عرض مشاركة واحدة
قديم 26-04-2013, 03:56 PM   #14

The_Mask
عضو سوبر



الصورة الرمزية The_Mask


• الانـتـسـاب » Feb 2013
• رقـم العـضـويـة » 110272
• المشـــاركـات » 2,052
• الـدولـة » هناك على ايديك اليمين
• الـهـوايـة » الصلاة على النبى
• اسـم الـسـيـرفـر » Corvus
• الـجـنـس » Male
• نقـاط التقييم » 59
The_Mask جـيـد

The_Mask غير متواجد حالياً


إرسال رسالة عبر Yahoo إلى The_Mask

افتراضي



اولا : بسم الله الرحمن الرحيم

ثايا : صلى على النبى .

ثالثا : اعتذر على التاخر لانى حقا حقا مشغول و مازلت مشغول فاعذرونى .

هنزل باذن الله حلقتان ورا بعض تابع معيا و معلش مش ههقدر انسق المضووع برده .


( الحلقة العاشرة )

المشهد الأول ..


الحاج : ايه يا " على " يابنى اللى شقلب حالك كده ؟؟ بقيت اشوفك تصلى يعنى و بتنزل

الجامع كمان و بتقوم من عز نومك عشان تصلى الفجر !!


على : ايه يا حاج انت هتحسدنى ولا إيه ؟؟ ماتقول ( ربنا يثبتنى ) و خلاص

الحاج : ربنا يهديك يابنى كمان و كمان آميين ..

فوزية : ههههههه مش مصدقة انا الحوار ده , كلها يومين يا عم و هترجع ريما لعادتها

القديمة و بكره تقول فوزية قالت :)

على : اطلعى انتى منها و ملكيش دعوة بيا , ثم انتى ايه اللى لبساه ده ؟!!

فوزية : ايه فى ايه ؟؟

على : لبسك ضيق اوووى يا هانم , و إيه البنطلون ده !! انتى يا بت روحى غيرى اللبس

ده و إلا مش هتنزلى من البيت !

فوزية : جرى يا عم الشيخ بالراحة علينا شوية , انت داخل حامى كده ليه , ما احنا كنا

كويسين مع بعض ..

على : بقولك إيه روحى غيرى الهدوم دى احسنلك !

فوزية : يادى النيلة عليا و على سنينى , الواحد طهق من ام البيت ده .. يا ساااااااااااااااتر .

الحاج : ما تحترمى نفسك يا بت انتى و روحى اسمعى كلام اخوكى و غيرى المسخرة

اللى انتى لبساها دى !

فوزية : ده انتوا الاتنين عليا بقا !!

على : اتأدبى و انتى بتتكلمى مع ابوكى يا مفعوصة الرقبة !

فوزية : انا مش هكتر فى الكلام معاك لأنى عارفة إنى مش هخلص فى ليلتى دى ..

حاجة تقرف ..

و نزلت " فوزية " و هى نازلة قابلها ( سامح ) فاكرينه ؟

سامح : اهلاً و سهلاً آنسة فوزية :)

فوزية : اهلاً يا اخويا . ايه عايز ايه ؟؟

سامح : لا ابداً كنت بسلم بس و يعنى كنت عايز اعرف رأيك فى الموضوع اللى والدتى

كلمت والدتك فيه ؟؟

فوزية : لسة مش دلوقتى ريح نفسك , لو فى حاجة انا هقول لأمى تقول للست والدتك ..

و بعدين الناس بتبص علينا , يللا سلام ..

و مشيت فوزية لحد آخر الشارع و كان " رامى " مستنيها هناك !!

و قدراً كان " سامح " موجود هناك , شاف فوزية واقفة مع " رامى "

و لقاهم بيضحكوا مع بعض و بيهزروا و مشيوا مع بعض !!




المشهد الثانى

سامح : ماما , ماما شوفتى الناس اللى انتى عايزة تدبسينى فيهم ؟؟

الحاجة : ناس إيه يابنى و تدبيسة إيه ؟؟ فهمنى !

سامح : الست هانم , ربة الصون و العفاف اللى اسمها " فوزية " شوفتها واقفة مع واحد

على اول الشارع و واضح كده انهم مأنتميين >> يقصد " منتنين " <<

الحاجة : يا نهااااار ابيض !! ليه كده بس ده الست امها كُمـل و ابوها كمان .. بقا على آخر

الزمن البت دى اللى تجيب راسهم التراب ؟؟

سامح : طب احنا كده الحمد لله عرفنا الحقيقة قبل ما الفاس تقع فى الراس .. انتى ناوية

على إيه يا حاجة ؟؟

الحاجة : ناوية على إيه ؟؟؟

البنت دى لازم تتأدب و ابوها و امها يعرفوا علشان تحرم تأنتم تانى !!





