تقرير عن الانتخابات المصريه 2010 ‏

[HecT000R]

" اهلا بيكم اعزائي المشاهدين "

" احم احم احم مشاهدين ايه يا حجه ده موضوع مكتوب "

" اه صحيح اعتذر اعزائي المستمعين "

" كح كح كح ياستي ركزي شويه "

اهلا بيكم اعزائي القراء .. نقدم لكم التقرير الاول ويمكن الاخير عن يوم الانتخابات المصريه الفظيع .
في البدايه .. ومع تطور التكنولوجيا الحديثه الفظيع برضه فلابد وانكم كلكم شاهدتم ما حدث لحظه بلحظه ولاحظتم التناقض الفظيع ايضا في نقل الاحداث بين القنوات المصريه والقنوات الاجنبيه


ففي حين قالت القنوات المصريه ان كله تمام وان العمليه الجراحيه قصدي الانتخابيه تمت بنجاح تام وباقبال غير مسبوق من قبل الناخبين قالت القنوات الفضائيه ان العمليه فشلت وتقريبا كده اضطرينا نضحي بالام والجنين عشان الدكتور يعيش وان الاقبال كان اقل من العادي




( ولعلك حكمت عقلك عزيزي المشاهد ولاحظت الصناديق الفاضيه التي حرص المسؤولون علي نقلها من مقار اللجان الي المقار العامه للفرز وللامانه فقد كان هناك عدد من الصناديق بها حوالي صوتين )





ومن المثير للجدل موضوع مقتل ابن احد المرشحين المستقلين والذي بررته القنوات المصريه علي انه لا علاقه له بالانتخابات حيث كان الشاب يقوم بتوزيع دعايه انتخابيه لوالده – يوم الانتخابات الصبح – وعاكس شقيقه احد الاشخاص فقتله ؟؟؟!!!





" يعني الشاب نازل يعمل دعايه لوالده فانتهز الفرصه عشان يعاكس البنات. ده طبعا بخلاف انه اكيد عاكسها بطريقه غير مسبوقه ادت باخيها لقتله فورا "



ومع بدايه اليوم تفاوتت الرشاوي الانتخابيه – التي انكرتها القنوات المصريه – مابين كيلو لحمه او خمسين جنيه الي الف جنيه وموبايل بكاميرا بشرط ان يصور المنتخب نفسه بالموبايل وهو يدلي بصوته لصالح المرشح .






ومع رفض الحكومه المصريه للرقابه من اي نوع او جنسيه – مصريه قضائيه منظمات مجتمع مدني وحقوق انسان او اجنبيه علي اساس ان كل واحد رقيبه ربنا – تمت الانتخابات بصوره اكثر سهوله نتيجه الحب المتبادل بين الحكومه والشعب حيث داومت الحكومه علي التسهيل علي الشعب حياته فقرر الشعب التسهيل علي الحكومه كل حاجه وقعد في بيته


– رغم ان القنوات الرسميه بتقول العكس – وبذلك سهل علي الحكومه فرز الاصوات الكثيره لانها كده كده عارفه مين داخل مجلس الشعب المره دي .
وكل انتخابات وانتم طيبين

اشوفكم فى الاعادة