شخابيط على الحيطان ..

[((مهند))]

ليه فيه ناس لما تلاقي حاجة نضيفة بتحاول تشوها ؟..... يعني مثلا بالنسبة للحيطان ....... ليه فيه ناس لما تلاقي حيطة نضيفة بتشخبط عليها ؟ ....... منظر غير حضاري مش كده ؟

- يعني تلاقي فيه ناس بتتعامل مع الجدران على أساس إنها نصب تذكاري لتخليد ذكرى كل بطل عدّي من جنب الحيطة دي .....فمينفعش يعدي من جنبها إلا ولازم يكتب إسمه ...... فمتستغربش لما تلاقي حيطة مكتوب عليها .

البرنس حمادة مجانص
المرعب توتو عضلات
المعلم حلبؤه الهفتان
الباشا زَلَقُطّة الجعر

( عصابة الرباعي المرعب ...... قابل الموت ولا تقابلهومش ) ..... ويرسملك جنبها الجمجمة إلي طالع منها عضمتين .


- واحد تاني تلاقيه واخد زمبة من حبيبته .... فميلاقيش حتة يكتبلها فيها إلا على السور إلي كانو بيتقابلو عنده علطول , فيكتبلها قصيدة ملتهبة تعبر عن مدى لوعته وحسرته لما صفاء سابته .

بحبك يا صفااااااء
ده البعد عنك جبلي داااء
وإرجعي بقى دإنت من يوم مابعدتي وانا عمال أقول واااء .... واااء وااء

الإمضاء ( المدهول على عينه, ننوس عين صفاء )

ويمكن تكون صفاء معدية على السور ده فترد عليه هي كمان .

يا خاين يا غشاش
بعتني بلاش
بقى أقولك هاتلي شبكة تقولي معندناش
وفالح بس تجيبلي في أطايف وجولاش
خلاص هي دي النهاية مع إننا لسه ما إبتديناش

الإمضاء ( المجروحة صفاء )

- فيه ناس بقى بتحب تكتب مذكراتها على الجدران ..... فمثلا يكون أحمد وخطيبته منار رايحيين جنينة فيكتب أحمد على الحيطة
( أحمد + منار = حب للأبد 3 - 5- 1990) .

بعد سنة جواز يروحو نفس الجنينة ..... فيكتب على نفس الحيطة
( أحمد + منار = حب بس مش للأبد 3- 5 -1991) .

بعد عشر سنين يروحو نفس الجنينة .... ويكتب على نفس الحيطة
( أحمد + منار = أرف ووش ووجع دماغ 3-5- 2001 )

لما يكملو 20 سنة جواز هيروح الجنينة لوحده و يكتب
( أحمد – منار = راحة وسعادة وانبساط للأبد 3-5 - 2010 ) .


- وبعد الثورة بقى الكتابة على الجدران خدت شكل تاني .. فتلاقي أكتر واحد واخد شتيمة على الجدران هو مبارك .. وفى اول الثورة كانت الجملة الشهيرة ( الجيش والشعب ايد واحدة ) على جدران كتير .. أما دلوقتى بقى بعد المحاكمات العسكرية والاسلوب الغريب اللى المجلس العسكرى بيدير بيه البلاد .. عرفت ان معنى الجملة دي ان فيه كلابشات في ايد المجلس العسكرى م***ش بيها ايد الشعب وبكده يبقى الجيش والشعب ايد واحدة .



الكلام إلي فات ده كان بالنسبة للحيطان ..... نروح نشوف كتابات تانية بتبقى على باب أي دورة ميه ....

هتلاقي واحد كاتبلك تحذير عالباب ( احترس ...... الحمام مراقب ) .......أوباظ .... وبعدين بقى في العطلة دي؟ ...... هو الواحد هيعمل زي ما الناس بتعمل ولا هيعد يدور على مكان الكاميرا ..

وتلاقي واحد تاني كاتب نصيحة (عزيزي العميل .... متنساش تشد السيفون وراك منعا للتلوث البيئي ) ...... الإمضاء ( شخص كان قاعد مكانك 14-3 -2003 ) .

واحد تاني بقى تلاقيه كان مر بظروف صعبة وهو آعد زي أعدتك دي , فكتب عالباب ( يا عم متحزقش ....... شدة وتزول ) .