المشهد الثالث



فى المدرسة الثانوية ..


محمود : علــــى .. حبيبى إيه اخبارك واحشنى يا عم


على : الحمد لله انا تمااام يا حودة , انت عامل ايه ؟ و الدك و والدتك عاملين إيه ؟


محمود : آه الحمد لله بخيــر , بيسلموا عليك :)

على : الله يسلمك و يسلمهم ..


محمود : إيه اخبار الصلاة ؟؟

على : الحمد لله لحد دلوقتى ماشى حلو اووى , ادعيلى انت بس مرجعش تانى , لحسن

فى كل حتة يقولولى " كلـهم يومين و ارجع " !!

محمود : انت مالك انت و مال الناس يا عم الحاج ؟؟ كلام الناس لا بيقدم ولا بيأخر و ولا

بيودى ولا بيجيب , لو سمعت لكلام الناس هيجبوك للوراء , عمرهم ابداً ما هيخلوك تتقدم

ولا خطوة حتى .

ملكش انت دعوة بيهم و شيل كلامهم ده من دماغك ولا يأثر فيك بكلمة واحدة , خليك

واثق فى ربنا طالما رجعتله و توبت إليه , لـــن يُضيعك ابدأ ابداً ... انت اللى على حـق يا

" على " ولا زم تثبت .. اتقفنا ؟؟

على : ربنا يستر :) , اهو الواد " عماد " جه اهو ..

عماد : هاااااااااااى يا شباب .. إيه الأخبار ؟؟

محمود : و عليكم السلام ورحمة الله و بركاته

عماد : ماله ده ؟! ^_^

محمود : مليش يا سيدى , بس كنت عايزك متقولش ( هااااااى ) دى تانى و تخليها سلام

عليكم احسن , حتى هتاخد 10 حسنات :)

عماد : امممم , ماشى اتفقنا :)

محمود : ها عامل إيه بقا ؟؟

عماد : ماشى الحال الحمد لله بس الصلاة لسة مش مواظب عليها اووى يعنى بجمع

صلاتين و يمكن تلاتة مع بعض !

محمود : لا إله إلا الله !! , ليه كده بس يا واد ؟؟ يعنى اجيب الفلكة ؟

عماد : ببقا نايم يا حودة و الله ..

محمود : النوم مش عذر ابداً لتضييع الصلاة , ما كلنا بننام هو انتى لوحدك اللى بتنام ؟؟

ظبط المنبه بتاعك على اوقات الصلاة و تصحى و تقاوم نفسك .. و بعدين انت لاااازم

تعاقب نفسك على فوات الصلاة ده , علشان تحرم تضيعها تانى ..

عماد : قولى اعمل إيه و انا إيدى على إيدك يا عم :)

محمود : انت معاك مصروف ؟

عماد : آه معايا 10 جنيه دلوقتى , لو عايزنى اسلفك .. بس هديهوملك عشرة و ترجعهم

15 إيه رأيك فى الصفقة دى ؟؟

محمود : نهااااااااااااااارك مش فايت , إيه اللى انت بتقوله ده يخربيت شيطانك ؟؟!

انت عملت الحكاية دى كام مرة ؟؟

ده رباااااااااااا و حرااااام ,

عماد : يالهووووى , يعنى انا فلوسى حرام و باكل حرام , الله يخربيت الشيطان ..

محمود : اوعى تعمل الحركة دى تانى لحسن والله هأدبك ..

عماد : حاضر يا عم خلااص توبة ... كنت عايز ال 10 جنيه فى ايه ؟؟

محمود : هاتها ..

عماد : اتفضل ..

محمود راح اداها للدادة اللى كانت فى الحوش و قالها غن دى من عماد .. فرحت اوى

و فضلت تدعى لهم ..

عماد : ايه اللى انت عملته ده !! ده تحويشة عمرى يا شيخ منك لله ..

محمود : ههههههه ماشى ادعى عليا ادعى ,, ده عقاب ليك علشان متأخرش الصلاة

تانى و كل مرة من ده بقا إنت متعدلتش :)

و بعدين إيه ال 10 جنيه اللى تحويشة عمرك دى .. اللى يشوفك يقول

عليك " رجل أعمال " يعنى

عماد : ده استايل بس يا عم , البرستيج بتاعى يعنى

محمود : ايوه ايوه , عارف انا البرستيج ده :)

على : انا كده عمرى ما هجمع صلاتين مع بعض , انا بقا تحويشة عمرى 7جنيه و نص :))

محمود : ههههههههه قال و انا اللى طمعان فيكوا تغدونى النهارده , لحسن اختى

مسافرة و شكلى هقضيها فول و طعمية

على : انت تؤمر والله يا حودة ,,, غداك عندى النهارده ,,

عماد : و بالنسبة لى يعنى , انا اللى طلعت من قعر القفة

على : يا سيدى انت و هو على دماغى من فوق و هنتغدى كلنا عندى النهارده ان شاء

الله :)

محمود : ربنا يكرمك يا على ياارب ^^




و نكمل الحلقة الجاية إن شاء الله , و هنشوف إيه اللى هيحصل مع " فوزية " !.


