فى مصر ... أعمل اللى انت عايزه و بعدين اعتذر

[copra]

اللى انا هقوله ده مش عارفة بيدل على ايه
هل بيدل على طيبه الشعب المصرى ولا على فهلوة اللى بيغلط

تبقى ماشى فى أمان الله بعربيتك
واحد ييجى يمشى من جنبك بأقصى سرعة
و يزنق عليك و هو قاصد
تروح قارص بنزين و جاى جنبه
و لسه هتفتح بقك عشان تسمعه اللى فيه القسمة
يروح الاستاذ رافع ايده ..... و يقولك آسف

يعتذر

تقوم انت حاطت لسانك فى بقك و تسكت
و احتمال تبتسم له كمان
مع انك هتطق من الغيظ

البنت تبقى ماشيه فى حالها
يطلع واحد اغلس من الاسرائيلى على حدود رفح
يعاكس متردش
يقول نكت بايخة نفسها تغم عليها
يمشى جنبها تعدى الناحيه التانية
يروح وراها .... بس ستوب بقى
تلقف و تلف و تسمعه اللى فيه النصيب
يتلموا الناس و كل اللى عنده يقولها
و اللى حران يطلع زهقه عليه
و البنت تصمم توديه القسم عشان يتعلم الادب
و الاستاذ بعد ما كان عامل فيها السبع رجاله فى بعض

يعتذر

هوب اللمة تتفض و البنت تتكسف و تمشى
و الاستاذ يطلع منها بكلمة أسف
و البنت تبقى هتفرقع من جنابها بس تقبل اعتذاره و تمشى

تيجى بقى لواحده ست كبيرة واقفه فى الطابور عشان تدفع فاتورة التليفون
تقوم واحده تانيه كلها صحه و حيويه
تقوم مدياها كتف قانونى و تقف قدامها أصلها هتسال على حاجه
و تسوق الغتاته على التلامة و تفضل واقفة
الست تقولها يا حاجه مش قادرة اقف
يا ستى اقفى فى الطابور مش كده
الست الدم يضرب فى نافوخها و تقول ما بدهاش
يبتدى صوتها يعلى و الناس تلوم الست الرخمه اللى خدت دور مش دورها
تقوم الست الرخمه تبتدى مشهد تمثيلى
آآآه مخدتش حباية الضغط... حرام عليكم ده انا صاحبة مرض
خلاص يا ستى حقك عليا انا اسفة
تلاقى الست الكبيرة سكتت و يمكن تدافع عنها
و فى الاخر هتاخد الدور اللى مش دورها و جواها ابتسامة انتصار

يا ترى دى طيبه زياده من الناس اللى بتسامح
مع ان اللى عمل المواقف دى كلها قاصد مش عمل الحاجه دى بالخطأ مثلا
و مع ان الشخص ده هيعمل نفس اللى عمله مرة و اتنين و تلاته
معاك و مع 100 غيرك و كل مرة هيسوق الغتاته
و بعدين ببساطة

يعتذر


نسامح و نبقى طيبين ولا نقف و نقول لا و نبقى ايجابيين؟

حصل معاك موقف زى كده؟
طيب اتصرفت ازاى؟
و المرة الجايه هتعمل ايه؟