[Arc]

الحلقة الرابعة: (حنفى والفطار)

(حنفى بعد ماخرج من الحمام وحس انه هدى شوية بعد لحظات الرعب اللى عاشها قرر
انه يروح يشترى فطار عشان يروح الشغل و بما ان حنفى مصرى فهو أصلا ماعندوش
اختيارات فى فطاره , هو فول وبس , حنفى راح على الراجل بتاع عربية الفول اللى
بيجيب منه كل يوم )

بتاع الفول (بيكلم نفسه ) : ياساتر هو الراجل الرخم ده هييجى كل يوم ولا ايه , ياساتر على الرخامة. :(


حنفى : ايه ياجدع انت شكلك مش طايق نفسك ليه كده؟ ووشك اتغير ساعة ماشفتنى كده ليه؟ ماتكنش شفت عفريت ولا حاجة.

بتاع الفول : ياريت ياسى حنفى كان عفريت , أصل انا من غير ماخبى عليك ساعة
مابشوفك بحس بانتعاشة كده فى قلبى. :D


حنفى : ليه ان شاء الله , عبيط انت ولا ايه ؟ايه اللى بيخليك تنتعش ياخويا؟

بتاع الفول : أبدا ياسى حنفى أصلهم دايما كان بيقولولى ان أنا مافيش حد فى رخامتى
لحد ماعرفتك و اكتشفت ان أنا مجرد تلميذ فى مدرستك. :p


حنفى : طيب ياابو لسان طويل , بطل رغى بقى و اعملى شقتين فول و شقتين طعمية.


بتاع الفول : اشمعنى غيرت طلبك النهاردة يا سى حنفى , مانت طول عمرك بتاكل 3 سندوتشات بس.

حنفى : الهى ياشيخ تنطس فى نظرك , الهى وانت ماشى تخبط فى شجرة , الهى
عصفورة تعمل على دماغك و ماتلاقيش منديل تمسح بيه . هو أنا كنت باكل من جيب أبوك
يابنى ولا انا كنت باجى أطفح عندك ببلاش . انت مالك انت , حاجة غريبة والله , هو انت
شغال بياع فول ولا مخبر فى أمن الدولة. :eek:

بتاع الفول : خلاص ياعم حقك عليا , ياساتر ماكانتش كلمة يعنى , باسألك سؤال عادى
, أعوذ بالله , طيب ياسيدى هاعملك طلبك وتاكله بالسم الهارى ان شاء الله ( بصوت
واطى)

حنفى : بترطم بتقول ايه ياابو لسان طويل.

بتاع الفول : ولا حاجة , بقول ربنا يكرمك زى ماكرم غيرك قبل كده. :(

حنفى : طب خلص عشان أنا اتخنقت منك.

بتاع الفول : امال انا أعمل ايه , ممكن أسالك سؤال ياسى حنفى ؟

حنفى : اتنيل اسأل. :D

بتاع الفول : هو انت ناوى كل يوم تيجى عندى ان شاء الله يعنى.

حنفى : مضطر يااخويا , أصلك أقرب واحد للشغل , وهو لو كان فى حد غيرك كنت فكرت
أقرب منك أصلا و وهو انت الاكل اللى بتعمله ده يبقى أكل بنى آدمين ده أكل بهايم يابنى
بس هنعمل ايه بقى , أدينا صابرين. :D
بتاع الفول : لا , على فكرة يا سى حنفى فى مطعم فتح جديد على أول الشارع , يعنى
قريب أوى أوى من هنا والاكل اللى بيبيعه أكل بنى آدمين فياريت تجربه , ويارب تبقى
زبون دايم عنده , وربنا يرحمه بقى. :D

حنفى : ماشى يازبالة , هات الاكل اللى هاطفحه عشان أمشى. :eek:

بتاع الفول : اتفضل أهو يا حنفى بيه شرفتنا ونورتنا و هتوحشنا والله انت ورخامتك. :D

حنفى : نور لما يكهربك , ووحش لما ياكلك , يابعيد :eek:

بتاع الفول : ده من ذوقك ياحنفى بيه , ومش بعيد عليك الكلام اللى انت بتقوله ده , و أهو الحاجة اللى مخليانى ماردش عليك , انك ماعدتش هاتيجى التانى. :p

حنفى : ترد عليا , الهى ترد المية فى زورك ياشيخ , يلا فى ستين داهية أنا خافى يابتاع أكل البهايم
. :D

( ومشى حنفى بعد ماحرق دم الراجل اللى ساب شغلانته وباع عربية الفول بتاعته واشتغل لميع جزم , واهو كله من تحت راس حنفى ) :eek::eek: