اصحى شوف بنتك اللى فضحتك وسط الناس
الاب / فى اية ياولية ؟ بتصحينى لية ؟
الاب / الزمالك خسر تانى ؟
الام / لا
الاب / ولما هو لا بتصحينى لية ؟
الام / بنتك جيلها عريس
الاب/ بتتكلمى بجد ؟
طب ومالة هو فين ؟ سايبينة قاعد لوحدة برة
الام / لا دة لسة عاوز ياخد ميعاد منك
الاب / وماله اصول برضة اومال فضيحة اية اللى بتتكلمى عليها؟
الام / اصل بنتك بتقول انة اجنبى وكانت بتقابلة من ورانا
لا ومش لوحدة وكمان معاه اصحابة اجانب زية
الاب / نهارك اسود انتى وبنتك
هى فين مقصوفة الرقبة
الاب / اية اللى انا سامعة دة يابت
اسماء / متصدقش والله يابابا دى ماما مش فاهمة الموضوع كويس
الاب / طب فهمينى انتى يامتنورة يابتاعة المدارس
اسماء / زميلى يابابا اسمة محمد
زميلى فى المنتدى حاجة زى النت كدة
بنتكلم على النت وطلب يقابل حضرتك هو ووالدة
الاب / استغفر الله العظيم
معلش يابنتى امك الشملولة فهمتنى غير كدة خالص
طب اروحلة النت دة ازاى ؟
يعنى بنروحلة بأتوبيس ولا اخد تاكسى احسن علشان اشرفك قدامهم
اسماء / اية بابا تاكسى اية النت دة هنا على الكمبيوتر
الاب \ كمبيوتر ؟
وراح الوالد عند الكمبيوتر
هو فين العريس دة يابت ؟
اسماء / هو عندة كمبيوتر زى دة وبيكلمنى من علية
الاب / يعنى هو وأهلة عايشين ورا الشاشة بتاعة الكمبيوتر دى ؟
اسماء / حاجة زى كدة
الاب / وانتى هتتجوزية وتعيشى معاة ورا الكمبيوتر برضة ؟
اسماء / وبعدين بقى
بابا حدد ميعاد ولما تشوفه ابقى قول رايك
الاب / مع انى مش فاهم حاجة بس ماشى
خلية يجى الجمعة الجاية بعد ماتش الزمالك و حرس الحدود
وهيبقى يومة اسود لو الزمالك خسر تانى
اسماء / ربنا يستر
وجريت اسماء وفتحت الياهو علشان تبلغ محمد بالميعاد
.................................................. ..................................................
كدة اسماء فتحت اهلها فى الموضوع
باقى اللقاء بين العيلتين فى الميعاد المحدد
اكمل ولا كفاية كدة ؟
انهاردة الجمعة ميعاد اللقاء المرتقب بين العيلتين
وماتش الزمالك وحرس الحدود شغال وابوها قاعد بيتفرج
اسماء / اية رايك ياماما البس الفستان الموف ولا التونك البنى؟
الام / ودة لية ان شاء الله انتى فاكرة نفسك هتقعدى معاهم ؟
دة ابوكى كان يقطعك
اسماء / ازاى ياماما دى اول مرة هشوف فيها محمد وهو كمان
الام / بتقولى اية يابت ؟ هو انتى لسة مشفتوش بعض اومال كنتوا بتروحوا تتقابلوا فى النت دة ازاى ؟
النور كان قاطع هناك ولا اية ؟
المهم شوفى الزمالك عامل اية احسن يخسر زى كل مرة وبابا يبقى متضايق وهو بيتكلم مع الناس
اية ياحج الزمالك عامل اية ؟
الاب / دا خسران 2 صفر
دة الواد اللى جى يخطب بنتك دة ليلتة سودة معايا
الماتش خلص والعريس وصل
اسماء /العريس جه .. العريس جه
الاب / جة جة
خشى اجرى على اوضتك متورنيش وشك لغاية لما اناديلك
اسماء ساكنة فى الدور السادس
والدة محمد / يادى البهدلة انا يابنى فيا نفس اطلع السادس ؟
كان مالها بطة بنت خالتك ماهى ساكنة فى الدور التانى ومعانا فى نفس العمارة ؟
والد محمد / ولا كان مالها نورة بنت عمك ماهى فى العمارة اللى جنبنا ولا انت غاوى بهدلة وخلاص ؟
محمد / مش وقت لا بطة ولا فرخة ابوس ايديكوا خلوا اليوم دة يعدى على خير
انا اصلا مخنوق من الكرفتة اللى انا لابسها دى
وشكلى بالورد اللى انا شايلة دة بيفكرنى بأفلام الابيض والاسود
والدة محمد / مالو الورد ياواد
دا انت عامل زى تامر حسنى فى فيلم احمد وسلمى
ربنا يستر
وصلوا السادس ورنوا الجرس
والد اسماء / مين ؟
محمد / انا محمد ياعمى
والد اسماء / يعنى محمد ابو تريكة ؟
محمد مين ؟
وفتح الباب