®©[♥]®][ حـــد لـــيـه شـــوق يـــســـافــر الــمــستــقـبل تـــانـــــى !! ][®[♥]©®

[!_ToGoO_MorY_!]

الأخوه الأعضاء والزوار رواد سيلك رود 4 ارب

اليوم كتبت روايه جديده من تأليفى وباللغة العاميه عشان الكل يفهمها وتبقى سهله فى القرايه والفهم

وكوميديه على أكشنيه شويه ^^على خيال علمى ^^

هتدور الروايه حول مغامره هيعملها 3 اصحاب فى المستقبل

نتعرف بيهم



أحمد : شاب عنده 17 سنه فى 3 ثانوى
عبدالله: برده عنده 17 سنه وفى 3 ثانوى
محمد : نفس الكلام زيهم

بس كل واحد صفاته هتختلف وهنتعرف عليها اثناء القصه

يلا بينا نبدأ ببسم الله :




}انت هتهزر يا عم!!{

احمد : زى ما بقولك كده ده الى حصل!
عبدالله:ازاى طيب ده يحصل ؟!
احمد :مش عارف حاجه غريبه بس سيبك ربنا يهدى
عبدالله:طب فاضل أد ايه ونوصل ؟
احمد :حوالى نص ساعه ونكون فى المايه بنبلبط^^
عبدالله: يا مسهل
احمد : ده محمد رايح فى النوم خالص
عبدالله:بقاله يومين منمش يارب بس يصحى لما نوصل
احمد : ان شاء الله



المكان: الأسكندريه,امام الشاطىء
الزمان : 6.30 صباحا



احمد ::ياد يا محمد قوم يلا
عبدالله:متقوم يا عجل احنا وصلنا ونازلين
احمد : انت بتعبى النوم فى ازايز!! ما تقوم
محمد عاوز ايه يا عم انت وهو ؟
عبدالله: قوم احنا وصلنا ونازلين اهوت
محمد احنا وصلنا بالسرعه دى ؟
احمد : سرعة ايه ؟ ماهو عشان انت من اول ما ركبنا وانت واخدها نوم ده انت نايم بقالك 4 ساعات بتجيبه منين ده كله!
محمد:نق عليا بقى
عبدالله: طب قوم احنا نازلين اهوت
محمد : طيب

المشهد : النزول من الأتوبيس ودخول الشاطىء


عبدالله: الله منظر البحر رائع سبحان الله
احمد : فعلا سبحان الله روعه المنظر واحلى حاجه الجو هادى مفيش ناس كتير
محمد طب يلا نلحق لينا مكان على الأول ونلبس عشان ننزل على الصبح كده والجو حلو
احمد : اوك يلا بينا

بعد عشر دقائق

عبدالله: ها.. جاهزين ؟
أحمد و محمد : ايوه
عبدالله: طب كويس اتكلنا على الله
احمد :يلا بقى الغطسه بتاعتنا هيلا هوبا ^^
عبدالله: يلا نرجع ورا ونقوم نيجى ننط احنا التلاته مره واحده
محمد: يلا بينا

1...2....3.... هيلا هوبا







المكان : غرفه مظلمه
الزمان : غير معلوم




احمد : أأأأه... محمد عبدالله انتوا فين ؟
عبدالله: انا هنا
محمد: احنا فين ؟
احمد : مش عارف
عبدالله انا كل الى فكره اننا نطينا هيلا هوبا جوه البحر ومره واحده وقعنا هنا !!
احمد : ولا سحر ولا شغوذه فى مصر تلاقى اى حاجه اوعى ^^
عبدالله: يا عم هو ده وقت هزار ما نشوف احنا فين
محمد: ايه ده حد سامع الى انا سامعه ؟
احمد : هسسسسس فى صوت رجول بره ؟ متكونش ام اربعه واربعين واحنا فى قاع البحر ؟
محمد اسكت بحر ايه ونيلة ايه خلينا نسمع
عبدالله: هى اذاعة اف ام اسكتوا

