أنا عن نفسي مش بحب آخد .. أنت بتحب !!

[WELFA]

بقالي كده مدة كبيرة كل أما أمشي في الشارع
و أشوف الناس أخدها في وشها و ماشية
و لما تبوص لهم تلاقي الواحد مكشر
و شبه بيقولك " في حاجة بروح أمك "

انا قبلها يا ولاد الحلال
كنت بمشي فى الشارع و أفضل اضحك في وش الناس و الناس تضحك في وشي
و أهم حاجة محدش فينا يعرف التاني
زاي مره كنت ماشي فى الشارع أنا و أخويا و الدنيا زحمة
و واحد راكب على فزبة و عمال يهرش في راسه و عدم اللا مؤاخذة أقرع شويه زاي حالات أخويا
راح أخويا بصله و قاله : " و أنت ناقص توقع في شعرك يا عم بطل جرب "
انا بصيت لأخويا بصة جامدة شبه بقوله : " أيه الهبل ده "
و حصل ما لم يكن متوقع
الراجل اللي على الفزبة فضل يضحك و سلم على أخويا و قاله حاجة حلوة أوى
" ربنا يضحكلك دنيتك زاي ما ضحكتني "
وقتها حسيت أد ايه الناس كانت محتاجة تضحك و لغاية دلوقتي محتاجة تضحك
كنت بمشي في الشارع و أضحك في وش الناس و الناس تضحكلي

دلوقتي حد يقدر يقولي أيه اللي حصل خلى الناس كده !!
حيقولك الأخوان طلعوا تيت و عايزين يحكموا البلد
و السلفين مكفرين خلق الله ..
و حازم أبو أسماعيل ملى الدنيا دعايا ..
و عمرو موسى فلول ..
و البرادعي عميل ..
و حمدين صباحي مش مسلم و ازاي يمسك ..
و مفيش بنزين ولا سولار ..
و لسه العيش مش حلو و مفيش عيش ..
و المايه ملوثه و الصرف ضارب ..
و الحاجات بقت غالية على الناس ..
و الترام عامل أضراب ..
و النقل و المشاريع عاملين أضراب ..
و التكاسي بتستغل الفرصة و تدبح الناس ..
و البلطجية زادت ..
و الشباب مش بيتجوز ..
و البنات عنست ..
و الناس بتموت من الجوع و الفقر ..

انا عن نفسي عايز أقول حاجة واحدة
" إنَّ اللهَ لا يغيّرُ ما بقومٍ حتى يُغيروا ما بأنفسِهِم "

بعض الناس حتقولي و أيه لازمت اللي انت كاتبه ده حقول حاجة واحدة
طبعا عارفين فيلم الدادة دودي
و لما الراجل المناضل الثورجي شفها فى قسم الشرطة و حولها لثورجية
حد فاكر اسم الحملة بتاعته أيه !!
ايوه بالظبط كده
كان اسمها
" خنقتونا "

بس المره دي انا مش بقولها للنظام
انا بقولها للناس
يا جدع
ده " الكلمة الطيبة صدقة " !!

و مستني أشوف الكلام الناس معايا ولا ضدي