الجروبات .. البيجدس .. الاستاتيوس .. البروفايلات .. الكتابه .. الانجليش و مشتقاته .. حتي الاسميلز
كل حاجه تختلف بالمصري
الهدف من الموضوع ده اني اوريكو اننا ف الفيس بوك زي الفلاحين ف اسكندريه
الجروبات :
خشلي بقي كده بالكاميرا كده عليا .. ايوه كده
عاوزين نلم 500 الف واحد علشان امو رحاب بتاعت التين الشوكي تفرش مكان ام سعيد بتاعت الدره
فيه خبر مؤكد ان لو مشتركتش ف الجروب بتاع : " اتحداني ( يهودي - نصراني - بوذي - شيعي - درزي - هندوسي - صيني - امريكي - هندي - مسلم بس مبيصليش ) اني اجمع ( رقم وراه 6 اصفار ) مسلم " انه تبقي خرجت عن شريعه المولاي عز و جل
او لو مشتركتش ف جروب : " نحن قوم لا تهزنا رياح عاتية و لا تهزنا ورقة فيها أجب عن الاسئلة الاتية "ممكن تسقط مثلا
او الغباوه المطلقه بقي : عاوزين نرجع عمرو لياسمين , عاوزين 10 مليون واحد علشان نرجع ازازه الكازوزه ب جنيه و ربع تاني ( رغبه شخصيه ) , عاوزين الفيس بوك يخلي الجروبات بفلوس علشان الناس تبطل استهبال
احنا اثبتنا اننا اسؤ ناس استخدمت خاصيه الجروب بالفيس بوك
البيجدس :
الي عمل خاصيه البيج ده كان ينقصه حاجه واحده بس
الي انا شخصيا بسميها : بــ . نـــ . شـــ . مــــ " بعد النظر للشخصيه المصريه "
هوه افتكر انه اما يعمل بيدج كل الناس بقي هتعمل بيدج ل الفيفورت سينجر او الروايه المفضله او لمكان معين , لكن عمره ما جه ف بالو ان واحد هيجي يعمل بيج اسمها
" عاوزين نوسع فتحه الراني علشان الفواكه مش بتنزل "
او " عين شمس و احمد عصمت ام الدنيا "
او " ضدد الاستهبال الي بيحصل ف جنينه الدمرداش "
والله شفنا من البلاوي ديه كتير
و الا صفحه الويلكام
تحسسك انك لو معملتش لايك و شير ينهااااااااااااار اسود
لو صفحه حب يبقي انت معندكش قلب
لو صفحه دينيه تبقي من الخوارج و هيقام عليك الحد
لو صفحه استهبال يبقي انت مش شاب و مش كوول و مالكش ف الدماغ
احنا أدني السلسله الغذائيه الفيسبوكيه