المشكلة التي تواجهني في هذه اللحظة إني جعان جدا

وده تأثيره عليا بيتجاوز الحدود الطبيعية لتأثير الجوع على الكائن الحي وربما الميت كمان

واكتشفت إن الأكل بيشغل ركن خفي بالغ الأهمية من حياتي

ولكن بما ان من أعراض الجوع عندي إني بفكر كتير

فاكتشفت بمحض الصدفة إن الشعب المصري كله عنده نفس المشكلة

وهي إن الأكل واخد أكبر من حجمه في حياتنا

إزاي


http://img62.imageshack.us/img62/329...lgegqqomjs.gif


من المعروف إن الأمثال الشعبية تعتبر من الحاجات اللي بتعبر عن طريقة تفكير الشعب

وعندنا إحنا بقى الأمثال اتفقت في حاجة واحدة بس وهي وجود الأكل في المثل

حتى لو لم يكن هناك أي علاقة من الممكن أن تربط الأكل بالموقف اللي المثل بيتكلم عنه

ولكن واضح إن وجود الأكل في أي جملة بيزود نسبة وصولها إلى عقل اللي بيسمع وقلبه ومعدته


http://img62.imageshack.us/img62/329...lgegqqomjs.gif


إكفي الإدرة على فمها ،، تطلع البنت لأمها !! ...

وبعد تشكيل لجنة من علماء الطب والفلك والتاريخ والجغرافيا والكيمياء واللغة (لجنة كبيرة يعني)

اتفق العلماء على أن التفسير الوحيد القادر على ربط كفي إدرة فول بطلوع بنت لأمها هو الآتي

أن الأم كانت ساكنة في الدور التاني وبنتها ساكنة في الدور الأول

ولسبب لا تعرفه سوى الأم فقد قررت أن تعلق قدرة الفول على حبل الغسيل

فذهب اتنين اللجنة عارفاهم ووقفوا قدام الإدرة وواحد قال للتاني

"يا صاحبي ،، اكفي الإدرة على فمها ،، تطلع البنت لأمها"

أكيد عشان تنبهها إن الفول اتدلق (آخر جملة من استنتاجى )


http://img62.imageshack.us/img62/329...lgegqqomjs.gif


ولو كنت عايز تحذر واحد صاحبك عزيز عليك أوي

هي جملة واحدة تلخص القضية وتبين خطورتها الشديدة

"اللي يتلسع من الشوربة..ينفخ في الآيس كريم!!"

ولم أجد دليلا طبيا واحدا يؤكد أن اللسعة من الشوربة تسبب الإصابة بالجنون

لدرجة أنها تجعل المريض ينفخ في الآيس كريم

إلا في حالة وجود سلاح بيولوجي في الشوربة

وعموما مش عايز " آكل بعقلكوا حلاوة "


http://img62.imageshack.us/img62/329...lgegqqomjs.gif


والموضوع لا يقتصر فقط على الانسان اللي بياكل ويشرب

ولكنه وصل للقطط اللي اتهموها ظلما إنها بتاكل وتنكر

رغم إني أتحدى إن يكون حد شافها بتاكل وبتنكر فعلا

ولكنها عادة البشر اللي بيجاملوا بعض على حساب القطط

بحجة إننا بناكل مع بعض "عيش وملح"

ومش بس الحيوانات ده كمان الموضوع وصل للجماد

فذلك التاجر الكسيب ما شاء الله زي المنشار " طالع واكل ،، نازل واكل "

والله ومش بس الجماد ده حتى الحاجات المعنوية بتاكل برضو

عندك مثلا

الزمن بياكل ،، وبيشرب كمان ،،

فقد اكتشفت بعد خمس سنين في دراستى إن بقيت انسان

" أكل عليه الدهر وشرب "

ولكن لازم الواحد يستحمل والسبب واضح

إن محدش بياكلها بالساهل


http://img62.imageshack.us/img62/329...lgegqqomjs.gif


وطبعا مفيش داعي لتكرار الكلام اللي كلنا عارفينو

عن ارتباط كل مناسباتنا بأكلات معينة لا يصح ولا يليق أن تؤكل إلا في اليوم المخصص لها

مع إني أعتقد إن المعدة بتاعتنا محدش معلق فيها نتيجة فيها الأعياد والأجازات الرسمية

والأمثلة كتيرة أوي

زي الفسيخ والكحك والعاشورا وحلاوة المولد والكنافة

لدرجة إن المناسبة الوحيدة تقريبا الخالية من الأكل عندنا هي ستة أكتوبر

وده بنعوضوا بالاحتفال بالعاشر من رمضان

حيث تتجمع الأسرة المصرية لتتناول كنافة النصر

بالهنا والشفا


http://img62.imageshack.us/img62/329...lgegqqomjs.gif


وشوف برضو إزاي الناس زهقت من الدكاترة

اللي بعد أي كشف يقوللك متاكلش ده ولا ده ولا ده ولا ده ولا أقوللك ،، متاكلش خالص

الناس بقى نفضت للطب بمجرد ما سمعت عن الطب البديل

الذي يعالج إنسداد الشريان التاجي بشوربة الزنجبيل بالقرفة الرومي

أما السكر الذي يحرمك من كل الحلويات فعلاجه بسهولة هو مسحوق بذرة الجميز الحجازي مع نفحة الشمركش المغربي


http://img62.imageshack.us/img62/329...lgegqqomjs.gif


الأكل جهز الحمد لله

وده معناه إني هعمل ( سيف آز ) للكلام ده عشان أراجعه بعد الأكل

عشان مش بثق في نفسي وأنا جعان

وعموما كل اللي فات ده كانوا كلمتين واقفين

"زي اللقمة في الزور" والحمد لله إني قلتهم