فلتر ابيض ولا فلتر اصفر !!

[WELFA]

سجاره دانهل من علبة كنت
جملة سعيد صالح المشهورة في مسرحية العيال كبرت

يا سلام هيه فين الدانهل وفين الكنت بتوع زمان دلوقتي ، دلوقتي ممكن تقول سجاره كوكو من علبة بؤس


لو انت من المدخنين انصحك تكمل قرايه في الموضوع ده ولو انت مش منهم يبقى اجري فورا لأن دمك هيتحرق وهيصعب عليك صحابك من المدخنين
(شوف بيدفعو كام كل يوم علشان الكيف)



انواع رديئة وانواع وسط وانواع فاخره
السجاير برضه انواع زيها زي اي حاجه في مصر ، زي البنزين زي الهدوم ده حتى زي المنتجات الغذائية في منها الشعبي (كلمة شعبي دايما عندنا مرتبطة بكلمة سيئ للغايه) ومنها النص نص ومنها الغالي

____________________________

النوع الشعبي – كليوبترا

السجارة الشعبيه رقم واحد في مصر تعرف ايضا بكوكو الضعيف واحيانا يطلق عليها خشباترا (لأن طعمها اقرب ما يكون للخشب وساعات بتلاقي فيها زعازيع خشبية – وساعات جذوع خشبيه) والسجارة دي هيه الاكثر مبيعا نظرا لرخص تمنها وهتلاقيها موجوده في اي حته (ساعات بيبيعوها في الاشارات المروريه). النوع ده بيتفرع لثلاثه او اربع انواع متفاوته في السعر ، بس بصراحة الانواع دي كلها متفرقش كتير عن بعض كلها متعبه للصدر (لو عينوني مدير تسويق للشركة هعمل عرض لو اشتريت 3 علب مع بعض تاخد زجاجة دواء حساسيه مجانا)


كوكو الضعيف هيه اشهر الانواع والاكثر شيوعا في مصر وساعات الشباب الفقري بيسميها خشبترا نظرا لنسبة الخشب والزعازيع فيها الي ممكن توصل حوالي 25% من كل سجاره ولو انت حظك كويس ممكن توصل لنسبة اقل ، انت وحظك وانت بتشتري علبة السجاير (معنى كده انه يستحسن متغامرش وتشتري اكتر من علبة واحده فقط في نفس الوقت ومن نفس الكشك لأن حظك ممكن يكون وحش وتقع في قرابيزك)

الطعم : في حالات قليلة تم تسجيل ان السجاره خفيفه وعادة بتحسن انك حاطط بقك في شكمان لوري.

الرائحة : السجارة دي ليها رائحة مميزة جدا ، لو واحد في الشارع هيميزها وساعات بتشم ريحة فحم بيتحرق وانت بتشربها ولو شميت ريحة شياط عادي انت بتشرب كوكو ، وفي حالات اخرى بتشم ريحة بانجو. خلي بالك ريحة السجارة دي زي الغرا بتلزق في الهدوم يعني لو انت من بتوع الحمام متشربش السجارة دي لأنك هتتفضح واي حد هيعرف انك شربت كوكو بعد اكتر من ساعه من طفيك للسجاره.

نصيحة لو انت عايز تشرب كوكو الضعيف : افرك السجاره قبل ما تشربها واضغط عليها علشان تعرف مكان الزعازيع ولو لقيت الزعازيع كتيره في الحالة دي حطها في العلبة تاني بس على جنب علشان لما واحد يقولك هات سجاره او جيت تعزم على حد تديهاله بدون تردد بدال ما نفسك يتقطع وواحد يجي حظه في سجاره حلوه وانت قاعد بتشد في وابور فحم.


____________________________


النوع المتوسط

زي السجاره الـ lm ، next ، viceroy (الاسماء المستوردة بس صناعه مصريه)

كلها قريبة الشبة مع بعضها بس نوعية التبغ احسن شويه ونسبة الخشب فيها شبه منعدمة عندك منها الخفيف وعندك التقيل شويه

الطعم : طعمها في معظم الاوقات مستقر (يعني العلبة كلها ممكن تكون نفس طعم السجارة)

الرائحة : مستني ايه اكيد برضه ريحة سجاير بس الكويس فيها ان الريحة مبتلزقش زي كوكو الضعيف


____________________________

النوع الغالي


زي المارلبورو والميريت والكينت (برضه اسماء مستوردة بس صناعه مصريه)

اغلب الناس الي بتجيب النوع ده من السجاير بيبقى علشان المنظره (انا بشرب سجاره من النوع الغالي) وفي ناس تانيه بتجيبها علشان هيه اتعوت عليها من زمان.

