~¤¦¦§¦¦¤~ تيجي نفرفش ؟ ( قصة عاطل الشحات ) ~¤¦¦§¦¦¤~
بسم الله الرحمن الرحيم ,,
وبه نستعين ,,
في البدايه لحفظ الحقوق و الواجب ( القصه منقوله وليست من تأليفي الخاص )
نبدأ بإسم الله ..
( الجزء الأول )
اقتباس:
يوميات عاطل الشحات
نايم فى بيتنا من كام يوم .. متلفح بما لايقل عن 5 بطاطين .. تقريبا كنت مجمع بطاطين البيت كله .. واذا بى استيقظ من احلاها نومه على صوت صياح ونواح فى الشارع ..
انا بفزع : ايه .. مين .. ليه .. هو فى ايه بقى ؟!!!
ابويا صائحا من آخر الشقة : ايه الدوشة اللى عندك دى ... خربت ايه تانى يا جلاب المصايب ؟!!
انا بغضب : ياعم مش انا .. مش انا ... الصوت جاى من الشارع !!
ابويا : طب ماتقوم تشوف فى ايه يا أنثى السلحفاة انت !!
وبعد قليل بدأ المتظاهرون فى التجمع ممسكين بأيدى بعضهم البعض .. الرجال فى الامام .. والنساء فى الخلف .. وبدأت لافتات تعلوا فى الافق .. امثال ...
الصحفى العراقى قال كلمته ... بوش مايسواش غير جزمته !!
يا امة المليار .. انتفضوا لفك الحصار !!
يا أوباما يا أوباما .. مستنيينك تيجى بالسلامة !!
وفجأة عربيات الامن المركزى نزل منها العساكر والظباط ... واصطفوا كمجاميع وبدأوا فى ترديد شعار الامن المركزى !!
عساكر الامن وهم يقفزون فى المكان : مصر .. مصر ..
امى منادية من البلكونة : اطلع يا منيل بدل ماتاخدلك شومة ولا طوبة فى دماغك !!
ابويا لأمى : سيبيه يمكن ياخدوه بالغلط ولا حاجة .. يتعلم الادب كام يوم فى القسم !!
امى : قسم ايه بس .. دى مظاهرة يعنى هايبقى فيها اعتقال يا راجل !!
ابويا : اطلع ياض بدل ما ياخدوك على "جوانتانامو" !!
وطلعت ووقفت مع ابويا وامى نتابع الموقف من البلكونة ...
وبدأ المتظاهرون فى التهليل ..
الرجال : لا للقمع .. لا للقمع !!
النساء مرددين خلف الرجال : لا للقمع .. لا للقمع !!
ابويا هاتفا من البلكونة وهو يسقف بكلتا يديه : وادحرج واجرى ..
انا وامى : يا رمان !!
ابويا : وتعالى على حجرى !!
انا وامى : يا رمان !!
وفجأة بدأت الاشتباكات بين المتظاهرين والامن وساد الهرج والمرج ارجاء الشارع وعلت أصوت الصياح والنواح ... وتقريبا كانت معركة من جانب واحد .. رجال الامن المركزى ... وكأنهم واخدين اوامر بأن الضرب يكون على الكيف !!
ووسط كل هذا الهرج والمرج اطاح احدهم بقصرية الزرع التى وضعها السيد الوالد اسفل المنزل بحجة تزيين البيت ( وكأن البيت فرغ جماله من كل شىء الا هذه القصرية.. والبيت اصلا قايل للسقوط !! )
ابويا مناديا من البلكونة : حاسب يا أطبش انت وهو القصرية هاتقع !!
وطراااااااااخ ( وقعت القصرية وتفتت الى 7 آلاف جزء !! )
ابويا هاتفا بفزع ممزوج بالحسرة : يخربيت اللى جاب ابوكم !! .. راحت القصرية يا حكومة مهلبية !! .. آآآآآآآآآآآآآآآآآآآآآآآآآآآه
ومن حظ ابويا العالى .. العالى اوى ... الشتيمة سابت الشارع كله برجاله ونساءه وعياله وعساكره ومتظاهرينه ولزقت فى ودان أحد اللواءات والذى كان يأمر وينهى فى عساكره من موقعه .. حيث كان يقف تحت عمارتنا المصونة عدل !!
