اقرأ ..ركز في الكلام ..وشارك برأيك ~_^

[loko]

بسم الله الرحمن الرحيم

في البداية يا شباب انا كتبت الموضوع ده بعد نظرة عميقة شوية للعبة SilkRoad On Line ..و حبيت ان اطرح افكاري دي ونتناقش فيها كلنا مع بعض وياريت كل واحد يتفضل برايه و مشاركته الكريمة :-

- بصراحة انا استوقفتني بعض الاشياء الغريبة من خلال تجربتي مع اللعبة .. فعلى سبيل المثال : فيه ناس صرفت اموال كتير جدا على الاكونت بتاعها ..وفيه ناس صرفت حوالى 5 آلاف جنيه وفيه اكتر ...الخ.. وطبعا من حق اي واحد يصرف على متعته الشخصية و الحاجات اللى ملكه زي ما هو عايز.. واذا كان صح او غلط فدي يحاسبه فيها ربنا ..دي مش شغلتنا احنا ..واقصى ما يمكن فعله هو النصح والجميع احرار في قبول النصيحة من عدمه .

- بس السؤال هنا لنفسي : هل يا ترى الاكونت اللي انت صرفت عليه آلاف الجنيهات ده ملكك حقا 100 % ؟

ج : اكيد طبعا ملكي .!!

س : طب جميل .. هل تقدر تنزل الاكونت بتاعك او تفرغه في اسطوانة و تحطها عندك في البيت ؟ ..او تحفظه على الهارد ديسك بتاعك ؟ ..زيه زي اي اسطوانة ويندوز شرعية بتشتريها ؟

ج : لا طبعا .. دي بيانات محفوظة في قواعد بيانات Joy Max وهما اللي عندهم كل حاجة عن الاكونت وكل البيانات .

س : لو في يوم من الايام Joy Max قررت انهاء لعبة سيلك رود ..هل تقدر تطالبهم بالاكونت بتاعك ؟ او يردوا ليك تعويض او مقابل ما دفعته ؟ بالرغم ان هم اللي قرروا انهاء اللعبة بارادتهم وانت مالكش ذنب ؟

ج : بصراحة لا مقدرش !!

س: لو ال [GM] كان مرة كده شافك و معجبوش شكل الافاتار بتاعك قام مديك بلوك ..تقدر تعترض على القرار ده ؟ ..طب تقدر ترفع عليهم قضية تطالب بحقك او بالاكونت بتاعك ؟!!

ج : بصراحة مقدرش اعترض و لا اقول اي حاجة .

س: لو الاكونت في يوم اتسرق منك كله ببياناته بكل حاجة ..تقدر تقوم بتتبعه و تتطالب Joy max برده ليك بناء على بياناتك اللي سجلت بيها حتى لو كانت بيانات حقيقية من واقع اوراقك الرسمية ؟

ج : لا مش هقدر اعمل كده و مفيش الكلام ده .

- طيب بعد كل ده كل ده لسه بتقول ان الاكونت ملكك 100 % ؟... احسنلك تراجع نفسك وتعرف ان الاكونت بتاعك في سيلك رود هو عبارة عن ان شركة جوي ماكس بتقدملنا خدمة ترفيهية لمدة معينة ( عمر الاكونت ) وان الاكونت بتاعك ده انت مأجره منهم مش مالكه زيها زي اي لعبة في مدينة الملاهي..وهما احرار في اي وقت انهم ينهوا عقد الايجار الوهمي ده بدون اذن منك او حتى انذار..وبعد كده اكونتك مش هتشوفوا تاني.

- فعلشان كده نصيحتي ليك الحق استمتع بالاكونت واعمل بيه اللي انت عايزه و واياك ان تحزن على حاجة حصلت معاك في اللعبة او كيمياء فشلت او اي حاجة او تخسر حد او تسب حد ...ولما تصرف على اللعبة ياريت يكون من داخل اللعبة نفسها يعني مش اموال حقيقية وعلى راي المثل الشعبي " يا مربي في غير ولدك ..يا بانى في غير ملكك " هههههههههه ..الا كونت مش بتاعك يا باشا فلو انت صرفت اموال على اللعبة كانك بتحط فلوسك في خزينة ببنك معرض للسرقة و الافلاس او النصب

و ده كان الشق الاول من الموضوع ..اما الشق التاني :

- فهو ان فيه ناس من كتر اندماجهم مع اللعبة اصبحت بالنسبة ليهم بتشكل عالم افتراضي يوازي العالم الحقيقي .. وفي بعض الناس اللعبة بدات تمثل ليهم العالم الحقيقي نفسه..
حتى ان البعض بدا يدخل فيها نظرية المؤامرة وان ال [GM] بيتامر لصالح جيلدات تانية في الFW و اسرائيل و العرب والدنيا و البطيخ و شركات البوت و الجولد بتدفع اموال رشوة لجوي ماكس علشان تسيبها و بلاوي كتير وبعد كده احتمال نسمع ان فيها كائنات فضائية بتعمل هاك على جوي ماكس ..وفيه ناس خسرت اصحابها بسبب اللعبة و فيه ناس بتحلم بيها و هي نايمة وناس تانية اللعبة اثرت على صفاتهم و غيرت شخصيتهم وناس خسرت مستقبلها ...

- للاسف الناس جعلت من سيلك رود اكثر من مجرد كونها لعبة لا طلعت و لانزلت وهي احدى وسائل التسلية لا اكثر و لا اقل .. و علشان اوضحلك اكتر تخيل نفسك في الموقف ده :

- " انت عندك اكونت 110 ماكس وفل فارم وفل امورتاليتي و اسلحة باور وملك السيرفر ومحدش قدك .. وانت ماستر الجيلد بتاعك وفي وسط ال FW و الحرب ...غمض عنيك للحظة وخد نفس عميق وقوم من على الجهاز ..و روح اسأل اي واحد ماشي في الشارع : " انت تعرف لعبة سيلك رود ؟!!" ..اكيد هيجاوبك و يقولك : " اقرب صيدلية الشارع اللي جاي ..اكسر يمين " ..هههههههههههههههههه

- للاسف ودي حقيقة ان ناس كتير من اللي بيعجزوا عن الابداع والانجازات في حياتهم الحقيقية بيلجأوا انهم يعملوا الانجاز ده في واقع افتراضي زي سيلك رود والمتطلبات هما بيمتلكوها بوفرة واللي هي ( وقت + مال ) ..انا بس بزعل جدا لما الاقي حد ضاع مستقبله بسبب اي حاجة مالهاش لازمة حتى وان كانت لعبة كلنا بنحبها واسمها "سيلك رود "..

وفي النهاية يا شباب انا بس حبيت اشارككم في بعض الافكار اللي جت على بالي مش اكتر ..وآسف اشد الاسف على الاطالة و الاسهاب في الموضوع ..واتمنى منكم المشاركة بالاراء الكريمة .. استودعكم الله