المشاكل منتشرة لكن الحلول معانا

[_Nabil_]

بسم الله الرحمن الرحيم

السلام عليكم ورحمة الله وبركاته

أنا آسف يا جماعة على الغياب الطويل وعدم المشاركة بمواضيع جديدة فى المنتدى لكن انا للأسف فى (مزرطة الخلاط) كما قال الأديب (بوحة) ..
ايوة متستغربوش انا فى امتحانات الثانوية العامة (3ثانوى) .... مزرطة ولا مش مزرطة ؟
على العموم انا حخلص الاسبوع الجاى ان شاء الله فا ادعولى بالتوفيق ..
يلا ندخل فى الموضوع

سبحان الله يا جماعة على اللى بيحصل .... مشاكل كتير انتشرت والعلماء بيقعدو يألفو ويخترعو حلول وبتاع ومنها اللى بينجح ومنها اللى مش بينجح ومنها اللى بينجح بشروط ومنها اللى يقولك طريقة استعمالها كذا ...........


لكن فى حلول كتير موجودة فى ديننا احنا مش واخدين بالنا منها بالرغم من بساطتها الشديدة وتوافرها .. يلا بينا نبدأ


كتير بيشتكى من ضعف النظر

وآلام فى العين ويروح لحكيم عيون وبتاع ويكتبلو على قطرة ويقوله خدها 3 مرات فى اليوم وخلى بالك لا القطر يعاكسها منك والكلام ده كله ^^
انتو تعرفو ان مجرد النظر فى المصحف ...... علاج للعين وضعف النظر
مين فينا معندهوش مصحف ؟!

تجاعيد الوجه
كتير من الناس (بالذات النساء) بيشتكو من التجاعيد اللى فى وشهم خصوصا مع تقدم سنهم ويقعدو يحطو فى مساحيق تجميل وبتاع وايريال وبرسيل وتايد للغسيل مفيش مستحيل و ......
الحل بسيط ^^ الابتسامة .......
انت تعرف انك لما تبتسم بتحرك فى وشك 30 عضلة وبتساعد ان ميحصلش تجاعيد فى وشك حتى مع تقدم سنك ..
فعلا والله.. الحل فى 5 كلمات قالهم حبيبنا -صلى الله عليه وسلم- :"تبسمك فى وجه أخيك صدقة"

مين فينا مش بيعرف يبتسم ؟!

حب الشبـــــــــــــــــــــاب
الكابوس اللى بيواجه معظم الشباب واللى كله بيبقى ناعى همه و ......
والله يا جماعة كنت بسمع كلام عجيب عن علاج حب الشباب ده ... كان قرايبى(الشباب) يقعدو يتكلمو مع بعض فى الموضوع ده ...
ألاقى واحدة بتقول (حط بصل على وشك,مفعوله حلو) .. التانى يرد عليها يقولها (مش البصل بيهيج ) بيهيج !!!!!!!! ايوة ايوة بيهيج الحبوب يعنى ويخليها تحمر(وبعدين فى الناس اللى نيتها وحشة)
وواحد تانى يقول حط ماسك مش عارف ايه وواحد تالت يقول حط زبادى وخيار (بس يكون زبادى خلاط) ايوة عشان بطعم الكاتشب ^^ وخد بالك ... لازم يكون كاتشب هاينز عشان هو ده (الكاتشب الرسمى) للمنتخب ..
وبالمرة نحط مكرونة عشان تبقى الوجبة كاملة و..... ما علينا
الحل بسيط يا جماعة .... البعد عن المثيرات الجنسية والمحافظة على الوضوء ..
واللـــــــــــــــه بتخلى وشك ينور من غير ماتحط اى تحابيش من اللى قلناها فوق دى
وأظن انكو عارفين ان ياما الرسول عليه الصلاة والسلام حذرنا من الشهوات ونصحنا بتجديد الوضوء ..

الصداع .... ومشاكل الدماغ
أولا طبعا مفيش حد مننا مش بيتفرج على التليفزيون ... ده لو فى حد مش بيتفرج على التليفزيون أكيد بيقعد أدام الكمبيوتر ويدخل على سيلك رود فور عرب و ....
لو محدش بيعمل كده ولا كده أكيد بيتكلم فى الموبايل او بيقعد جمب حد بيتكلم فى الموبايل و ..... من الآخر أكيد كلو عندو أجهزة كهربائية ولاسلكية والكلام ده كله ..
الأجهزة دى بيصدر منها اشعاعات وموجات احنا مش بنشوفها ... الموجات دى بتنتشر فى المكان اللى الحاجات دى محطوطة فيه وطبعا بتدخل جسمنا وتراكمها بيسبب أضرار فظيعة زى الصداع ومشتقاته ...
انتو تعرفو ان السجود فى الصلاة هو أفضل وسيلة للتخلص من الاشعاعات والشحنات والموجات دى ... لان الحاجات دى بتتجمع فى الجبهة(نقطة التقاء الرأس مع الأرض أثناء السجود) زائد ان الأرض موصل جيد للكهرباء .. فا وانت بتسجد كل الشحنات دى بتتنقل من جسمك عن طريق دماغك وتوصل للأرض فبالتالى جسمك بيتخلص منها وبيتخلص من الأمراض اللى ممكن الحاجات دى تسبها ... سبحان الله والحمد لله