اللواء مشاورا علينا : هاتولى العالم اللى فوق دول .. هما دول اللى بيقودوا المظاهرة من فوق ومهيجين الناس .. هــاتــوهـــملى هنا حالا !!
نظرنا انا وابويا وامى لبعضنا البعض بصدمة من هول ما سمعنا !!
ابويا : ايه العمل دلوقتى ؟!!
انا بخوف : الظابط اللى تحت افتكرنا تبع المظاهرة !!
وفتحت امى باب الشقة وسبقتنا وطلعت عند الجيران اللى فوق تستخبى عندهم .. ودخلت انا ووالدى محاولين لملمة اى اموال موجود فى المنزل قبل ما ييجوا يكسروه على دماغ اللى فيه .. ولكن ...
طراااااااااااخ _ صوت باب الشقة وهو ينكسر _ .. ( احلى حاجة فى رجال الشرطة دول .. انهم بيبقوا زى امك وابوك كدة .. فجأة ممكن تلاقيهم نايمين جنبك على السرير من غير ماتكلف نفسك وتقوم تفتحلهم .. مش عايزين يتعبوك يعنى .. والله ناس عسل ) .. ماعلينا ..
فجأة وبدون سابق انذار لقينا مدافع آلية ورشاشات مرفوعة فى وشنا !!
ابويا ممسكا النبلة ببلاهة : اى حد هايقرب مننا هافرغ النبلة دى فى دماغة !!
وبالصدفة البحتة كان تليفزيون منزلنا الموقر مفتوح على احدى قنوات الاغانى حيث أغنية شعبان عبد الرحيم والتى كانت تتحدث عن ضرب بوش بالحذاء .. حيث تقول كلمات الاغنية :
خلاص مالكش لازمة ... يا "بوش" يابن اللذينا
تستاهـل الف جـــزمــة ... على اللى انت عملته فينا
وجــه الـيــوم يــا واطــى ... ووشــك اتــفــضــح
وشافوك الناس متـاطــى ... من جزمتين شبــح
وايييييييييييييييييييييييييييه
ابويا : كدة كملت !!
انا : ياباشا .. احنا وربنا ما لينا دعوة باللبش اللى شغال برة ده !!
الضابط : اخرس .. يا مخرب البلاد .. يا عدو الوطن .. انت عضو فى انهى تشكيل ياض انت !!
ابويا ببلاهة : تشكيل نادى المحلة ان شاء الله .. بيلعب "هاف ديفيندر" !!
الضابط : انت بتهزر .. طب وشرف امى مانتوا بايتين فيها الليلة دى .. هاتولى الجوز دول على عربيات الامن تحت !!
انا مهللا وانا بتسحب من قفايا : لا للقمع ... لا للقمع !!
ابويا مرددا : لا (للقمح ) ... لا ( للقمح ) !!
بعد هات وخد فى سيارات الامن المركزى الخمس نجوم .. وصلنا بسلامة الله الى القسم .. وسط حفاوة استقبال بالغة من صولات ومخبرين القسم .. امثال .. اتحرك يا مجرم ( طرااااخ ) .. خش يا متهم ( طرااااخ ) .. ماتمشى عدل يالوح ( زيوووو ) !!
المهم ... دخلنا الى الزنزانة مع باقى المتظاهرين لحين حضور وكيل النيابة للتحقيق مع الجميع !!
انا لأحدهم : هو عدم الامؤاخذه .. انتوا كنتوا عاملين مظاهرة ليه ؟!!
الرجل : بوش انضرب بالجزمة يا محترم انت مش عايش فى الدنيا ولا ايه ؟!!
انا : ايوا مانا عرفت انه انضرب .. انما بصراحة مش فاهم بارضو الغرض من المظاهرة دى ايه ؟!!!
الرجل : ازاى يا استاذ .. ده يوم عالمى .. العالم العربى كله لازم يخرج ويحتفل بيه .. رئيس اكبر دولة طاغية فى العالم انضرب بالجزمة على ايد واحد عربى !!
انا : بارضو مش فاهم .. هو حرر لكوا العراق ولا فلسطين يعنى ؟!!!
الراجل بواقعية شديدة : والله بقى هى دى اقصى طموحات العرب فى العصر الحالى !!
