الـجـروب الـرسـمى لـلـمـنـتـدى FaceBook | Official Group

**ZaLToN** · 06-10-2012, 06:26 PM

والآن جااء موعدنا مع جزء جديد من القصه الجزء المليىء بالاثارة والمتعه

تااابعوا معنا هذا الجزء ومنتظر رايكم ..

لمتابعه الجزء الأول والثانى من القصة يرجى زيارة هذا الموضوع

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

لمتابعه الجزء الثالث والرابع من القصة يرجى زيارة هذا الموضوع

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

تابعت معى خطاب الملك ناصر ملك الجن بمصر الموجه الى شعبه , شعب مصر من الجان و ما جاء به من أشياء غريبه و صفات أغرب نعتنى بها و كأن لى شأن كبير عند هذا الشعب من الجن المؤمن بالله , و من خلال متابعتك لما دار بغرفة العمليات الحربيه أتمنى أن تكون قد كونت معى صوره تكاد تكون واضحه المعالم لسبب كونى مهما هكذا بالنسبه لهم , و أيضا بالتأكيد اكتشفت أن لى مهمة محدده بتلك الحرب الطاحنه بينهم و بين أعدائهم من الجن اليهودى الذين بدأوا فعلا فى التحرك لتنفيذ مخططاتهم , و أدركت أيضا مثلما أدركت أنا بأن أساطيرهم تقول بأنى فى حاله نجاحى فى أداء دورى و مهمتى فأنى سألقى حتفى , اذن فما هو دورى؟ و ما هى المهمه التى ستلقى على عاتقى؟ و هل سأستطيع تحقيقها أم سأخذل كل هؤلاء كل من وضعوا ثقتهم فى ؟ و هل ستصدق أساطيرهم فى كل شيئ؟؟؟

أتمنى ألا أخيب ظنهم , لتتعرف على اجابات تلك الأسئله تابع معى باقى أحداث القصه و لكن عدنى بأنك ستكون فى قمه التركيز و أن تبقى معى طوال أحداث القصه بقلبك و عقلك من يعلم فقد أحتاج منك المعاونه على أعدائنا فهل أنت مستعد؟؟؟

الملك ناصر بنبره صوت كلها أمل : كنت عارف أن الأسلام ممتش فى قلوبكم و أن الجيل الحالى قادر على أنه يعيد هيبه الاسلام تانى انت اللى قلته ده يا محمد قاله قبلك كتير من المسلمين الأشداء زمان و عشان كده ربنا كرمهم كنت بدأت أفقد الأمل بس انت رجعتهولى تانى شكرا يا محمد.
محمد : ايه يا جماعه فى أيه هو فى حد يجيلوا فرصه زى ده و يضيعها أنا طول عمرى فى صلاتى كنت بدعى أنه يرزقنى الشهاده و أدينى حسيت أن دعائى قرب يتحقق أزعل بقى ولا أفرح؟
الملك ناصر : أنت عارف يا محمد ان رسولنا الكريم صلى الله عليه و سلم قال " من طلب الشهاده بصدق نالها و لو على فراشه " صدق رسول الله صلى الله عليه و سلم .
محمد : اللهم صلى و سلم و بارك على أفضل الخلق ,أنا بأذن الله هكون عند حسن ظنكم بس قولولى بقى أنا عرفت اللى يشبهلى فى اليهود مطلوب منه أيه انما معرفتش أنا أيه المطلوب منى بالظبط؟؟؟؟
الملك ناصر توجه الى الطاوله التى عليها ماكيت للموقعه و قد أقترنت بخارطه كبيره للمنطقه و طلب منى و من محمد الثانى الوقوف بجانبه و أخذ يشرح لنا أفكاره التى يريد مننا تنفيذها و زاد تركيزى أنا و محمد الثانى كثيرا فلقد كانت المهمه كبيره و المسؤليه الملقاه على عاتقنا كبيره جدا و ابتدى القلق يسيطر على فهل سأكون عند حسن ظنهم بى أم سأخذلهم و ليس هم فقط بل أمه...
أمه بكاملها تعتمد على؟؟؟؟؟؟

الملك ناصر : محمد انت تعرف أن فى سفينه فضاء أمريكيه اسمها (أبولو 2012) على متنها رائد فضاء يهودي اسرائيلى كانت قامت بدوران حول الغلاف الخارجى للأرض بدون ابداء سبب واضح لده أو حتى توضيح المهمه اللى بتقوم بيها سفينه الفضاء دى لوسائل الأعلام؟

محمد : أنا سمعت عن سفينه الفضاء دى فعلا بس متابعتش موضوع مهمتها ده بالظبط .