المشهد : الباب ينفتح ويدخل منه الضوء وظل رجل
وبعض من الرجال يرتادون سترات
الرجل : لقد نجحت العمليه شكرا لك دكتور فواز
د.فواز : لا شكر على واجب هذا عملى
احمد : ( بحذر ) : انت مين ؟
الرجل : انا المقدم نبيل محمود
عبدالله طب معلش بس مقدم فين ولا ايه بالظبط احوالك
نبيل ( مبتسما ) : انا المقدم نبيل محمود من المخابرات العامه المصريه
محمد : طب وبعدين ايه الى حصل لينا ده ؟ هتشغلونا جواسيس ولا ايه يعنى ؟ ولا فيه ايه فهمنا ؟ ومين الناس دى
نبيل (مبتسما ) : اسف معنديش غير انى اخدكم معايا لمكتب المدير العام هيفهمكم كل حاجه، اتفضلوا معايا
احمد : اتفضل حضرتك ادينا معاك
عبدالله:(هامسا) : ايه القصص البوليسيه دى الى احنا فيها دى!!
نبيل (محافظا على ابتسامته): والى هتسمعه ممكن يخليك تحس انك فى خيال علمى
احمد : اتكلنا على الله شكلنا كده كمان شويه هنخش على فيلم اكشن
محمد اسكت يا عم انت وهو خلينا نشوف فيه ايه

نبيل يتنقل بهم من ممر الى ممر حتى دخل بهم ممر ذو اضواء مبهره وجدران شبه لامعه الى ان توقفا اما باب معدنى


صوت ألى يصدر من الباب : هويتك من فضلك
نبيل يضع عيناه على جهاز داخل الحائط

احمد : ايه ده هو احنا فى بانوراما اكشن ولا ايه ؟
عبدالله بانوراما مين يا عم ده احنا شكلنا داخلين على ايام ما يعلم بيها الا ربنا

الباب ينفتح

نبيل : تفضلوا...










المكان : غرفه المدير العام للمخابرات المصريه
المشهد : رجل يجلس خلف مكتب فخم
نبيل يؤدى التحيه العسكريه
نبيل : تمت بنجاح يا فندم
الرجل : تقدر تتفضل يا نبيل
نبيل : شكرا يا فندم

الرجل : احب اعرفكم بنفسى انا اللواء محمود مدير المخابرات المصريه
عبدالله: ( هامسا ) : ينهار ابيض .. تمام يا فندم
احمد : احنا تهمتنا ايه ؟ وربنا ما عملنا خيانه ولا اى حاجه وربنا البنجو ده مش بتاعى
عبدالله:انا خاين وعميل وبن *** بس برده البنجو ده مش بتاعى
محمد بس يا دزمه انت وهو هتودونا فى داهيه .. يا فندم انا معرفش العيال دى هما الى وادونى لحد سكة الشيطان انا عاوز الحكومة تنقظنى
اللواء محمود (ضاحكا) : زى ما ملفكم بيقول تماما ثلاثة مصايب
احمد : وكمان لينا ملف ؟
عبدالله: ما تقف ياض انت وهو باحترام شوفوا انتوا بتكلموا مين
محمد اسفين حضرتك . بس احنا مش فاهمين اى حاجه ومش عارفين احنا هنا ليه

