نكمل موضوع محمد وأسماء
والد محمد رجع من الشغل ومحمد بيكلم والدتة علشان تفاتح الوالد فى موضوع جوازة من اسماء
تعالول نشوف اية اللى حصل
محمد / عملتى اية كلمتية ؟
الام / فى اية ؟
محمد / تانى ياحجة هو انا مش قعدت افهمك
الام / اة موضوع جوازك من بطة بنت اختى ؟
محمد / تانى تانى
مش قولنا انسى موضوع بطة دة انا بتكلم عن اسماء
الام / اسماء مين ؟
اة بتاعة الكمبيوتر ؟
محمد / ما انتى فاكرة اهو
يلا بقى خشى كلمية
الام / طيب طيب
بكرة نشوف ست الحسن والجمال
ودخلت تكلم الوالد ومحمد بيتصنت على الباب
الام / بقولك اية ياحج ؟
الأب / اية ؟
الام / محمد ابنك عاوز يفاتحك فى موضوع جوازة
الأب/ تانى الموضوع دة مش قولنا بلاش حكاية بنت اختك دى
محمد فى سرة / الحمد لله
الام / لا مش بطة دة حاطط عينه على واحدة تانية
الاب/ طبعا ابن ابوة بصحيح اكيد حاطط عينة على نورة بنت عمة
محمد فى سرة / يانهار أزرق
الام / نورة ؟
ودى تيجى ايةجنب فاطمة بنت اختى ؟
دى بطة برقابتها
الاب / بطة اية و وزة اية ؟
بطة دى تدبحيها فى العيد مش تجوزيها لابنك
محمد فى سرة / وبعدين بقى هيقعدوا يتخنقوا كدة ويسيبوا الموضوع بتاعى خالص
الاب / و المحروس بتاعك عاوز يتجوز مين بقى ان شاء الله؟
الام / دى بت اسمها شيماء طلعتلوا من الكمبيوتر
محمد فى سرة / اسماء اسماء وبعدين اية طلعتلوا دى ؟ هى عفريتة ؟
الاب / طلعتلوا منين؟ ناديهولى الفالح ابن الفالحة
ودخل محمد يكلم والدة
محمد / ايوة ياحج
الاب / اية يابنى الكلام الاهبل دة كمبيوتر اية اللى طلعتلك منة دة ؟
محمد / يا حج دى لاطلعت ولانزلت
دى زميلتى فى المنتدى واسمها اسماء
الاب / زميلتك فين ؟
محمد / تانى ؟
المنتدى دة مكان على النت بنتجمع فية وبنكتب مواضيع كتير مع بعض فى السياسة فى الفن فى الشعر وكدة
الاب / وانت اية اللى خلاك تتكلم فى السياسة احنا ناقصين
محمد / ماشى ياحج مش هكتب تانى فى السياسة وهخليها هى كمان متكتبش بس جوزهالى
الاب / هى بتكتب فى السياسة
لية هى صحفية ؟
محمد \ لا ياحج دى لسة طالبة دى بتكتب فى المنتدى
الاب \ يابنى كلمنى عربى متدى اية بس ؟
محمد / قصدى على النت ياحج
وبعدين انا معجب بيها أوى وبأفكارها ومواضيعها
تصدق ياحج انها عضوة سوبر وانا لسة عضو نشيط
الاب / سوبر ؟
نهارك ازرق هى بتشرب سجاير ؟
وهتلاقيها شربتك سجاير ياشملول
محمد / عضوة سوبر ياحج مش سجاير سوبر يعنى بتشارك بردود كتير فى المنتدى
الاب / يابنى انا بتعصب لما بسمع متدى دى
وبعدين انت مستعجل لية ؟ مش لما تعرفها كويس ؟
محمد / ياحج انا اعرف عنها كل حاجة
اسمها اسماء على
عضوة سوبر من عيلة محترمة والاسم الرمزى قمر الليل
الاب / رمزى ؟ رمزى مين وقمر مين ؟
انت هتزحم لنا الشقة لية يابنى ؟
محمد / ياحج لازحمة ولا حاجة عاوزين نروح نكلم اهلها بقى
الاب / مع انى مش فاهم حاجة بس خلينى وراك نروح نقابلهم
جرى محمد على الكمبيوتر وطلب من اسماء على الياهو انها تحدد
ميعاد مع اهلها
اسماء عرفت من محمد ان والدة وافق علشان يجى يفاتح والدها فى الموضوع
والمطلوب منها دلوقت انها تفاتح مامتها
تعالوا نشوف الحوار اللى حصل
اسماء / ماما ماما ماما ماما
الام / جك مو في اية يابت ؟
هو انا معرفش انام شوية فى البيت دة ؟
اسماء / شوية اية ياماما
انتى نايمة بقالك 17 ساعة فوقى بقى ياعسل انا جالى عريس
الام / طب دخلية الصالون لغاية لما اصحى
اسماء / فوقى بقى ياماما صالون اية ؟
دة عاوز ياخد ميعاد علشان يجيب اهلة ويجى يطلبنى من بابا
الام / وهو فين بابا مش لما يصحى من النوم
دة بقاله يومين نايم
اسماء / طب ارد علية اقولة اية دلوقتى
الام / دة الموضوع شكلة بجد
ودة وقعتية ازاى
قصدى عرفتية ازاى ؟
اسماء / دة زميلى
الام / فى الكلية ؟
اسماء / لا فى المنتدى
الام / فين يابت؟
مش دة درس الانجليزى اللى بتاخدية ؟
اسماء / لا ياست الكل دة مكان على النت بنقعد كلنا علية ونقعد نحكى ونتكلم
الام / نهارك ازرق انتوا مين يابت ؟ بتقعدى مع مين ؟
اسماء / مع اصحابنا ياماما
فرى بوى ولفلى جيرل و ايمى وباقى الاعضاء
الام / انتى بتخرجى من ورانا يابت
وكمان بتقابلى اجانب ؟
دا انتى يومك اسود
يومك اسود ومش معدى
والنبى هصحيلك ابوكى يتصرف معاكى