الرجل : عادى ... زى كل مرة .. هانترحل بكرة الصبح على النيابة ... وهايتحقق معانا .. وغالبا كل واحد هايخرج بكفالة .. الا بقى اللى هايثبتوا عليه تهمة قيادة مظاهرة وتهييج الجماهير .. هما دول اللى هما عايزينهم !!
انا ناظرا لأبويا بقلق : ده اللى هو احنا !!
ابويا بفرح : جايلك يا "ابوغريب" !!
انا بضيق شديد : انا عايز امشى من هنااااااااااااااااااااااا !!
احدهم : امسك اعصابك يابطل .. ده انت كنت من اشجع المتظاهرين النهاردة .. انا كنت شايفك انت والراجل اللى معاك ده وانتوا بتهتفوا من فوق .. وهتافكم ده كان بيدينا قوة ... وكلنا شاهدين على كدة !!
انا بحسرة : هتاف مين اللى كان بيديكوا قوة ياعم انت .. انت عايز تودينا فى داهية ؟!!
انا : لله الامر من قبل ومن بعد ... لله الامر من قبل ومن بعد !!
ابويا ناظرا الى السماء من خلال شباك الزنزانة وبصوت عالى : الله يحرقك يابوش ال*** !!
الزنزانة كلها بحماس خلف ابويا : لا للقمع .. لا للقمع !!
انا بثورة : هى العالم دى بتتلكك لنا ولا ايه ؟!!
ابويا ببلاهة : مش عارف ليه حاسس انه مقلب من بتوع الكاميرا الخفية !!
وراح ابويا قافش فى احد اضخم الرجال فى الزنزانة محاولا نزع شاربه عنه وهو يقول : اكيد انت ابراهيم نصر مش كدة ؟!! .. اقلع بقى أم الشنب والباروكة دول .. وحياة ابوك انا مفاصلى سابت !!
الرجل : ابراهيم نصر مين يا استاذ .. امسك اعصابك واقف على حيلك كدة .. احنا كلنا هنا فدا الوطن !!
ابويا بعد فشل محاولته : فدا الوطن ؟؟ .. يا حوستىىىىىىىى ... الموضوع طلع بجد !!
انا : مفيش فايدة !!
تانى يوم الصبح تم ترحيلنا انا ووالدى على النيابة .. وبدأ التحقيق ..
وكيل النيابة : ها يا عم سيد انت وابنك ... مش هاتقولولنا انتوا تبع انهى تشكيل ؟!!
ابويا : ياباشا قولنالكوا قبل كدة .. "هاف ديفيندر" فى المحلة .. والتغيير حسب رؤية المدرب !!
ابويا هامسا فى أذن وكيل النيابة : طبعا حضرتك مش هاتصدقنا لو قولنالك ان قصرية الزرع هى السبب !!
وكيل النيابة صائحا : انتوا بتستخفوا بالنيابة ياض انت وهو .. طب حبس احتياطى لمدة 24 ساعة تانى لغاية ماتعترفوا او يبان لكوا صاحب !! .. يا شكرى .. عايز البهوات يستريحوا على الآخر .. وطلباتهم تتنفذ .. فاهمنى ؟؟ .. دلعهم يعنى !!
انا ببلاهة : والله ده كرم كبير ياباشا .. تعالى يا شكرى ادعكلى ضهرى شوية احسن جتتى اتنحلت من نومة "البورش" بتاعكوا ده !!
ابويا : وانا عايز ساندويتش "تشيكن ماجنم" من عند "مؤمن" يا شكرى بعد اذنك !!
بعد ان قضينا انا ووالدى ما يقرب من الثلاثة ايام فى الزنزانة أخيرا جاء الفرج ... فقد قامت والدتى بتوكيل أحد المحامين للدفاع عنا والذى اثبت بدوره للنيابة ان اوراقنا وملفاتنا سليمة ولا يوجد بها اى سوابق او احكام .. وعليه قررت النيابة الافراج عنا لعدم كفاية الادلة !!
وصلت انا وابويا منزلنا الموقر بحمد الله سالمين اللهم شوية خدوش بسيطة فى انحاء الجسم ناتجة من دلع شكرى ( ماشاء الله شكرى ده احد الظواهر المصرية التى نادرا ماتتكرر .. بيضرب جوز بنى آدمين بأيد واحدة .. ومابتخيبش ابدا .. ربنا يحميك يا بنى !! )
امى : لولولولولولولولى .. حمدلله على السلامة يا بو السيد ... نورت بيتك من تانى ياخويا ... ياريتنى كنت انا مكانك !!