.................................................. .................................................. ............................


( الحلقة الحادية عشر )




المشهد الأول ..

ام سامح : ازيك يا ام على ؟؟ عاملة ايه ياختى وحشاانى والله :)

ام على : الحمد لله ماشى الحال , ازيك انتى ؟؟

ام سامح : نحمده على كل حال .. إلا هى فوزية فين ؟؟

ام على : فوزية خرجت راحت الدرس !

ام سامح : و بترجع امتى ؟؟ و هى خرجت مع مين ؟؟

ام على : ايه الأسئلة الغريبة دى يا ام سامح ؟؟ فى ايه هاتى من الآخر انتى عرفانى

مبحبش اللف و الدوران !!

ام سامح : بصى بقا انتى صاحبتى و حبيبتى و جارتى من زمان وا للى يمسك يمسنى

و اللى يضرك يضرنى , شوفى بقالنا جيران اد ايييه ؟؟ فلو واحدة فينا شافت اللى يضر

التانية اكيد مش هتتردد تقولها ولا إيه رأيك ياختى ؟؟

ام على : اكييد طبعاً يا ام سامح .. فى ايه بس قلقتيينى ؟؟

ام سامح : بصراحة ربنا كده .. ابنى سامح من يومين شاف فوزية و هى ماشية مع ولد

كده و ماشيين مع بعض و حتى كان ماسك ايدها !!

ام على : ايه اللى انتى بتقوليه ده يا ام سامح ؟؟ انا بنتى تعمل كـــــــــــــده !!

انتى يا ست انتى بتفترى علينا و جاية ترمى بلاويكى علينا ولا ايه ؟؟ و انا اللى بقول

عليكى صاحبتى و حبيبتى !!

ام سامح : لا إله إلا الله ؟؟؟ و انا هفترى عليكى ليه يكونش بينى و بيك تار و انا معرفش !!

بقا انا خايفة عليكى و على سمعة بنتك اللى قريب هتبقا على سيرة كل لسان و جاية

احذرك و اقولك عشان تحوطى عليها قبل ما الفاس تقع فى الراس تقومى انتى داخلة

فيا شمال كده ؟؟ مكنش العشم يا ام على !!


ام على : فاس إييييييييه ؟؟ و راس اييييه ؟؟ انا بنتى تعمل كده !! ده انا مربياها احسن تربية !!

ام سامح : حوطى عليها زى ما قولتلك , و عموماً انا مش زعلانة منك عشان عارفة انك

متعصبة , يلاا فوتك بعافية ..



ام سامح مشيت من هنا , و ام على دماغها لفت من هنا , حست ان تعبها فى بنتها

رااااااح ان بنتها حطت راسها فى التراب , مبقتش عارفة تعمل ايييه ؟؟

تقول للحاج اللى تعبان و عندجه القلب و لو عرف حاجة زى دى الله اعلم ممكن يروح

فيها ؟!! ولا تقول ل " على " اللى برضو لو عرف مش هيسكت على " فوزية "





و فجــــــــــــــــــأة ..


الحاج دخل من باب البيت و قفله وراه جااامد جداً ..

الحاج : انا سمعت كل كلمة قالتها الست ام سامح !! انتى السبب فى ده كــله .. انتى

السبب فى ضياع البنت و فساد أخلاقها !! انتى السبب فى كل مصيبة فى حياتنا ..


الأمهات كلها بتبقا حنينة على اولادها و انتى طول عمرك قاسية عليهم .. شتيمة و ضرب

و عدم ثقة لحد اما العيال طهقوا و زهقوا و قرفوا من عيشتهم ..


ملقوش الحضن الحنين اللى يلجأوا ليه فى شدتهم , ملقوش الكلمة الطيبة اللى يداووا


بيها محنتهم .. ملقوش الأم اللى لازم يلاقوها فاتحة دراعها ليهم .....


ام على : انت جاى تلومنى دلوقتى ؟؟؟ هو انا لوحدى اللى خلفت العيال دى ؟؟

هو انت

مش ابوهم , و لا انا هشتغل ورديتين .. هبقا الام و الأب فى نفس الوقت ..