الملك ناصر : محمد الثانى هو اللى كان متولى عمليه التجسس على السفينه دى بنفسه و عشان كده هو اللى هيشرحلك كل حاجه أحسن منى .

محمد الثانى : بص يا محمد احنا من زمان كنا متوقعين غدر اليهود بينا و عشان كده عملنا حسابنا كويس و مفضلناش مأمنين للسلام اللى بينا و بينهم ده لأنهم ملهمش كلمه أبدا زى ما التاريخ بيقول سواء على مستوى الأنس أو الجان .

هززت رأسى موافقا و أنا فى قمه التركيز و اللهفه لمتابعه شرح القائد لى .

أرتسمت على ملامح محمد الثانى علامات الجديه الواضحه و هو يكمل حديثه قائلا : وعشان كده احنا كنا مراقبين تحركاتهم و زى ما قالك والدى الملك ناصر قبل كده عرفنا من جواسيسنا هناك انهم بيحاولوا ينقضوا العهد اللى بينا و بينهم بأى طريقه و عشان ينجحوا فى كده كان لازم يحصلوا الأول على الوثيقه الموضوعه فى المكان اللى أشار اليه والدى قبل كده , خلف الشهب الحارقه و طبعا كان لازم يستعينوا بأنسى يقوم بالمهمه دى لهم , اليهود و جدوا ضالتهم فى شاب يهودى الديانه اسرائيلى الجنسيه يدعى أيزاك يعمل فى وكاله الفضاء الأمريكيه (ناسا) , أيزاك هو نفس أسم قائد الجيش الصهيوني أيزاك اليعازر و الأتنين فيهم نفس صفات الوحشيه و حب السيطره و التطلع لحكم العالم بطموح ملهوش حدود و كمان بيشبهوا بعض فى الشكل شبه كبير و عجيب .

تنهد القائد محمد الثانى و كأنما يعد نفسه لما سيقوله بعدها ثم أستطرد قائلا : طبعا اختفى ايزاك الأنسى فى ظروف غامضه عن البشر لمده يومين ثم ظهر فجأه و من حوله هاله كبيره من التشجيع من رؤسائه و كأنه حصل فى اليومين دول على بعثه جعلته أعظم علماء الأرض , و حصل أيزاك على ترقيه و تم تحويل نشاط عمله بناسا من المتابعه الأرضيه لتغيرات المناخ الى قسم أبحاث الفضاء و فى ظرف اسبوع فقط أصبح مؤهل للعمل كرائد فضاء على متن السفينه الفضائيه (أبولو 2012 ) , السفينه كانت رحلتها غريبه فعلا ففى سجلات (ناسا) لم يكن هناك أى أسباب لقيام تلك السفينه المنضمه حديثا لأسطول سفن الفضاء الأمريكيه برحله الى الفضاء فى ذلك الوقت من العام , كما أنه لا يوجد تفاصيل عن مهمتها الفضائيه و عن مكان المهمه بالضبط .

علت وجهى نظره حزن واضحه اكتشفها الملك ناصر و عقب عليها قائلا : محمد أنا عارف سر نظره الحزن دى أيه و اعذرنى أنا قريت أفكارك للمره الأخيره برغم أنى بالفعل منعت نفسى و أى جنى من رعيتي أننا نقرى أفكارك أنت بالذات , الا ان اللى شفته من حزن فى عينيك اضطرنى أقرى أفكارك للمره الأخيره , يا محمد أنت زعلان عشان اللى بيقوم بنفس دورك فى الطرف التانى مكانته فى عالم الأنس أكبر من مكانتك صح؟

محمد : مهو حضرتك شايف الفرق كبير قد أيه , عدوي بقى رائد فضاء فى ناسا و أنا مجرد جندى فى الجيش المصري .

محمد الثانى محاولا الترويح عنى : عريف مجند لو سمحت .

قالها و ضحك و ضحك معه الملك ناصر و ابتسمت ابتسامه خفيفه كى أدارى ما بنفسى من ألم و لكن ما زادنى ألم فوق ألمى أنه ليس حالى أنا فقط .....بل هو حال أمتى بأكملها فنحن كثيرون و لكن غثاء كغثاء السيل كما قال رسولنا الحبيب صلى الله عليه و سلم , تهافتت علينا الأمم لضعفنا الداخلى علميا و ثقافيا و حتى أخلاقيا .

الملك ناصر : بتفكر فى أيه يا محمد؟؟؟

رددت بسرعه محاولا تفادى السؤال الصعب و المحرج فى نفس الوقت , محاولا اصطناع المرح : أخيرا عرفت أداري افكاري فى عالمكم ده , يا ساتر دانا كنت ولا اللى ناشر غسيله فى محطه مصر .