ابويا بغضب : يا وليّة اتقى الله .. ده انتى اول ماشوفتى البوليس طالع ركبتى طيارة فى رجلك وخلعتى !!
انا : خلاص يابا بقى .. حصل خير .. المهم يامًا فى أكل النهاردة ولا ايه .. احنا ما أكلناش بقالنا 3 ايام ؟!!
ابويا : آه صحيح فكرتنى .. هو الواد شكرى انا مش كنت بعته يجيبلى ساندويتش من "مؤمن" ؟؟ ماجابوش ليه ؟؟ .. طب اما اشوفك يا شكرى !!
انا : !!!!!!!!!!!!!!!!!!!!!!!!!!!
امى : اقعد يابو السيد استريح بقى على ما احضر الغدا ... ثوانى ويبقى جاهز !!
وفى انتظار وجبة الغداء الشهية المتمثلة فى الفول والطعمية .. فتحت التليفزيون عشان اتسلى انا وابويا شوية وننسى الهم .. واذا بنا نفاجأ بأغنية شعبان عبد الرحيم مرة اخرى امامنا !! .. حيث يقول من جديد :
صدام اللى انت دبحته ... فى اول يوم العيــد
اهو ربك خــد بــتــاره ... وفى نفس المواعيد
العـالـم كلـه شافك ... وبالــســعادة حــس
الجزمة زى الكورة ... وداخلة فى المقص
ابويا صائحا : كدة كتيييييييييييييير ... لا للقمع .. لا للقمع !!
وراح قايم ابويا شايل التلفزيون وحادفه من الشباك من غير ما يبص !!
صوت قادم من الشارع : آآآآآآآآآآآآآآآآه ... هاتوا الاسعاف .. الباشا هايروح مننا .. الباشا هايروح مننا !!
احد الصحف الصادرة فى اليوم التالى : القبض على رجلان يشتبه فى انتمائهما الى أحد الجماعات الارهابية بتهمة قتل لواء شرطة بدافع الانتقام منه لسابق اععتقاله لهما !!
وسمعنى سلام الجزمة مش بتاعتى !!
( الجزء الثاني )
اقتباس:
شوفت كليب هيفا الجديد
قاعد من يومين على القهوة اللى تحت بيتنا انا ومجموعة اصدقاء من فاقدى الهوية فى هذا البلد … كنا قاعدين بنتناقش فى بعض الامور الهادفة كحال شباب هذا الجيل … ودار بيننا هذا الحديث
" سعيد التايه " : شوفتوا يا جدعان الكليب الجيد بتاع هيفا ؟؟؟
حنظلة : يا جدعان … يا جدعان … قولنا ميت الف مرة ماحدش يجيب سيرة الولية دى واحنا قاعدين على القهوة هنا … وخصوصا قدام الواد ده !! … قوم يا شلبى قوم يابنى … خلاص هانقفل على الموضوع !!
حمادة المحظوظ : ماتمشى ياض بقى من هنا ... جزم ايه اللى انت عايزنا نلمعها ... ده انا آخر مرة لمعت فيها الجزمة كانت يوم اما اخدت الثانوية العامة .. كانت مكافئة نهاية خدمة يعنى !!
حنظلة : وانا آخر مرة لمعت فيها الجزمة دى كان من 4 سنين عشان اروح بيها الجامعة .. من يومها مالطهاش ورنيش !!
سعيد التايه : انا بقى الجزمة اللى فى رجلى دى آخر مرة لمعتها كانت فى ...
انا مقاطعا : ياعم سعيد ركز بقى .. انت لابس شبشب ... وبعدين احنا هانقضى الليلة كلها فى تلميع الجزم .. ده ايه الليلة اللى زى وشكوا دى !!
حنظلة للجزمجى : كله منك انت ... انت اللى قلبت علينا المواجع ... أهو شوف واحد زيك ماعاهوش شهادة وبتكسب بصنعتك دى وتلاقيك بتطلعلك فى اليوم ييجى بـ 10 ولا 15 جنيه ... واحنا يا بتوع الشهادات الجامعية مش لاقيين حتى وظيفة تعيشنا ان شالله من غير جواز !!
