قصيده المزبور للشاعر / غالي المزبورالبناقي

[الحرافيش]

بسم الله الرحمن الرحيم

هذه القصيد في جبل يسمى المزبور بالفاج وبعد قحط وقلة الامطار
ترك اهل الفاج ديارهم وذهبو الى منطقه تسمى منجوره
واحب الشاعر ان يترجم شعوره في هذه الابيات

امس الضحى نطيت انا راس مزبور
جالٍ براس الفاج تتعب مراقيه
هاض القريح وقمت اسجل على سطور
مثايلٍ من راس فكري منقيه
شكيت له همي وباشكي له الجور
باح الكمين وبين اليوم خافيه
يارجم خبرني بسكانة الدور
هذي منازلهم وهذي مفاليه
اشوف مابين به اليوم مظهور
ولبانت مبانيهم على راس عاليه
ماشوف طرش ولابعد نسمع نجور
حتى وجار البيت تذري سوافيه
قال ربعك شيَلو يم منجور
يتلون نوٍ ربَعت يم شرقيه
اقفت مواترهم قبل فجة النور
والفاج شانت يالبناخي مواريه
ناسٍ لهم بالطيب منهج ودستور
يشهد لهم ماض الزمان وتواليه
وقت الملاقى علمهم دوم مذكور
هذا ولد عمٍ وهذا بناخيه
الشمس غابت وانا اقفيت مقهور
مالي جدا ياكود دعوه لواليه
يالله يامنزل على عبدك النور
مدعيه للمسلم دليلاً يقديه
ترسل سحابٍ على الفاج مامور
سيلاً تخالط به شعيب ومساقيه
وعقب الكدر يصبح البال مسرور
ووبشوف ربعه ياعسى الله يهنيه
وبالختم يالله ياعزيز وياغفور
تزيل عن قلبي هموم وبلاويه

الشاعر / غالي المزبورالبناقي