سؤال عايز رد عليه بوضوح ..

[Al.Qanas]

السلام عليكم ورحمة الله وبركاتة ..

ازيكم يا رجاله .. واحشنى والله جدا :)

حصل معايا موقف النهاردة كدة حبيت اسمع تعليقكم عليه يعنى :)
الموضوع بخصوص الجيلد عندى.
هقولكم اللى حصل بالظبط وهقولكم وجهة نظرى اللى انا بتصرف بيها وفى الاخر اسمع تعليقكم انتوا بقى :)

هو اللى حصل ان فيه ناس صحابى واغلبهم اصدقائى فى الحقيقة مش من اللعبة يعنى .. كانوا عايزين يدخلوا الجيلد عندى والكلام دة من فترة وقولتلهم الجيلد كان مليان وكدة واستنوا شوية . وطلبوا يدخلوا الجيلد تانى

قومت شوفت الناس اللى مش بتدخل بقالها فترة . وفترة دى يعنى شهر مثلا مش يومين ولا اسبوع حتى وعملت بان ل 6 من الجيلد فى يوم واحد ودخل مكانهم فى نفس اللحظة 6 صحابى.

اللى عملت ليهم بان مش بيدخلوا بقالهم فترة تتعدى الشهر كمان ويمكن احيانا يدخلوا مرة كل اسبوع او مرة كل 5 ايام لمدة مفيش ساعة ويخرجوا وطبعا متوقفين عن التلفيل وعن الحروب وعن كل حاجة.

اول ناس اتعمل ليهم بان كانوا ليفيلات 98-97-95-90 ودول مش بعتلهم اى حاجة ولا اى كلام من دة
كمان كان ضمن الناس اللى مش بتدخل هو واحد مصرى يعنى ومعايا فى الجيلد واضطريت انى ادخل حد مكانة لان باقى الجيلد اما كله اكتيف اما الباقى مثلا مدخلوش بقالهم اسبوع او اقل مثلا مش ينفع اعملهم بان من غير ما استنى يعنى اشوف هيدخلوا تانى ولا هيبطلوا لعب ولا اية . لكن اللى اتعمل ليهم بان امبارح كلهم كانوا تقريبا تعدوا فترة شهر مش بيدخلوا الا قليل جدا .

الوحيد اللى بعتلة رساله هو اللى انا بتكلم عليه . وعلى فكرة انا عملت بان للناس اللى ليفل 98 قبل ما اعمله والله
المهم دخلت واحد مكانة وبعتله رساله بكل وضوح
فيها انا قولتله يا باشا انا دخلت الجيلد مكانك لان فيه كذا وكذا وكذا وصحابى زعلانين وعايزين يدخلوا الجيلد وانت النت عندك مش مظبوط .
فلما تظبط النت وتدخل تانى ياريت تكلمنى وانا هدخلك تانى ومكانك محفوظ وياريت تقدر موقفى .

هو مقدرش موقفى ودخل النهاردة بالصدفة وكلمنى قالى شكرا على البان وحاولت افهمة وقولتله نفس الكلام تانى لكن هو مصمم على اللى فى دماغه وطبعا دة حقة يعنى.

انا شرحتلكم انا ليه دخلت ناس مكانة
احب ازود بقى
ان المفروض ان اى واحد بيعمل جيلد فى اللعبة انه يكون مهتم بيه ..
يعنى انا لو همشى بالنظام اللى هو عايزة انى مش اعمل بان او ادخل حد اكتيف مكان حد مش اكتيف
دة معناه ان ممكن يجى عليا يوم فى الجيلد ابقى اونلاين لوحدى .. طيب انا عامل الجيلد ليه
هيقولى دى لعبة واحنا مصريين زى بعض والكلام دة .. يبقى مينفعش انا اعمل جيلد . انا ادخل جيلد بقى وابقى زيي زيك
لكن انا لما عملت الجيلد عملتلة علشان يبقى جيلد جامد ويعمل اى انجاز فى السيرفر
وفى الاول والاخر الجيلد 95% منه مصريين والباقى اصدقائى جدا وناس فعلا محترمة اوى
مش ينفع بعد ما عليت الجيلد وتعبت معاه كل دة يبقى اهدمة تانى .. ولا اية ؟؟

انا مش عملتله بان وهو اكتيف يعنى
وكمان انا قولتله مكانك محفوظ وانا فعلا قد كلمتى
وكمان معلش هو مش مستفيد حاجة وهو اصلا بعيد عن اللعبة ومش بيدخل
وانا عمرى ما دورت على الاستفادة من الناس والا كنت عملت بان للناس اللى ليفل 80 اللى اكتيف ودخلت مكانهم 90+ ودى بسيطة جدا
بس انا مينفعش اعمل بان من غير سبب.

فهل دلوقتى حاجة تزعل انى ادخل واحد اكتيف مكان واحد مش اكتيف
مع العلم انى قولت كلمة وانا قدها وهيا انك يوم ما تبقى اكتيف انا هتصرف وهتبقى فى الجيلد تانى
ولا هو الواحد يكره للواحد انه يعلى الجيلد بتاعة ويوم ما يرجعة يلاقية اجمد واحسن

لو فعلا حد كان ماستر جيلد وجرب اى موضوع يشبه دة او مر بفترة ان الجيلد بتاعة مكنش اكتيف هيحس انه فعلا معملش حاجة طول لعبة للجيم لما يبنى حاجة وفى الاخر تتهد
هو مش دة اللى هيهد الجيلد ... بس لو كل الناس جالها ظروف وبقت مش اكتيف هو دة اللى هيهد الجيلد

هل انا غلط كدة ؟؟
انا عملت حل وسط
علشان مش ازعل صحابى اللى عايزين يدخلوا الجيلد
ولا زعلت اللى عملتله بان مع انه مش مستفاد وهو بعيد عن اللعبة .. وقولتله هتدخل الجيلد تانى يوم ما ترجع

تشبيه اخير بقى
الجيلد دة زى فريق الكورة بالظبط ..
كله بيلعب مع بعضة وفيه صداقة وكل حاجة علشان يعلوا الفريق دة
تقتكروا يوم ما لعيب اساسى هيصاب واصابتة طولت .. هيلعبوا ناقصين ولا هينزلوا لعيب احتياطى ؟!

ياريت بقى تعليق ع الكلام دة :)
وسورى طولت فى الموضوع اوى بس كان لازم اشرح كل حاجة بالظبط

سلام :)