ســتـــوديــو "الرياضة للابد " وتـحـلـيـل مـبـاراه مـصـر وجـنـوب أفـريـقـيـا

[Un_Wanted]

سيداتى انساتى سادتى يسعدى من موقعى هذا اننا نعمل ستوديو تحليلى للمباراه "أى كلام" أه عشان بس الناس متخشش فيا شمال وتقولى كوره ايه وبتاع ايه الماتش مش مهم يا شباب ها
يسعدنا من اسكندريه يعنى بين شطين وميا عشقتكم عينيا يا اهل اسكندريه يا غاليين عليا "سامع واحد بيقولى انجز يا عم " معلش اصلى بحبها اوى الاغنيه

المهم هنقدم لكم استوديو تحليلى على مدار اليوم ان شاء الله وطبعا احنا بنتحلى بقدر كبير من الشفافيه والديمقراطيه والحياديه وعشان كده لازم نوزن طرفى معادله الاستوديو

هيبقى معانا واحد مقدم البرنامج اللى هو انا طبعا بعد ما عملنا استفتاء نزيه واختارونى

وهيبقى فيه جانب من الاعضاء بيمثلو الجانب المصرى والجانب الاخر بيمثل الجانب الجنوب افريقى وطبعا لقله عدد الاعضاء اللى هم من جنوب افريقيا ففيه حل من اتنين

يا اما نروح السفاره الجنوبيه الافريقيه ونجيب واحد ونعينه مشرف على اى قسم النهارده عشان يشارك معانا ويمثل الجانب الجنوبى اقريقى يا اما اى عضو اسمرانى يعمل نفسه من جنوب افريقيا ويمثل الجانب الجنوبى افريقى

طبعا فى الاستوديو هنا هنستعين بمحللين كبار جداا زى الكابتن الكبير مصطفى دامنا اللى لسه ماضى للريال امبارح ولذلك طبعا بيعد اقوى اضافه لفريق البرسا لأنه هيضمن شلل تام فى هجوم الريال ده طبعا عشان الكابتن مش بيتأقلم بسرعه على الاجواء الاوربيه لأننا عارفين طبعا انه صاحب مشوار احترافى كبير جداااا من بلديه المحله لمركز شباب ميت غمر لنادى شباب الدقى واحترف فتره برضه فى مركز شباب شبرا

وهيكون معانا برضه عتاوله زى ماردونا النيل زيرو كول
و فاكهه الكره الديفيداويه ستر كوين والكابتن الكبير المعتزل بون بوني اللى كان خط نص مهاجم مركز شباب الديفيدى قبل ما يتألش لأنه مكنتش عاجباه سياسه المدير الفنى للديفيدى وطبعا استوديو هام زى ده ميخلاش من فيلسوف التحليل الكابتن ياسر وهنرحب طبعا بأى مداخلات تليفونيه لأى عضو حابب يشارك بشرط ان المكالمه متتعداش ال15 ثانيه يعنى يدوبك يقول أسمه وشكرا
وبما اننا فى بلد ديمقراطى بحت مش مسموح للبنات انها تتكلم فى الكوره

نبدأ ع البركه

المباراه فى تمام ال8.05
تمانيه وخمسه يعنى ,, مش عارف انا لازمتها ايه الخمسه دى

القنوات الناقله ساعه الماتش ابقى افتحو ودور وانا لسه هقول ع القنوات

ونبدأ بالتشكيل المتوقع من العبد لله

عصام الحضرى

حسام غالى

فتح الله - - - - وائل جمعه

سيد معوض - - - - - - - - - - - - - - - أحمد المحمدى

حسنى عبد ربه (شوقى) - - - -أحمد فتحى

زيزو - - - - - بو تريكه

أحمد على

وطبعا هيبقى فيه ورقات رابحه هيتم الدفع بيها حسب سير الماتش

زى العالمى شيكا بالا وزى جدو واكيد هيتم الدفع بيه فى الدقيقه 76
ووليد سليمان واحمد سمير فرج

يلا نترك لكم المكروفون اللى عاوز يقول تشكيل مختلف واللى عاوز يقوله رأيه واللى عاوز يتوقع نتيجه

اعملو اللى نفسكم فيها واخر خمس ثوانى قبل الماتش يبقى ندى الجانب الجنوب افريقى حقه فى الكلام ونخليه يتكلم على فريق بلده عشان نبقى ادينا للجانب الخصم حقه برضه