اللواء محمود : دلوقتى تفهم

اللواء محمود يضغط على زر فى مكتبه : تفضل يا نور


ينفتح الباب ويدخل منه رجل قوى البنيه شاب فى الثلاثينيات من عمره

محمد بس ده الى هينفخنا
عبدالله انا برىء
نور : اهلا بكم يا شباب فى القرن الثانى والعشرين
احمد (بسخريه): نعم ؟!! القرن الكام ؟!!!
نور ( مبتسما ) : انتم فى 1/7/2112
عبدالله (مندهشا ): طب مخابرات وصدقنا انما الحوار احنا مش فاهمين فيه اى حاجه ولا اى بتنجان
نور ( مبتسما) : عارف ان الكلام ده صعب عليكم تتقبلوه دلوقتى بس هثبت ليكم . ايه اخر حاجه حصلت ليكم من قبل ما تكونوا فى الغرفه المظلمه ؟
محمد(ذهول):نازلين البحرومره واحده ..
احمد : اه صحيح ازاى ده حتى احنا لسه بلبس البحر يعنى اننا جينا على البحر من هنا ؟ طب ازاى ؟
نور ( محافظا على ابتسامته ) : قصدك جيتوا من البحر لهنا
عبدالله: مش فاهم برده
نور : انا هوضح ليكم كل حاجه .
دلوقتى انتم فى القرن ال 22 وجيتوا عن طريق جهاز زى أله الزمن كده طريقه عمله بتعتمد على عمل موجات داخل المياه الموجات دى بتعمل على تفتيت ذرات جسمكم ويقوم الجهاز بأرسال الذرات الى جهاز استقبال هنا بيستقبل ذرتكم ويعيد تهألكم الى اجسامكم تانى عشان كده كنتم تعبانين اول ما جيتوا
احمد : طب وايه الى يخليكوا تجبونا من الماضى وكده يعنى ؟
نور ( مبتسما ) : مش وقته دلوقتى .. انتم دلوقتى هتاخدوا راحه عشان السفر وهتطلعوا بره تشوفوا الحياه ازاى عشان تعرفوا كل حاجه بنفسكم لأجل المهمه الى انتم هنا عشانها
عبدالله : طب ازاى احنا منعرفش اى حاجه ؟
نور يخرج من جيبه ثلاثه اجهزه على هيئة عملة معدنيه
نور : اتفضلوا كل واحد ياخد واحده
محمد ايه دى ؟
نور : دى اجهزه بسيطه هتخلوها معاكم فى جيبكم عشان نعرف مكانكم فين بالظبط وتقدروا تكلمونا منها لو فيه مشكله
عبدالله: ازاى ؟
نور : كل واحد لو سمحتم يحط ابهامه على الجهاز وهو هيشتغل

وضع كل منهم ابهامه على العمله فظهرت شاشه صغير هلاميه وهميه فى الهواء

احمد :روعه روعه روعه
نور : بصوا من فضلكم فى الشاشه عشان تعرفوا ايه الى فيها
الأيكونه الأولنيه الى فوق دى زى ما تعتبر خريطه وعليها اماكنكم اما الأيكونه الى تحتها مباشرة دى عشان تتصلوا عبدالله :الأيكونه الى بعديها على طول فدى عشان لو عاوزين تشتروا حاجه بتضغطوا عليها بتطلع ليكم معلومات على الشاشه بحساب كل واحد فيكم

عبدالله: فيزا يعنى
نور ( مندهشا ) : يعنى ايه فيزا ؟
احمد : لا متاخدش فى بالك دى حاجات كده كنا بنستعملها عشان نشترى بيها بدل ما نشيل فلوس
نور : اها..لأ هنا بقى الكود بس الى تقدر تستخدمه لو رحت عند اى حد بتديله الكود

محمد : على بركة الله


نور : دلوقتى انتوا عاوزين تروحوا فين ؟
احمد : فيه اهرامات

محمد : اهرامات ايه يا عم دى شكلها انقرضت

عبدالله : يا عم ده بيقولك يعنى ايه فيزا هيكون فيه اهرامات !!

نور (ضاحكا ) : اكيد فيه اهرامات امال يعنى هتروح فين
احمد : طب الحمد لله كنا بنحسبها تاهت ولا حاجه
نور : طب يلا اوديكوا ليها ؟
عبدالله :دينا اى حته تانيه
نور : شفوها دلوقتى هتعجبكم
محمد طب ماشى
احمد : انت اى حاجه سارح وراها
محمد يا عم مش هنخسر حاجه احنا معانا فلوس لو معجبتناش نركب ميكروباص ولا شكله هو كمان انقرض
نركب اى حاجه بقى
عبدالله: يلا نروح
نور : اوك تعالوا ورايا

نور يذهب ووراه الثلاثه الى ان ذهبوا الى غرفه مليئه بالأجهزه الغريبه




احمد :هو هنا الموقف ؟
محمد دوران شبرا هوا يا خفيف
عبدالله:امال هنروح ازاى ؟
نور : كل واحد هيخش فى الجهاز البيضاوى الى هناك ده وهو الى هينقلكم ثوانى اروح اظبط ليكم الأحداثيات وارجع ليكم تانى