الجزمجى مزمجرا : ومين قالك يا محترم انى ممعاييش شهادة ؟؟ .. انا آداب جغرافيا بتقدير جيد جدا يا محترم !!
الجميع : !!!!!!!!!!!!!!
بعد هات وخد بين افراد الشلة ... اجمع الكل على اتخاذ القدوة من الجزمجى .. ولهذا قرر جميعنا ان نبدأ فى العمل كــ ... باعة سريحه !!
رجعت منزلنا الموقر لكى اعرض الامر برمته على والدى العزيز .. وانتظرت اللحظة التى يكون والدى مستمخا فيها كى افاتحه بالموضوع ... وبالفعل جاءت اللحظة ... فقد دخلت على والدى وهو جالس امام التلفاز حيث يتابع قناة " شو موفيز" .. طبعا احنا مش مشتركين فى الشوتايم .. بس ربنا يخليلنا الوصلة !!
انا : مساء الخير يا حاج ... شكلك مزاجك رايق !!
ابويا : كان رايق .. بس طبعا دخلتك البهية عليا .. بالدنيا واللى فيها !!
انا ببرود : ايه بقى ... بتتفرج على ايه !!
ابويا : مش عارف من الصبح عمال ادور على فيلم اجنبى un cut ومش لاقى !!
انا : نعم ؟ !!!
ابويا مستدركا : آ .. أحم .. ممدوح فرج ... قالب الدنيا من الصبح على برنامج ممدوح فرج ومش لاقيه !!
انا : وهو برنامج ممدوح فرج ايه اللى هايجيبه على قنوات الافلام ؟ !!!
ابويا ببلاهه : اومال تفتكر الاقيه فين ؟ !!!
انا باستهبال : روتانا كليب ان شاء الله !!
ابويا ببلاهه اكثر : لالالالا .. مش على روتانا كليب .. انا كنت لسه شايفها وكانوا جايبين كليب لهيفاء وهبى تقريبا !!
انا بلهفة : كليب هيفاء الجديد ... اقلب بسرعة !!
قلب ابويا القناة لقينا كليب لفنانة لبنانية ايضا وهى " مى الحريرى" !!
بعد مشاهدة ما يقرب من 15 كليب على التوالى انا ووالدى المصون .. فقد حان الوقت لكى اعرض عليه الموضوع !!
انا : بقولك ايه ياحاج .. كنت عايز اعرف رأيك فى موضوع كدة !!
ابويا غير مبالى : العالم بتوع لبنان دول عايزين جايزة نوبل والله على المجهود الشاق اللى بيبذلوه ده !!
انا : يابا خليك معايا بقى ... بقولك عايز رأيك فى موضوع !!
ابويا بحزم بعدما اغلق التلفاز ليسمعنى : ارغـــــــى !!
انا : انا نويت اعمل مشروع !!
ابويا : لا حول ولا قوة الا بالله ... معلش يابنى ... كله بيعدى والله !!
انا : هو ايه ده ... هو انا بقولك عندى صداع ؟!! .. انا بقولك هاعمل مشروع .. مشرووووووووع !!
ابويا : لا اله الا الله ... طب خش ريحلك ساعتين كدة ولا حاجة على الكنبة .. يمكن تقوم كويس !!
انا باستغراب : ايه هو اصله ده ... هو انا بتكلم فيومى ولا ايه ... ياعم انا بقولك عايز اعمل ...
ابويا مقاطعا : مشروع ... مشرووووووووع سمعت ... سمعت الرعد فى ودانك !!
انا : اومال في ايه بقى ؟ !!!
ابويا : انت عبيط ياله ؟ !!! ... مشروع مرة واحدة ؟!! .. يا بجاحة اللى خلفوك يا أخى !!
انا : طب ليه الغلط دلوقتى ؟ !!
ابويا : وان شاء الله .. ناوى تنفذ المشروع ده فين .. " جاردن سيتى " ولا " الفور سيزون " .. ولا اقولك فكرة .. ايوة " سان استيفانو " انت تروح تنفذ مشروعك فى " سان ستيفانو " .. مكان سياحى وسعر الحاجة هناك مضاعف .. وأهو كمان صاحب المكان "طلعت مصطفى" محطوط فى السجن ومش فاضيله .. يعنى ماحدش هناك هايقولك انت بتعمل ايه !!