نوعية التبغ في السجارة دي ممتازة (من على وش القفص) نادرا لما بتلاقي فيها زعازيع بمعنى اصح النسبة شبه منعدمة

الطعم : ثابت يعني لو جبت كذا علبة هتلاقي نفس الطعم ، ممكن يفرق بسيط. انما في الميريت هتلاقي الطعم ثابت لو اشتريت قاروصتين وشبرتهم

الرائحة : خفيفة ودخان السجاير دي خفيف جدا ومش بيضايق حد مقارنة بكوكو الضعيف الي ممكن الناس تطفش وتسيبلك المكان بسبب سجارة كوكو بريئة.


____________________________


نصائح عامة للمدخنين :

أول واهم حاجه ان لو انت مدخن حاول تقلع عن التدخين فورا ، ولو انت مش مدخن احمد ربنا علشان

انت في نعمة في ناس كتير بتحسدك عليها.


انما لو انت مدخن يبقى امرك لله كمل قرايه

- اوعى تعمل مقارنه بين انواع السجاير وخصوصا بين المارلبورو و كوكو الضعيف لأنك لو بتشرب حاجه غاليه واضطريت تشتري كوكو مش هتعرف تشربها وهيجيلك كحة مستمرة (بس متقلقش هتروح بعد كام يوم بالكتير اسبوع)

- اثبت على نوع سجاير واحد وحدد البديل بتاعه لأن ساعات بتروح تشتري النوع الي انت بتشربه ومتلاقيهوش فا لازم يكون في بديل علشان متحتاسش او تضطر تشرب كوكو.

- بلاش النوعيه الشعبيه (كيكو) لأنك لما هتشتري العلبة ممكن يجيلك استبحس لما تشوف صورة الرئة الي همه حاطينها (تقريبا جابو مكنة طباعة الوان وبيورونا انهم متقدمين)

- اشرب الانواع الخفيفة علشان متضرش نفسك بزياده وخصوصا لو انت مدخن شره او من الي بيشربو استخسار.



وفي النهاية احب اقولك بطل يا عم القرف ده ، ربنا يتوب علينا وعليكم من الافة دي.

[MelodyTrix]

الموضوع بيتكلم عن حاجه تقرف انا الحمد لله مجربتهاش غير مره ( كانت lm ) و الحمد لله مشربتهاش تانى

بس الصراحه الموضوع منظم و تحفه و من افضل المواضيع القرتها

[DJ.FIGO]

برده مش هابطلها ابطلها و اعمل ايه

[! FiRe !]

يا واد يا معدى ^^
ههههههههههه

[steerforth]

المشاركة الأصلية كتبت بواسطة DJ.FIGO عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

برده مش هابطلها ابطلها و اعمل ايه

بطلها و كل جاتو او كل برتقان سكرى
انا الحمد لله ولا بتيجى فى دماغى حاتة

[k0len]

انضف نوع سجاير في العالم (الميريت الاصفر )

ازبل نوع سجاير في العالم (الكنت ) لأنها تبغ صناعي

[Hanamontana]

الحمد لله انا مبشربش سجاير خالص و لا حشيش حتا

[poiu]

الحمد لله ماليش فيها أصلا

[DEAD_OR_LIFE]

الحمدلله مش بدخن ولا انا ولا اصحابي
عشان كلنا فكرنا صح كل اما نسئل واحد بيدخن يقولك انا نفسي ابطل انا امنيت حياتي اني ابطل
احنا قولنا لية نبقي مكان الناس دية واحنا الحمدلله لسة علي البر واللي احنا فية في ناس مش لاقية وفي ناس بتحسدنا علية
الحمدلله علي دوام الصحة

[mizo82]

الحمدلله جربتها مره وحده بس كانت ميرت اصفر كنت فى العيد

انما دالوقتى الحمد لله مبتقش رحتها اصلا

[ThehoTLine]

هاقول اية موضوع من ضمن مواضيعك المميزة الى دايما بتعجب الناس

ع العموم الحمدلله لسة مجربتش ولا هجرب باذن الله

[Sun_tears]

شرب السجاير عته

[OkaFLaG]

الحمد لله انا مبشربش اى نوع من انواع السجاير

[Mysterious]

الحمد لله مبشربش سجاير ولا هشربها ان شاء الله:)

[YourMama]

الحمد لله انا بمارس رياضة والحمد لله فى حياتى ما حتطها فى بقى واحسن حاجة عشان تبطلها مارس الرياضة