عبدالله: ( ساخرا ) : الله اخيرا يا احمد لقيت البيضه الى انت تايه منها
محمد ( ساخرا ): يلا يا احمد مبروك لقيت البيضه الحنونه
احمد : عقبال ما الاقى ........
عبدالله: ولد عيييييييب احنا فى زمن مش زمنا لما نروح هناك عندنا ابقى طلع عينه
احمد : وحياتك لأنفخك انت وهو بس اصبروا عليا
نور عائدا : يلا تمام يا شباب كل واحد يروح مكانه وهينقلكم الجهاز
محمد يا مسهل
نور : كلكم جاهزين
جميعهم فى صوت واحد : تمام
نور : على بركة الله 1.2.3








المكان : الأهرامات
الزمن : 8.45 صباحا

المشهد : احمد وعبدالله ومحمد ينزلون فى مكان شبيه بالمكان الذى ذهبوا منه


احمد : ايه ده يا عم ده شكلنا الصبح بدرى مفيش حد كتير هو الراجل ده مودينا نبيع لبن ؟
محمد اسكت انت هو فيه احسن من كده
عبدالله: بطل رغى ياد انت وهو خلينا هنشوف احنا هنروح فين
احمد : مش لما نخرج من هنا ايه الممرات دى كلها والشمس ضربه على الجنب من الأزاز تحفه والله

المشهد : الثلاثه امام الطريق المؤدى للأهرامات يملاء الطريق بعض من الحراس الأليين يغطى الطريق طبقه من ماده تجعله اشبه بالمياه تمشى فوقها , اما الناس فيلبسون زيا مختلفا عن زماننا

محمد ايه الجمال ده شكل الأهرامات حلو اوى بالى حطينه عليها بينور ده
عبدالله: بس ازاى بينور فى الشمس كده
احمد : ده زى ما تقول حاجه كده عاكسه النور او فسفور المهم انها شكلها رائع بالألوان الى عليها دى
محمد ولا الطريق روعه وتحفه اوى والناس ايه الناس دى !!
عبدالله: وشوف الشرطه بقوا أليين .. الله يرحمه الشويش عطيه لو كان شاف كده كان اتهبل
احمد : يا جدعان انتوا مش حاسيين الى فيه حاجه ناقصه
محمد حاجه ايه ؟
احمد : شوفوا احنا لسه لابسين المايوهات والتشيرتات والناس بتبص لينا واكننا من ايام الكفار
عبدالله: يا سيدى سيب الى يبص يبص حد ليه حاجه عندنا
احمد : اسكت انت يا عبدالله بالبلباتوظ الى انت جايبه معاك ده .. مش هاين عليك تجيب مايوه وتى شيرت ؟
عبدالله: يا عم احنا لاقيين ناكل كده فله
محمد كده كده نطلع نشترى من بره احنا هنفلس ابوهم بس تعالوا ناخد لفه
احمد : ماهو انت همك حاجه اسكت
محمد اسكت ايه ؟ هو حصل منى حاجه قبل كده ؟ لا سمح الله ؟
عبدالله ايه ياض مش فاكر القميص الى لقيناه ب 55 جنيه وبعد كده رحت جبته ب 110 جنيه وخدت على قفاك
محمد يا عم هى فلوسى ولا فلوسك ؟ انت صارف عليا من جيبك ؟
عبدالله: خلاص يا عم انا مالى الى بياخد خليه ياخد تانى
احمد : بس ايه المبنى الجديد الى جنب الهرم ده وفين الصحراء ؟ دى انقرضت دى ولا ايه مفيش الا حتت صحراء بسيطه يدوبك
محمد اكيد مع الزحمه فى السكان عمروا الصحراء
عبدالله: بس ايه برده المبنى ده شكله جميل اوى ما تيجى نخشه
احمد : طب تعالى نسئل ايه ده