آلام البطن ..... والمعدة
طبعا فى ناس كتير بتاكل وتنام .... وفى ناس تانية بتنام على جمبها الشمال وفى ناس بتنام على بطنها وهما مش حاسين باللى بيحصل ....
الرسول عليه الصلاة والسلام نصحنا بإننا ننام على جمبنا اليمين .. طبعا احنا بنسمع الكلام وننفذه لكن شوفو الحكمة ....
أولا من ضمن الأسباب اللى بتسبب آلام فى البطن والمعدة هو النوم بعد الأكل على طول .. طب ليــــــــه ؟؟
عشان لما بيكون الانسان نايم .. جسمه كله بيكون فى وضع راحة والأجهزة بتاخد راحتها وبتأدى وظيفتها بصورة أقل بما فيهم الجهاز الهضمى ..
المعدة بتكون محتاجة راحة فا بتحاول ترتاح لما انت تنام لكن انت لما تكون لسة واكل وتنام على طول بتجهدها لانها بتحاول تهضم الأكل اللى انت لسة واكله زائد انها بتحاول ترتاح فى وضع النوم فا مش بتهضم الأكل كويس فا تعالو نشوف الحكمة ...
النوم على البطن هو نومة أهل جهنم .. فا حرام ننام على بطننا
لما بيكون الواحد لسة واكل وينام على بطنه .. بيكون ضاغط على معدته اللى بيكون فيها الأكل وبتحاول تهضمه فا ده بيجهدها وبيبطأ عملية الهضم وبيسبب (عسر الهضم)
طب افرض واحد متعود انه ينام بعد الأكل ؟؟
ماشى .. لو الشخص ده نام على جمبه الشمال بيكون ضاغط على المعدة لان المعدة موجودة ناحية الشمال فى البطن فا برضو بيصعب عملية الهضم لكن شوفو بقى النوم على الجمب اليمين ..
أولا مش بيضغط على المعدة فا مش بيسبب الأوجاع بتاعة المعدة ..
ثانيا لو حد كان لسة واكل ونام على جمبه اليمين .. الوضع ده بيخلى الجهاز الهضمى مفصول تقريبا عن بقية أجهزة الجسم فا مش بيكون مرتاح زى بقية الأجهزة وده بيساعد انه يؤدى وظيفته بصورة أحسن ويهضم الأكل هضم صحيح ..سبحان الله


الأغانى
حدث ولاحرج ... إدمـــــــــان والله العظيم ...و ... الكلام عن الأغانى مش بيخلص
كتير بيعشق الأغانى وكتير بيستنى المغنى الفلانى ينزل الألبوم الفلانى وعلى طول تلاقى الكاسيت أو الكمبيوتر أو حتى الmp4 على طول شغال أغانى و ...و ..و ...
طبعا مفيش حد يقدر ينكر انها حرام .. بس مش هى دى المشكلة
المشكلة ان الناس مش مقتنعة هى ليه حرام
أنا والله كنت من أكتر الناس اللى مستغربة من الموضوع ده .. أنا كنت مقتنع انها حرام وكان عندى أدلة تثبت انها حرام وبسمعها وانا عارف انها حرام لكن كان نفسى أعرف السبب ...
يعنى مثلا : ليه السجاير حرام ؟؟ أكيد مش غلاسة يعنى
حرام لانها مضرة ... بتضر جسمك وبتضيع فلوسك وبتعكر مزاجك و ...و ...و... أضرار مش بتخلص ..... طب ليه الأغانى حرام ؟؟؟؟؟؟
قعدت اسأل فى الموضوع ده كتير ومحدش عطانى أى اجابة مقنعة لحد ماعرفت حاجة خطيرة .... اسمعو بقى اللى سمعته ..
بيقولو ان فى دراسات وأبحاث علمية أثبتت ضرر الأغانى على الجنيـــــــــــن
يعنى لو واحدة حامل وبتسمع أغانى ... ابنها وهو فى بطنها بيتضر ..
مابالك هى نفسها وما بالك انت نفسك ؟؟
بل دول اكتشفو كمان ان الست الحامل اللى بتسمع قرآن .. فا ده بيساعد ان ابنها يحفظ القرآن لما يكبر وبيحفظه بسرعة ... فا سبحان الله

ومهما أتكلم فى الموضوع ده الكلام مش حيخلص ... الله أعلم حيكتشفو ايه تانى ؟
عرفتو بقى ان ديننا كامل ومش سايب حاجة إلا وعالجهالنا

وفى النهاية أتمنى ان يكون الموضوع عجبكو ويارب مكونش طولت عليكو وطالب منكو انكو تدعو لكل طلاب المسلمين بالتوفيق


من مواضيعى

الشتيمة عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]
تفسير ظاهرة فى حياتنا عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]