انا بغضب : يابا بطل تريقة بقى واسمعنى !!
ابويا بقرف : اطربنى ... ناوى تشتغل ايه ؟ !!
انا بفخر : بـــــائع ســـريـــح !!
ابويا صائحا : الحقى يا ذينب .. يا ذينااااااااااااب ... تعالى شوفى المتسول ابنك بيعمل ايه !!
امى قادمة من المطبخ كالعادة ممسكة بسكينة وفص توم : ايه خير .. فى ايه .. عملت ايه تانى يا جالب العار لاسم العيلة !!
ابويا : ابنك ياست هانم عايز يشتغل بياع سريح !!
امى : وماله يا خويا ... مش احسن من صياعته فى الشوارع طول الليل والنهار .. لالالا ياحاج سيد .. المرة دى .. الواد عنده حق !!
ابويا راقصا : عرفة الجامع !!
انا : يابا انا حاسس ان المشروع ده هو اللى هايفتحلى باب المجد !!
ابويا : جاك فتح نفوخك .. انت عايز الناس لما تشوفك سارح كدة يقولوا ابن " سيد الشحات " سارح ببضاعة فى الشوارع .. آسف .. اسم العيلة ومركزى ما يسمحوليش !!
امى بغضب رافعة السكين : بقولك ايه يا سيد يا شحات .. الواد هايشتغل يعنى هايشتغل .. بلاش فشخرة كدابة واعقل بقى احسن انت عارف .. انا لما زرابينى بتطلع مابشوفش قدامى !!
ابويا يحضننى بخوف : الف مبروك يا حبيبى .. ربنا يجعلها قدم الخير عليك يا بنى !!
تانى يوم نزلت انا واصدقاء الكفاح .. وكل واحد فينا ماسك فى ايده بؤجة كبيرة .. واتجهنا الى احد الاسواق الشعبية للملابس والشباشب والجزم والذى منه ... وبضعنا لحد ما كل واحد ملى البؤجة بتاعته لما بقت اتقل منه مرتين .. وبدأ كل واحد فينا يختار منطقة يفرش فيها بضاعته .. وقد كان ... وبدأت العمل !!
انا مناديا فى الشارع : ايوة يا بيه .. ايوة يا مدام .. شبشب حمادة بـ 2 ونص .. وتعالى بص .. يلا يا ابلة يلا يا استاذ .. اشترى قماش الحجاز !!
واحدة ست شايلة ابنها على كتفها : بكام ياخويا الفردتين دول !!
انا : من غير فلوس خالص يا ست !!
الست : كدة ؟؟ ... طب هاتلى اربع فرد بقى !!
انا : ايه ده ... ياستى عشان خاطر العريس الصغير ده بـ 2 جنيه بس .. يلا ان شالله ماحد حوش !!
الست مبتعدة : ياخى جاتك نيلة .. والنبى مانت بايع حاجة فى يومك ده .. اروح اجيبه من الوكالة بربع اسعارك !!
انا صائحا : بس حمى الواد اللى على كتفك الأول واديلو حقنتين فى مستشفى المبرة وبعدين ابقى اشتريله لبس .. زباين خرفان صحيح !!
وظل الامر هكذا ساعة فى التانية فى التالته .. حتى ... وآه من " حتى " هذه .. فقد دخلت الشارع ... كبسة !!
احدهم صائحا وهو يجرى ببضاعته : مرافــــــــــق ... مرافـــــــــق !!
حاولت الم اى حاجة من اللى مفروشة على الارض واجرى بيها .. ولكن .. ( طرااااااااااااااخ ( قلم مخبرين مجربة قبل كدة كتير !!
المخبر : اقف عندك ياض ... هات اللى فى ايدك ده ... شيل اللى على الارض ده يا مرسى !!
انا : استنى يا مرسى وحياة ابوك .. دول مدفوع فيهم 200 جنيه !!
ظابط البوكس من داخل السيارة : يلا ياض من هنا بدل ما ناخدك مع البضاعة ... مش عايز اشوف وشك فى الشارع ده تانى !!