احمد بيوقف احد الماره

احمد : بقولك ايه يا حاج ايه المبنى ده ؟
المار : انت من الهند يا بنى ؟ حد ميعرفوش ؟!!!
عبدالله: معلش بقى يا حاج احنا منعرفش حاجه
المار : لا حول ولا قوة الا بالله هو فيه حاجه فى الزمن ده بتستخبى
محمد يا عم انت هتقولنا ولا هتفضل تطلع عين اهلنا كده
المار : ده المتحف الدولى الجديد الى حاطين فيه اثار الملك الى لسه مكتشفينه من 5 سنين
احمد : ملك ولسه مكتشفينه !! اسمه ايه يا حاج ؟
المار : لا بقى ده انتوا فاقدين الذاكره ربنا يسهلك يبنى انت وهو
عبدالله: خلاص يا حاج شكرا ( كتك نيله فى شكلك )

احمد : ايه ده ملك لسه مكتشفينه وعاملين ليه ده كله ؟ اكيد كان ملك كبيييييييير جدا
محمد طب ما نيجى نخش نشوف ايه الحكايه ؟
عبدالله: يا سلام بقى لو نعرف اكتشفوه فين ونرجع نكتشفه احنا فى زمنا
احمد : بس لسه هيكون عليه حاجات فى المكان الى اكتشف فيه او المكان فيه حاجه الله اعلم خلينا نخشه بس نشوف دلوقتى
محمد يا عم ده ملوش فيها هو بتفرق معاه حاجه .. يلا نخش فكك منه


المشهد : الثلاثه امام المبنى




احمد : ايه ده شكله تحفه
عبدالله: الله يرحم جدك كان اخره يشوف عربيه فيت ويقول عليها طياره
احمد : طب اخلص يا ظريفه وشوف لينا التذكره
محمد ثوانى اشوفها هى فين واجيب ليكوا معايا استنوا هنا
عبدالله: اوك خد وقتك
احمد : واد يا عبدالله هو مفيش هنا مزز ولا ايه ؟
عبدالله: بس يا واطى ..اكيد فيه بس استنى بس نشوف كده
احمد : مش بقولك جايبنا نبيع لبن مفيش ناس كتير غير يا دوبك سياح وشويت ناس غريبه زى الراجل الى سألناه ده
عبدالله: يا عم سيبك هنخش جوه ونشوف كل حاجه

بعد فتره يعود محمد


محمد روح يبنى انت وهو على الجهاز الى هناك ده كل واحد يحط صباعه عليه ويدخل الكود
احمد : مفيش تذاكر ؟
عبدالله: معلش يا محمد سيبك منه ده من ايام الكفار ( الله يرحم جدك ابو لهب )
احمد : محسسنى اوى يلا انك من القرون الى محدش شافها وانت اخرك قرنين على دماغك
عبدالله: اللهم ما طولك يا روح .. تعالى يا بنى يا حبيبى نشوف البتاعه الى بيقول عليها دى خلينا نخش

بعد فتره رجعوا الأثنين

محمد ها عملتوها
احمد : ايوه يلا بقى
عبدالله: ايه لزمتها ؟
محمد بصوا انا سئلت واحد وقالى اعمل كده وبعدين احط صباعى فى جهاز كده جنب الباب وبعد كده الباب هيفتح لصاحب البصمه بس
احمد : اها تقريبا الجهاز ده الى الراجل بيحط ايديه فيه
عبدالله: طب يلا نخش
محمد يلا

باب المتحف ينفتح ثلاث مرات ليدخل الثلاثه
صوت معدنى : اهلا بكم فى المتحف الدولى لمحتويات الملك الأسكندر الأكبر
احمد : ايه ؟ الأسكندر الأكبر؟
عبدالله: مين ده ؟
محمد الأسكندرأكبر؟ عشان كده الراجل كان مستغرب مننا واحنا بنسأله
عبدالله: ما تفهمونى يا جدعان بدل الغباء الى انا فيه ده
احمد : طول عمرك ... بص يا بنى الأسكندر الأكبر ده او المقدونى كان من اكبر الفاتحين فى زمانه فتح تقريبا زى ما تقول معظم بلاد العالم وهو الى بنى مدينة الأسكندريه ومات فى سن صغير وهو عنده 32 سنه وكان متولى الحكم وهو عنده 18 سنه وعمل انجازات عظيمه جدا منها انه قدر بصغر سنه بعد موت ابوه يوحد اليونان على كلمة واحده بعد ما ثار عليه الملوك الصغيرين وبعد كده قاد حملات للشرق وللبلاد العربيه ثم بعد كده دخل على مصر

