماما كل المزاعم دي ودربوه انه ازاي يقنعهم انه مستحيل الداتا اللي عند الاتنين تتخلط، ده كل واحد منفصل عن التاني، وان واتساب معندهوش أي نية يعمل كدا..

أكتون بعدها اكتشف ان فيسبوك عندما أدوات داخلية تقدر تخليه كده يخلط الداتا من واتساب مع الداتا من فيسبوك، من خلال اما تحويل المستخدم لمجرد رقم تليفون بحيث ينزل تحته كل الداتا بتاعته من فيسبوك وواتساب في مكان واحد، أو من خلال طريقة كدا معتمدة على كود من نوع 128-bit بيتحط على أي موبايل بيتدخل بيه على أي من فيسبوك أو واتساب، بحيث يتربط بين الأجهزة وبين الاكونتات اللي بتتفتح من عليها، وبكدا تتحدد هوية المستخدم برضو!

💀 18 شهر بظبط عدوا، ونبرة فيسبوك اتغيرت، عايزين نربط بقى الداتا من الخدمتين ببعض عشان الدنيا تتحسن، وهوووب شروط الاستخدام اتغيرت، وفيسبوك دفع غرامة 122 مليون دولار للاتحاد الأوروبي عشان كدب عليهم..

بتوع واتساب رفضوا فكرة الخلط عشان الاعلانات، فيسبوك اتناصح وقالهم مفيش اعلانات مباشرة في واتساب، انا هربط الاكونتات عشان اقترح على المستخدمين في فيسبوك صحابهم اللي بيكلموهم على واتساب انهم يضيفوا بعض ع الفيسبوك، وكمان هحسن من جودة الاعلانات اللي بتظهر للمستخدمين!

💀 عدت سنتين بعد الصفقة، في 2016، فيسبوك هيموت ويكسب من واتساب زي ما عمل مع انستجرام، بس لمعان نجم سناب شات حجّم تطلعات فيسبوك، وأكتون وكوم انبسطوا انهم هيركزوا على المزايا الجديدة زي الفلاتر الجديدة للكاميرا والايموجيزوالرسم والكتابة ع الصور، ومن بعدها ميزة Status التقليد بتاع الستوريز!

💀 بس مارك منسيش وفاض كيله، فعمل قعدة مع الاتنين وحضر معاهم شيريل ساندبيرج، مديرة التشغيل بفيسبوك، وأكتون قال فكرة انه ممكن يتعمل عدد معين من الرسايل ببلاش ولما المستخدم يعديها يدفع اشتراك سنوي رمزي ومع وجود مليار وشوية بيستخدموا واتساب الموضوع هيجيب فلوس كويسة..

شيريل قالتلهم الموضوع ده حجمه قليل ومش مناسب لواتساب، فرد عليها أكتون وقالها ان الموضوع مش كدا، الموضوع انك شايفاه مش هيجيب فلوس زي ما انتو عايزين!

💀 في سبتمبر 2017، نفس الشهر اللي استقال فيه أكتون، مارك طلب يقعد معاه في حضور المحامي، اللي قال لأكتون ان الخلاف ده في وجهات النظر حوالين ربحية واتساب مش كويس ولازم يتحل، فأكتون قالهم بصوا أنا مش موافق على حلكم للمشكلة بتاع الاعلانات المباشرة ولا خلط الداتا، فأنا كدا من حقي اني أنفذ الشرط اللي في العقد وأخد حقي كامل في قيمة أسهم الشركة، قالوله طبعا لأ، لإن احنا مفرضناش حاجة عليك، احنا يادوب مختلفين في طريقة تحويل الموضوع لربحية، فأنت حقك تبيع أسهمك بالسعر الحالي عادي زي أي حد، وحصل فعلا.. وخسر أكتون 850 مليون دولار باستقالته!!!