ضحك ثلاثتنا كثيرا و أستمرينا فى الضحك عسى ان يهون علينا الوضع الراهن و ما فيه من مخاطر و صعاب.

محمد الثانى و كأنما شعر بي تلك المره بدون قراءه أفكار ,ولما لا فأنا و هو مثل الأخيين التوائم : محمد لو احنا أمننا بربنا حق الأيمان كل الفوارق اللى بينكم و بينهم ده مش هيبقى ليها معنى بالعكس الايمان هيرجح كفه المسلمين فى المعركه , لأن ايماننا القوي بيبث الرعب فى نفوسهم و أسوء عيب فى أى محارب هو الخوف و الجبن صدقنى ملهوش علاج و مفيش قائد يقدر ينتصر فى حرب و جنوده مرعوبين من أعدائهم , و اللى شوفته منك انهارده و فرحتك و انت بتسمع أنك فى الغالب هتستشهد فى المعركه أكدلى أنك قدها فعلا و أن أيزاك ده ولا حاجه بالنسبه ليك .

أثلجت كلمات محمد الثانى صدري تماما فهى كلمات تنم على أنه قائد محنك بالفعل و يعرف خبايا و دواخل الجنود الذين هم الأدوات الحقيقه فى المعركه بغض النظر عن العتاد و الأسلحه , وثقته فى زادت من ثقتى فى نفسي التي أحتاجها كثيرا الأن.

محمد الثانى : نكمل الشرح؟

محمد : طبعا .

أكمل محمد الثانى قائلا : السفينه دى رجعت للأرض فعلا وسط اهتمام كبير جدا من جانب القائد ايزاك اليعازر اللى راح بنفسه لاستقبال أيزاك الأنسى , جواسيسنا أكدوا أنه أول ما أيزاك الأنسى شاف أيزاك أليعازر رسم على وجهه ابتسامه خبيثه تأكد أنه أتم مهمته على أكمل وجه بادله القائد اليهودي الأبتسامه بأبتسامه أكثر خبثا تخفى ورائها الكثير .

الملك ناصر : كده الجن اليهودي قدر يحصل على الوثيقه و ده يعنى أنهم حاليا بيحاولوا فك طلاسمها و ده هيبقى مجرد مسأله وقت مش أكتر , طبعا ده بيعنى أننا قدامنا أربعه و عشرين ساعه فات منهم دلوقتى عشر ساعات لاستعادة الوثيقه .

محمد و كأنه يسأل سؤالا يعرف اجابته مسبقا و لكنه خائف من اجابته : والا؟؟؟

الملك ناصر وقد بدى عليه و كأن هموم الدنيا كلها محمله على كتفيه : و الا أصبح قرار دخول الحرب من عدمه فى أيدهم هما , ساعتها مش هينجوا منهم جنى ولا أنسي هتبقى حرب شرسه هما ليهم فيها الأسبقيه نظرا لعنصر المفاجأه الموجود عندهم و مسانده جبهه الأنس القويه كمان اللى أديتهم أفضليه كبيره عننا .

محمد الثانى : أنت فاكر الكلام اللى قولتهولك أول ما قبلتك عن أن العدو نجح فى اختراق جبهه سيناء و أحتل أجزاء كبيره منها؟

محمد : أكيد .

محمد الثانى : ده كان بمجرد أنهم عرفوا أن ايزاك نجح فى مهمته , فما بالك بقى لو قدروا فعلا يفكوا طلاسم الوثيقه؟ صدقنى هيبقى صعب جدا الصمود قدامهم ساعتها .

محمد : يبقى لازم نتحرك و باقصى سرعه .

ابتسم الملك ناصر قائلا : طب مش لما تعرف مهمتك أيه بالظبط .
و أمسك بعصا قصيره و أخذ يشرح لى و لمحمد الثانى ما هى المهمه و كيفيه أدائها على الوجه الأمثل .

فيا ترى ما هى تلك المهمه ؟
المهمه التى اذا نجحنا بها سنستعيد السيطره على الوضع و نقلب موازين الأمور كلها .

المهمه التى سألاقى فيها مصيري .....المصير الذى لا أخفى عليكم خوفى الشديد منه برغم اشتياقى له و رغبتى فيه منذ نشأتي.

هل ستبقى معى فى الأجزاء القادمه لتتعرف على المهمه و أحداثها و أحداث المعركه الفاصله أم ستنسحب منها ؟ أتمنى بقائك معى ومساندتك لى فالأمور لا تحتمل فقدان جندى واحد فى المعركه....

المعركه الفاصله