انت هترمى كل الحمل عليا .. و انت ملاك مرتكبتش اى خطأ فى حقهم ؟؟


طول عمرك فاكر ان دور الأب بينتهى بمجرد انه يدى ست البيت المصروف اول الشهر ,

اقصد الشغالة مش ست البيت !!

نسيت ان الأولاد محتاجينك زى ما محتاجينى ,, محتاجين اب يحن عليهم وقت اما اقسو

انا عليهم , محتاجين اب يقسو عليهم وقت ما احن عليهم .. عمر ما كان فى توازن فى

حياتنا .. عمرنا ما كنا متفاهمين ,, و انت السبب !! مش انا لوحدى ..


الحاج : انتى عاوزة ايييييه اكتر من بيت عايشة فيه و مصروف اول كل شهر ولا بخليكوا

تتحوجوا لحد ولا تمدوا اديكم لحد , يبقا ده جزاتى فى الآخر ... انا دلوقتى المقصر و الأب

القاسى اللى العيال بيخافوا منه ؟؟

ام على : انت طول عمرك بتعاملنا على اننا زى الكرسى ده .. حتة جماد من غير إحساس !!!

فاكر ان كل المطلوب منك مجرد الفلوس و بس ؟؟

لييييييييه يا شيخ ؟؟ حرااام عليك بقااااا , اتقى الله فيا .. عايشة معاك ومستحملة

اسلوبك الغلط فى غلط و جاى فى الآخر ترمى كـــل حاجة عليا انا !!!

انا عمرى ما اتكلمت معاك ولا كنت بفتح بؤى بكلمه , كنت خايفة على صحتك .. خايفة

عليك لتروح منى ! و انت مفيش اى احساس ولا مراعاة لشعورى ؟؟


عمرى ما حسيت انك بتعاملنى كإنسانة !! ولا حتى اولادك .. طول عمرهم يشتكولى


منك !! انهم محسوش قبل كده إنك ( أبـــــوهم )


طب انا اعمل ايييييه ؟؟ قولى اعمل ايييه ؟؟

لو انت مكانى و عليك الهم ده كله هتعمل ايه ؟؟

ازاى هجمع ما بين حنية الام و شدة الأب فى نفس الوقت ؟؟

ما اكيييد حاجة من الأتنين هتغلب عليا !!

انت طول عمرك فاكر إنك صح .. و احنا غلط ..

عايش لسة فى أيام " سى السيد " اللى مبيغلطش ابداً , كل اللى حواليه يغلطوا إلا هو ..

الحاج : دلوقتى بقيت انا اللى وحش !!

دلوقتى انا اللى ضيعت العيال ؟؟

الكلام دلوقتى مفيش منه فايدة خلاااص !!

المهم اننا ننقذ اولادنا من المجتمع اللى بقا كل حاجة فيه خطر ..


فوزية ........

انا هشوفلى صرفة معاها , انا هأدبها بطريقتى , انا همشيها على العجين متلغبطوش ..

ام على : هتستعمل الشدة تاااااانى ؟؟

طول عمرك بتستعمل الشدة مع " على" ,, و تقول انك عايز تخليه راااجل ملوى هدومه ,

عمرك ما فهمته الصح فين و الغلط فين , بس لما كان بيغلط كنت بتديله على قفاه ..

عمرى ما شوفتك حنين عليه ابداً و اهى آخرتها انه وصل لطريق الإدمان , بس لولا ستر

ربنا كان زمان ابننا ضااع ..

لسة عايز تستعمل الشدة مع فوزية ؟؟


عايز البنت تطفش مننا و منعرفلهاش طريق ؟؟


الحاج : اومال عوزانى اعمل ايه يعىن اطبطب عليها و اخدها فى حضنى و اقولها


معلش يا بنتى سامحينى حقك عليا ؟؟؟


ام على : هو يا كده يا كده ؟؟؟ معندكش وسط خاالص ؟؟

الحاج : فهميينى عايزة توصلى لإيه ؟؟


ام على : سيبلى انا الموضوع ده ! انا هتصرف معاها ..




و نكمل الحلقة الجاية ان شاء الله :)



توقيع The_Mask :
لا اله الا انت سبحانك انى كنت من الظالمين


ردد هذا الدعاء :

لا اله الا الله وحده لا شريك له الملك و له الحمد و هو على كل شئ قدير





اللهم اصلح حال اهل مصر و اهلها يارب !!

اللهم ارزقنا حسن الختامه !!

اللهم اجعلنا من اصحاب الجنة دون سابق عذاب !!


رد مع اقتباس