فين يا أمى الكوتشى الأبيض
والتيشرت اللى بخطين
يلا ياما عايز ألحق
كرسى فى التالتة يمين
مالك بس قلقانة ليه؟
والله هما يادوب ساعتين
آه يا أمى نسيت أقولك
حتى لو اتأخرت عنك
بلاش تقولى ابنى فين
- عدت ساعة..لا ساعتين..والله أكتر
قوم يا راجل شوف الواد
أنا عايزة أعرف إبنى فين؟!!
_ابنك يا أمى طالع ع السما السابعة
رايح لجنة ربنا
قاعد فى أول صف
وإنتوا اللى قاعدين ورا
بلاش يا أمى تدمعى
وبلاش كمان النظرة دى
النظرة دى محيرة ..
- طب قوللى يابنى
مُت ليه
معلش قوللى اللى جري؟
_ سامحينى ياما
أنا مُت غدر
قال إيه يا ستى
مكانش معايا تذكرة !!