😱"لما حد يذم وينتقد الشركة اللي كسبته وخليته بليونير.. يبقى Low Class.. و Low Class اوي كمان" 😱

🔥 ده اللي جه في آخر نوت نزلها ديڤيد ماركوس، مدير الماسنجر، تعليقا على اللي قاله برايان أكتون من كوارث في حواره مع مجلة Forbes الامريكية!

" مبدئيا النوت دي محدش طلب مني أكتبها، أنا شوفت وحسيت اني لازم اكتبها لأني عشت بعض الأحداث اللي اتكلم عنها برايان بس حكاها بشكل بعيد تماما عن الحقيقة!

🔥أولا أعرف شركات قليلة جدا اللي بتحافظ على مؤسسين الشركات اللي بيستحوذوا عليها، وبيحفظوا كيانهم ويقدّروا استقلاليتهم في الشغل والإدارة وعلى رأسهم وأفضلهم في التطبيق الكلام ده فيسبوك..

فيسبوك بتدي دايما المجال لأي شخص بيشتغل جواها انه يكبر ويتعامل مع بلايين المستخدمين ويقدملهم منتجات ومزايا تغير حياتهم..

فيسبوك قدّر واتساب وفريقه جدا، وعملهم امتيازات تريحهم زي انهم اخدوا مقر جديد خاص بيهم وغرف كبيرة لكل عضو من أعضاء ابفريق وغرف اجتماعات وأماكن عمل ممنوع على بتوع فيسبوك انهم يستخدموها، ورغم ان ده كان بيعمل مشاكل ادارية مع موظفي فيسبوك، الا ان مارك كان بيدافع عن حق واتساب في اللي فريقه عايزه!

🔥ثانيا فيما يخص التشفير بتاع المحادثات على واتساب، التشفير الطرفي End-to-End Encryptionحصل أصلا بعد صفقة فيسبوك، وبالتالي مارك كان موافق تماما على التشفير، بل هو اللي كان بيدخل في مناقشات وجدل مع الادارة عشان يقنعهم بأهمية التشفير، وخصوصا في ان واتساب بتاع شات ومحادثات خاصة، فعشان يحافظ ع الخصوصية دي لازم يحافظ ع التشفير!

🔥ثالثا، مارك حاول يحافظ على استقلالية واتساب لأطول فترة ممكنة، خصوصا في سوق العملاء من الشركات هيموتوا ويتواصلوا مع زباين جديدة، ودايما كان بيتكلم مع برايان وجان ، مؤسسي واتساب، انهم يطبقوا الادوات اللي شايفينها هتجيب فلوس بطريقتهم، بس دايما برايان كان بيأخر الدنيا أوي!!

طالما عندك حل يرضيك ويكسب كل الاطراف نفذه وخلينا نجربه ونشوف مدى فعاليته، واللي واتساب بيقدمه دلوقتي (ان الشركات بتدفع مقابل WhatsApp Business) شبه المشروع اللي قدمه برايان قبل كدا وتكاسل في تنفيذه!

🔥أخيرا بقى، لما تنتقد الناس والشركة اللي خلوك تكسب وتبقى بليونير وحموك وضموك لصفوفهم، يبقى انت كدا من طبقة واطية.. مستوى جديد خااااااالص من الوطينة"

بعد الكلمتين اللي في العضم دول، ديڤيد مشي يلطش شوية في حبة شركات كدا ع الماشي 🤣🤣

🔥" فيسبوك دي شركة همها الاول والاخير هو الناس.
فيسبوك مش شركة بتبيع أجهزة (يقصد أبل لإن مديرها تيم كوك خبط فيهم قبل كدا)
فيسبوك مش شركة بتبيع منتجات وخلاص ( بيخبط في أمازون)
فيسبوك مش شركة بتحاول تبسطك وخلاص (ممكن يقصد يوتيوب)
فيسبوك مش شركة بتحاول تعرفك معلومات جديدة ( وش جوجل ) "

صباحكم فُل 😄