الله يرحم لما كنتي ..... (ممنوع دخول البنات)

[((مهند))]

ليه فيه بعض البنات بيحبو يعيشو دور مش بتاعهم .. ان كنتى نسيتي أفكرك .

ملحوظة .. الموضوع للهزار وممنوع الزعل .

قال إيه ما تشربش العصير إلا لما يكون فيه شاليموه ... الله يرحم لما كنتي بتشربي العصير في القلة .

قال إيه ما تشربش الحاجة الساقعة إلا في كانز ... الله يرحم لما كنتي تروحى للبقال تقوليله هاتلي إزازة من السمرا (إللي هي البيبسي) .. وإزازة من الخضرا ( سفن أب )... والله يرحم لما كنتى بتدي للبقال كيس بلاستك وتقوليله عبّيلي بنص جنيه كاكولا .

قال إيه كل شوية تقول لخطيبها أنا شعري حرير ... الله يرحم لما والدتك كانت بتقص شعرك عشان تغسل بيه المواعين .

قال إيه ما تشيلش إلا شنطة ستايل ... الله يرحم لما كنتي بتكعوري النص جنيه في إيدك وتفضلي كل شوية تبصي على إيدك عشان تتأكدي إن النص جنيه لسه موجود .

قال إيه متعدش إلا علي اللاب بتاعها ... الله يرحم لما كنتي بتحجزي دورك على الكمبيوتر بتاع أخوكي الكبير قبلها بأسبوع.

قال إيه متتكلمش إلا من البلاك بيري ... الله يرحم لما كنتى بتمشى باللاسلكي أبو أنتنه .
قال إيه متصيّفش إلا في الساحل الشمالي ... الله يرحم لما كنتى بتاخدي معاكي الشمسية وتحطيها أدام أي ماسورة ميه ضاربه في الشارع وتقضّيها .


قال إيه متلبسش شوز إلا لما يكون ماركة ... الله يرحم لما كنتي بتلبسي البلغة بتاعة جدك على إنها صابوه ... والله يرحم لما كنتي بتلبسي الشراب فوق الجزمة عشان متت***ش .
قال إيه متتكلمش إلا بالإنجلش ... الله يرحم لما كان كل اللى تعرفيه عن الإنجليزي ( هاو أر يو .. نحمدوه ) .. والله يرحم لما كان حد يقولك جود مورنينج كنت تقوليله أهو إنت يا سافل يا قليل الأدب .

قال إيه معتبره كل الناس بلدي وبيئة ... الله يرحم لما كنتى بتلعبي في الحارة بتاعتكو مع نوسة تشرد و صفية قرن غزال .. والله يرحم لما كنتى مبتستحميش إلا تحت عربية الرش .. والله يرحم لما كانت أي عربية ملاكي تركن في شارعكو تتلمى عليها إنت وكل العيال المتشردة اللى في الشارع كإنكو شفتو طبق طاير .

قال إيه البت صوتها واطي ... الله يرحم لما كانت الناس في أمريكا مبيعرفوش ينامو من صوتك .

قال إيه البت رقيقة وبتسمع الكلام ... الله يرحم لما كانت والدتك تقولك اغسلي المواعين تصوتى وتجعري حرااام عليكو حراااام عليكو .. أنا مش قاعدالكو في البيت ده تاني وتروحي داخلة أوضتك ورازعة الباب وراكي ... أمال لو قالتلك تنضفى الشقة أكيد هيجيلك إنهيار عصبي .

كفاية كده ..