عادات اهل جدة و مكة في الاكل

[zapoza]

طبعا انا جداوي ^_^ فحبيت اجبلكم العادات تبعتنا ... (( جدة مدينة تبعد عن مكة 80كيلو ^_^ بالعربي كل اسبوع و احنا مسويين عمرة ))


عادات أهل جده و مكة






أقروا الموضوع ومخمخو.. وبعدين قولوا رأيكم عن هادي العادات.






طيب يا سيدي إنتَ وهو .. والكلام للجميع:

الأكلات المكاوية و الجداويه ترتبط بعادات ومناسبات يعني كل اكلة ولها مناسبة..



زي أيش ؟؟؟

هيا خدو عندكم .....

الرز بحمبص والسقط والمعرق أو المختوم والششني هادي الأكلات خاصة بالعزا :ghost1: :ghost1:

وزيادة في التوضيح

اليوم الأول والتاني يطبخو الرز البحمبص واليوم التالت اللي يسموه قطع العزا يسوو الششني والمعرق والمختوم والسقط

_______________________

الكابلي أو الزربيان والسمبوسك والطورمبة هادي يسووها وقت المناسبات والأفراح للرجال


أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال بس يسوو قليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتقان او الموز تسوي صينية علشان يحلو بيها .. بعدين جانا الميز والشغلات الجديدة هادي.

___________________________

المعدوس ( الرز عدس ) هادا يسووه المكاكوة يوم الغيم والمطر ومعاه روبيان مكشن بالقوطة والبصل والفلفل الأخضر وزلطة حُمَر (( اكثر شئ احبة الحمر ))


وكيف لو كنا ساكنين في بلاد الخواجات .. على كدة كل يوم معدوس ألين البطن تسير زي الطبلة .

________________________

الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع

_____________________________

الحليب أبو الهيل(قهوة حلوة) هادا برضو كمانة ينشرب في صبحية أول يوم في السنة الهجرية الجديدة

_________________________

السليق هادا يسووه في المناسبات لمن يكون الجو باااااااااااااااااارد

__________________________

الدبيازة معروفة على ما أعتقد للجميع يسووها للفطور أول يوم العيد (( احبها موووووت ))

___________________________

المعمول والغريبة يسووها في أيام الحج

_______________________________

السمك مايتاكل إلا في الشعبنة علشان في رمضان
الناس ماتاكل السمك بس هيا كدة عادة
شعبنة يعني اضرب سمك وصيادية.

______________________________

عشرة عاشورا ( 10 محرم ) رز زربيان الحلو
وزلطة لبن أبو الفلفل .

________________________

السحلب يسووه في الأيام الباردة علشان يلم العضم ويدفي الجتة بالزات لو فيلو شوية جنزبيل

__________________________

القهوة الملوزة اللي يحطولها لوز بجلي مهروش طبعا هادي وقت البزورة ما ينجحو ... والا يسقطو يسوولهم هيا قيد ماتفرق


لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة . خخخخخخخ

________________________

وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة

____________________________

المجلب ( مجموعة أعشاب مخلوطة عن العطارين ) زماااااان ويمكن دحين مافي .. حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها

_____________________

الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد

_________________________

السلالي والمقلقل واللحم نفتكر على طول عيد الحج يندبح الطلي ومايبقى شي منو .. تبارك الرحمن


كل شي يتاكل فيه حتى الرجول يسوو بيها مقادم والمفاصل نلعب بيها كبوش والفروه يفرشوه على عتبة البيت زي الدعاسات دحين والديل نشوح البزورة بيه زي البواكير
ههههههههههههه



زي ماشفتو الأكلات اللي قلنا عليها لها مناسبة أو وقت معينه تتاكل فيها
مع انو يمدينا ناكلها طووووووووووول السنة مو مشكلة ويمكن كتير ناس هجروا وفلتو تباتيك زمااان الا مارحم الله .. بس هيا زي ماتقولوا شغلة تعود.


دحين انا عارف انو كل الي هنا (( او معظمهم )) مصريين .... و انكم ما فهمتو شئ من الاكلات (( ممكن )) بس انا جايبها عشان تضحكوا و تفرفشوا

(شايف الله يسلمك)