انا من رأيي جمال مبارك
يا شعبى حبيبى ... يا روحى يا بيبى يا حاططك فى جيبى ... يا ابن الحلال
يا شعبى يا شاطر ... يا جابر خواطر يا ساكن مقابر ... وصابر و عال
يا شعبى اللى نايم ... وسارح و هايم و فى الفقر عايم ... وحاله ده حال
احبك محشش ... مفرفش مطنش و دايخ مدروخ ... و اخر انسطال
احبك مكبر دماغك ... مخدر ممشى امورك ... كده بالتكال واحب اللى يكدب ... و احب اللى ينصب و احب اللى ينهب ... و يسرق تلال
و احب اللى شايف ... وعارف و خايف و بالع لسانه ... وكاتم مقال
و احب اللى قافل ... عيونه المغفل واحب البهايم ... و احب البغال
واحب اللى فاضى ... و احب اللى راضى و احب اللى عايز ... يربى العيال
و احب اللى يائس ... و احب اللى بائس و احب اللى محبط ... و شايف المحال
و احبك تسافر ... وتبعد تهاجر وتبعت فلوسك ... دولار او ريال و احبك تهلل ... تهبل تبطل عشان ماتش كورة ... و فلم و مقال
واحبك توافق تنافق ... واحبك تؤيد تعضد توافق تنافق ... و تلحس نعال
لكن لو تفكر..... تقرر .. وتبدأ تشاكل وتسأل سؤال و عايز تطور ... و عايز تنور و تعمللى روحك مفرد رجال
ههه ساعتها هجيبك ... لا يمكن اسيبك و راح تبقى عبرة ... و تصبح مثال
هبهدل جنابك ... و اذل اللى جابك و هيكون عذابك ... ده فوق الإحتمال
و اهزأ سعادتك ... و ابهدل سيادتك و تلقى كرامتك ... فى حالة هزال
و تلبس قضية ... وتصبح رزية و باقى حياتك تعيش فى انعزال
هتقبل ؟؟ أحبك . هترفض ؟؟ هلبك ..
هتطلع هتنزل . هجيبلك جمال ** هتطلع هتنزل . هجيبلك جمال