عبدالله: ايوه كده فهمت .. بس ايه برده مش فاهم ليه المتحف الكبير ده وايه محتويات دى ؟ كل ده عشانه ؟!!
احمد : الأسكندر الأكبر لما مات يا عبدالله محدش عرف هو اندفن فين فى مصر ولا فى اليونان ولا فين بالظبط ولا ادفن معاه ايه فممكن يكون لقوا مقبرته هنا فى مصر وفيها محتوياته
محمد نفس الى كنت هقوله بالملى
احمد : يبنى انت اخرك محو اميه تروحها .. تقول ايه انت فاهم حاجه ؟
محمد يا عم مدقش اهو احنا عايشين فله اهوت
عبدالله: طب يلا نخش نتفرج وبعدين نخرج
احمد : مش حاسين ان الجو ولا بارد ولا حر شكلنا كده فى مكيف بس فين فى الهيلامان الى احنا فيه ده
محمد اكيد كله اتطور احنا فى المستقبل يعنى توقع اى حاجه
عبدالله اهم حاجه فى ستارة تكيف عشان اقف تحتيها اخد شويت طراوه
احمد : الطراوه راحه يا عينى وانت مبتعرفش
محمداتلم يا نيله انت وهو خلينا نشوف الحاجات بقى
احمد : طب هنطلع للدور التانى ده ازاى مفيش ولا سلم ولا اى حاجه ؟!
عبدالله: استنى نسئل اى حد ولا اقولك نستنى نشوف بيطلعوا ازاى
محمد الحق فيه راجل هناك اهوت رايح جنب الحيطه تعالى وراه
احمد : ده اختفى ؟ !! اكيد حط ايده فى جهاز زى الى داخلين منه
عبدالله: اهوت الجهاز بسم الله
محمد وانا وراه
احمد : احيه بخاف من المرتفعات بس يلا






المكان : خارج المتحف
الزمان : 10.15

احمد : يااااااااااااه الحاجات جوه روعه اوى
عبدالله: تصدق اانا اول مره اعرف حاجه زى كده
محمد طول عمرك ميييييح
عبدالله: أحسن ما اكون باكل زيك وبطخن بس
احمد : ايه يا عم هتنق على الواد اهو بسم الله ما شاءالله شويه وهيخلف
محمد طب يلا يا دزمه منك له من قدامى بدل ما انتوا عارفين
عبدالله: طب يلا فين ؟
احمد : اه صحيح هنروح فين ؟
محمد مش عارف
احمد :ما تيجى نشوف بلدنا بعد 100 سنه ؟!
عبدالله: تقصد نروح اشمون ؟
محمد فكره والله
احمد : بس ازاى ؟!!!
عبدالله: الى يسأل ميتوهش
محمد طب يلا نسأل
احمد : استنوا يا جدعان انتوا ناسيين الجهاز الى شبه الشلن الى معانا ده
عبدالله: اه صحيح تعالى نشوفه كده
محمد انى ايكونه الى نضغط عليها ؟
احمد : تقريبا دى كده
عبدالله: فيه خريطه اهيت
محمد مش فاهم حاجه
احمد : احنا نتعب دماغنا ليه يلا نسأل
عبدالله: مش قولت ليكم من الأول
احمد :: استنى هسأل الراجل الى هناك ده
يا عم الحاج
الراجل : نعم يبنى ؟
احمد : بقولك يا حاج انا عاوز اروح مدينة اشمون اركب من انى حته ؟
الراجل : مدينة اشمون ايه دى ؟
احمد :فى المنوفيه يا حاج
الراجل : طب ما تروح !!
احمد :طب اروح منين ما انا مش عارف اركب ميكروباص ليها منين ولا اتوبيس ولا قطار
الراجل (مندهش): قطار واتوبيس وميكروباص كمان ؟!
احمد : ايه يا عم انا شتمتك ؟
الراجل : لأ يبنى بس انت جايب حاجات غريبه اوى من زمان
احمد : اه ... معلش يا حاج بهزر معاك
الراجل : طيب .. بص يبنى انت هتروح البتاعه دى وتركب عادى زى ما انت بتروح اى حته
احمد : طب يعنى اعمل ايه ؟
الراجل : خش جوه وقوله الأحداثيات يا سبحان الله ؟!
احمد : طب شكرا يا حاج
الراجل : العفو يبنى

احمد : ايه يا جدعان النظام دلوقتى
محمد: قال لك ايه ؟
احمد :قالى اشوف الأحداثيات واحطها فى الجهاز الى لسه طالعين منه ده وهو الى هيودينا
عبدالله: يبقى الخريطه هى الى فيها الأحدثيات
احمد :اه صح تعالى نشوف بلدنا كده
محمد اوك تعالوا ونحركها مع بعض
عبدالله ايوه هى دى الأحداثيات بتاعت البتاعه الى احنا بنروحها اهيت اسمها T.E فى الخريطه زى الى مكتوب على المبنى بتاعها الى فى وشنا ده
احمد :صح .. طب يلا نخش ونحط الأحداثيات هناك ونطير
محمد اوك يلا






المكان : اشمون منوفيه
الزمن : الساعه 10.31

احمد : استنوا يا جماعه قبل ما نخرج من المبنى ده
عبدالله: فيه ايه ؟
احمد :يا ترى ايه الى اتغير بره ؟
محمد مش عارف بس تعالى نشوف كده

الثلاثه يخرجون من المبنى

احمد : ايه ده ايه ده التطور ده كله ؟
محمد احنا فى المريخ ولا ايه ؟
عبدالله: فين الحاجات الى كانت زمان !!!!
احمد : ده مفيش حتى اى معلم من الى كانوا موجودين
محمد امال فين المحطه ؟
احمد : افتح الخريطه كده
محمد اوك تعالوا نشوف ...
عبدالله: انا مش فاهم منها حاجه كلها حاجات جديده مفهاش شبه من الى نعرفه
احمد : لأ سهل نعرفه من اسامى القرى الى كانت جنبنا ونمشى واحده واحده لحد ما نعرف اى حاجه
محمد صح يا احمد تعالى نشوف كده .. دى القريه الى جنبنا مباشره واقرب واحده لينا لما نمشى بالراحه كده مسافة 8 كيلو المفروض نكون فى الموقف القديم يعنى المكان الى انا مشاور عليه دى والموقف كان فيه شارع على طول ويطلع على المحطه يعنى نمشى على الشارع ده كده ونقف هنا يعنى احنا دلوقتى ...
احمد : على المحطه بتاعت القطار ؟!!
عبدالله: فين ده ؟ ده مفيش ولا حتى رصيف ولا اى قطار ولا اى حاجه
محمد ايوه ده كله شوارع ومفيش الا المبنى ده
احمد : مش ملاحظين حاجه غريبه
عبدالله: ايه هى ؟
احمد : مفيش ولا عربيه ومفيش غير ناس ماشيه عادى جدا وفى حاجات كده غريبه بتطير فوقينا خالص واكنها طيارات
محمد اه صحيح ليكون دى الى بدل العربيات والقطرات ؟
عبدالله: ايوه ممكن ده مفيش ولا عجله حتى على الأرض
احمد : سيبكم من الحوار ده وتعالوا نسأل بقى
محمد نسأل على ايه ؟
احمد : على اسم عيلة واحد فينا
عبدالله: اه صح نسأل على مكان عيلة اكبر واحد فينا
احمد : عيلة الفيومى اكبر واحده هنا فينا احنا الأتنين
محمد اوك اسأل عليها
احمد : طب ثوانى هروح اسأل


احمد يذهب ليسأل احد الجالسين على الكراسى المجاوره للمبنى
تمر دقائق ...

