http://up2.m5zn.com/photo/2009/3/24/...lfqez5.gif/gif





http://www.s3udy.net/pic/decoration003_files/56.gif






البقاء لله يا ريس





http://www.s3udy.net/pic/decoration003_files/56.gif




تدوينة كتبتها الدكتورة مروة ومسحتها لأنها شكت إن فيها شماتة.بس أنا عدلت حاجة بسيطة وهنزلها لأن مفيهاش شماتة.ولازم نفصل بين تعاطفنا مع أم الطفل زيها زي أم أي طفل بينتقل لرحمة ربنا ودعائنا ليها سراً بالصبر..وكذلك اليقين الطبيعي عند أي حد عارف دينه إن الطفل البرئ في الجنة .


وبين جوقة النفاق _ تقرباً من الجد فقط لا غيرأو شكر لنعمته علي رئيسهم مش رئيسي _ اللي شغلها الإعلام وحالة الحداد الغير طبيعية وقطع الإرسال والجنازة اللي الطفل نفسه لو رجع للدنيا هيرفضها لأنه رايح لربنا مش رايح للبشر..ونتج عن ما سبق حالة تعاطف غير إرادية حس بيها البعض من الغلابة ..أو إرادية نافق بيها البعض نفسهم قبل أي حد تاني
أنا بس مندهش..هو فعلاً بقي صاحب العزبة ؟ واستطعم الناس الخضوع للفرعون حتي في أدق التفاصيل ؟ من 3 سنين كان مستهتر بيتفرج علي ماتش السنغال مع جدة الحفيد ومبانش عليهم غير السعادة برغم إنه ولي أمر سيحاسب عن رعية ماتوا بسبب إهمال إدارته وعضو من أعضاء حاشيته..مفكرش إكراماً ليهم حتي يشوف الماتش في بيتهم ..ليه بقي كل التعازي العلنية والسرية..فيس بوك وماسنجر ورسايل علي القنوات..هل لأن الزن علي الودان إمبارح كان أمر من السحر ؟ ولا لأن إنفلونزا النفاق استشرت بشكل لا إرادي ؟ ولا الجد فعلاً قدر يبقي فرعون بيحكم فراعنة ؟ اسئلة ملهاش رد لا عندنا ولا عند الجد .




http://www.s3udy.net/pic/decoration003_files/56.gif




أسيبكم مع كلام مروة اللي وجعلي قلبي فعلاً..وربنا يرحم الجميع..أحياء وأموات .




http://www.s3udy.net/pic/decoration003_files/56.gif




البقاء لله يا ريس .. انا أم ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكة

البقاء لله يا ريس .. انا أم ابني الوحيد مات وهو واقف يستنى الترام .. وقعت على دماغه المحطة - رغم انها كانت جديدة - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي

البقاء لله يا ريس .. انا أم ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره بره ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها

البقاء لله يا ريس .. انا أم ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازة عسكرية بعد موته

البقاء لله يا ريس .. انا أم طفلي مات وهو بيتفرج على فرح من البلكونه برصاصة.. طايشة شقاوة عيال يا ريس

البقاء لله يا ريس .. أنا ابني كان عندكم في القسم خدوه من الشارع سليم رجعلي جثة .. واحتسبته عند الله شهيد .. مش هو كده شهيد يا ريس؟؟ يا رب يكون شهيد يا ريس

البقاء لله يا ريس .. أنا ابني دكتور الجامعة مات وهو خارج من صلاة الفجر..عشان يسرقوا منه الموبايل .. غلطان حد قاله يخرج في ساعة متأخره وكمان يشيل موبايل غلطان يا ريس

البقاء لله يا ريس .. أنا أم طفل بيموت كل يوم في المستشفى من سرطان وامراض الدم وعيوب خلقية و .... لاني معيش تمن امبول الدواء .. و مستنيه نفقة الدولة .. قبل ما يموت زي الحيوانات النافقة على سرير مستشفى حكومي

البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالتة واطلع على السطح أو خليك في السبنسة يا ريس

البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد .. حفيد بس يا ريس

البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه يا ريس

البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع .. كان نفسي صورهم تنزل في التليفزيون او حتى يتكتب اسمهم في جرنان اصفر يا ريس

البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم .. بس علي الأقل مماتوش لوحدهم وكان معاهم اكتر من الف واحد .. وتخيل يا ريس إن التليفزيون مقطعش الارسال ولو لساعة واحدة بالعكس ده سابلنا الماتش نتفرج عليه ونفرح بالفوز عشان ننسي .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. بس تعرف وحشوني اصل اعز الولد ولد الولد و كان نفسي اشيل جثمانهم حتى يا ريس

البقاء لله يا ريس ..أنا أي أب لأطفال وشباب بيروح دمهم هدر علي الأسفلت كل يوم ..وبيهرب القاتل وبيفلت المسئولين والجرح مش بيندمل يا ريس

البقاء لله يا ريس ..إحنا أسر شباب زي الورد انتقلوا لرحمة ربنا من 8 سنين لما طيارتهم وقعت أدام نيويورك لأسباب غامضة ومنفعناش بحاجة الصندوق الإسود ..هم لقوه صحيح يا ريس ؟! ادعيلهم يا ريس

البقاء لله يا ريس .. احنا أغلب شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس وعمر حفيدك التاني ربنا يبارك لوالدته فيه ويطولها في عمره.. بإذن الله طبعاً يا ريس





http://www.s3udy.net/pic/decoration003_files/56.gif





افتكر إن الموت مبينساش حد .. أول الشهر احتفلت بعيد ميلادك .. اعتقد دي اخر مرة هتحتفل بيه لانه مينفعش تحتتفل بذكرى ميلاد وموت في نفس الشهر .. ربنا يصبر أم الفقيد ويصبرنا كمان يا ريس .. أنا أسف لأني حاولت افتكر قد ما اقدر الناس الي ماتوا بس الذاكره مستحملتش من كترهم


http://www.s3udy.net/pic/decoration003_files/56.gif



البقاء لله دائماً وأبداً يا ريس..ويفني العبد ويبقي الله
تعرف كده يا ريس ؟! يا رب تعرف يا ريس
البقاء لله يا ريس



صدق الله العظيم

قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ





http://www.s3udy.net/pic/decoration003_files/56.gif


الموضوع منقول !

المشاركة الأصلية كتبت بواسطة omar007 (المشاركة 1046939) البقاء لله يا ريس الحمد لله انا لسه عايش ومماتليش حد

المشاركة الأصلية كتبت بواسطة nevrlose (المشاركة 1046951) البقاء لله ياريس ماتخافش ياريس علينا ماحدش قالنا نتعب ولا نجوع ولا نمرض حتى احنا الغلطانين ياريس صدقنا

المشاركة الأصلية كتبت بواسطة asfora99 (المشاركة 1046990) ياااااااه فعلا الموت مبينساش حد الموضوع ده يستاهل انو يتنقل لقسم المواضيع المميزة لقسم بعيد عن سيلك رود موضوع اكثر من مميز

المشاركة الأصلية كتبت بواسطة seif005 (المشاركة 1048096) مات بسب مرض كان عندو وهو صغير وعنده 12 سنة