عبدالله: هو احمد بيعمل معاه ايه ده كله !!
محمد : مش عارف ... اهو جاى اهوت


احمد يعود مذهولا

محمد : ايه فى ايه ؟
عبدالله: مالك ياض عامل كده ليه واكنك مات ليك حد ؟
احمد : عارفين مين ده ؟ الى كنت بتكلم معاه ؟
عبدالله: مين ؟
احمد : ده ........

ولم يكن احمد هو فقط من فتح عيناه من الذهول بعد ملاقاة الشخص
بل محمد وعبدالله ايضا
فما سمعاه مذهل للغايه ..






تم بحمد الله الجزء الأول

اتمنى ان ينال رضاكم وأرى ردود تشجعنى على تكملة الجزء الثانى

[Mr.V.I.P]

أنا قريت اول 3 فقرات من القصة

وباين عليها حلوة ^^ هحاول اكملها باذن الله

تسلم

[!_ToGoO_MorY_!]

المشاركة الأصلية كتبت بواسطة mr.v.i.p عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

أنا قريت اول 3 فقرات من القصة

وباين عليها حلوة ^^ هحاول اكملها باذن الله

تسلم

لأ ولا يهمك كملها فى اى وقت

تسلم على ردك

[omarelsaidy]

حلوا الفكره و شكرا علي المجهود

[!_ToGoO_MorY_!]

المشاركة الأصلية كتبت بواسطة omarelsaidy عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

حلوا الفكره و شكرا علي المجهود

Thanks

[Little.Tornado]

نانا وصلت لحتة الزرات

احمد دا فشتو عايمة اوى

[°•.♥ Taxilion ♥.•°]

تسلم على مجهودك

[!_ToGoO_MorY_!]

المشاركة الأصلية كتبت بواسطة ™omar ghanem™ عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

نانا وصلت لحتة الزرات

احمد دا فشتو عايمة اوى

مش فاهم والله ^^

المشاركة الأصلية كتبت بواسطة taxi عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

تسلم على مجهودك

والله دى قصه مش مجهود وعاوز رأيك مش مجرد رد وخلاص^^

[poiu]

رائعه أكيد

و قريتها كلها

إنجز بقا و قولنا مين إلش شافوه :))

بس بيتهيألي هيبقي أخوه الصغير أو إبن أخته =))

[! FiRe !]

عالمى ياض اقسم بالله
هتثبت عليا النعمة

[!_ToGoO_MorY_!]

المشاركة الأصلية كتبت بواسطة poiu عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

رائعه أكيد

و قريتها كلها

إنجز بقا و قولنا مين إلش شافوه :))

بس بيتهيألي هيبقي أخوه الصغير أو إبن أخته =))

ههههههههههههههههه يا عم ربنا يسهل وهتعرف ^^

تسلم لردك

المشاركة الأصلية كتبت بواسطة ! Fire ! عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

عالمى ياض اقسم بالله
هتثبت عليا النعمة

انت الى عالمى والله يا حبى وده من ذوقك انك تقولى الكلام الكبير ده

تسلم على التثبيت والتقدير يا حبى

[''New_Year'']

موضوع رائع يا احمد تسلم ايدك

[!_ToGoO_MorY_!]

المشاركة الأصلية كتبت بواسطة ''new_year'' عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

موضوع رائع يا احمد تسلم ايدك

تسلم يا حبى على ردك

[MAXx__warrioR]

انا وصلت لحته 1...2....3.... هيلا هوبا
هحاول اكملها
بس اكيد حلوه طالما انتا الى عاملها

[!_ToGoO_MorY_!]

المشاركة الأصلية كتبت بواسطة maxx__warrior عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

انا وصلت لحته 1...2....3.... هيلا هوبا
هحاول اكملها
بس اكيد حلوه طالما انتا الى عاملها

يااااااااااااااه وصلت كتير اوى ^^

عقبال ما تكملها وتسلم لذوقك يا كبير ^^