بعد هات وخد .. تم بحمد الله استرداد البضاعة بعد دفع حوالى 20 جنيه اكراميات لعمال المخزن بتاع المرافق عشان اخرج الحاجة من تحت لتحت ... وقولت توبة ... وروحت رجعت البضاعة للراجل اللى اشتريتها منه فى الوكالة ومارضيش يدفع فيها الا نص تمنها فقط !! .. ( اشوف فيه اسبوع !! ) .. وعدت الى منزلنا ... واكتشفت ان اللى حصل معايا حصل بالتفصيل مع اصدقاء الدرب ... فقد كانت حملة موسعة للمرافق فى المنطقة كلها !!
دخلت البيت وانا شعرى واقف وهدومى متقطعة ووشى احمر وعنيا وارمة من اليوم العصيب ده !!
ابويا برعب : عفريــــــــــت ... يا ذينااااااااااااااااب ... هاتى البخور من عندك !! .. انصرف .. انصرف !!
انا : وبعدين بقىىىىىى ... والنبى يابا .. شوفلنا سيرة تانية بقى وقفل على الموضوع ده الساعة دى !!
ابويا : ماشى ياعم ..... اســـكـــت !!
انا : ايه ؟؟
ابويا : مش انا شوفت كليب هايفاء وهبى اللى انت كنت بتقول عليه ؟ !!
انا ببلاهه : جامد مش كدة ؟ !!
ابويا : طلقـــــــــــــة !!
انا : طب ماتفتح التلفزيون ياعمنا يمكن نلاقيه !!
فتح ابويا التليفزيون لقينا مذيعة بتقول : وحصلت الفنانة " تى تى حركات " على 2 مليون جنيه كأجر عن فيلمها الآخير " هزة وسط " والذى حقق اعلى ايرادات هذا الموسم !!
نظرنا انا ووالدى المبجل لبعضنا ببلاهه مما سمعناه .. ثم غيّر والدى القناة لنجد كليب هايفاء الجديد امامنا ...
انا وابويا فى نفس واحد : هـــــو ده الكـــــلام !!
(الجزء الثالث )
اقتباس:
ابويا مصحينى النهاردة الصبح من النوم يقوللى يللا عشان ننزل نشترى لحمة العيد
انا : لحمة ايه على الصبح ياحاج اللى عايز تشتريها دى ( الساعة كانت 2 الظهر اصلا !! )
ابويا : صبح ايه يا ( مغيب ) انت الساعة دلوقتى 2 الضهر ... قوم فذ خلينا ننزل للجزار نشوف اللحمة
انا : لحمة ايه يا حاج ... هو انت مش ناوى تشترى خروف زى السنة اللى فاتت ؟!!
ابويا : خروف السنة اللى فاتت ؟؟ ... اللى خسسته للنص من كتر الجرى فى الشوارع ؟!!! ( راجع حلقة خروف العيد )
انا : ماهو يا حاج انت رايح تشترى خروف صعران .. ده الجزار على ماعرف يمسكه عشان يدبحه كانت جلبيته كلها اتقطعت ... وايده كلها جابت دم والخروف ماكانش نزل ولا نقطة دم
ابويا : فاكر .. فاكر ... ده كان خروف ملموس من الشياطين باين ... ده حتى امك عملت غسيل معدة بعد ما كلت منه
انا : آه وانت عملت البواسير بسببه !!!
ابويا : يعنى لازم تفكرنى ... اتفضل قوم
ـــــــــــــــــــــــــــــــــــــــــــــــ
نزلنا نتجول فى الشوارع انا وابويا ... وزى مانتوا عارفين العبد لله بيخاف من الحيوانات بشكل عام زى الكلاب والخرفان وكل شىء له 4 ارجل ... وطبعا الشوارع كانت مليانه خرفان وجديان ومعيز ... المهم ... كل ما نقرب من جزار حاطط على الباب خرفان أ***ش فى ابويا زى العيال الصغيرة ...
ابويا : ايه يابنى .. مالك قافش فى دراعى كدة .. هو انا امك ؟!!
انا : معلش يا حاج اصل الخرفان بتجيب من الرجلين !!
ابويا : والله انت اللى عايز تتعلق من رجليك ... يابنى دى الخرفان دى عبيطة خالص .. استرجل بقى شوية
ماعلينا .. وصلنا للجزار ..
ابويا : يلا يا حاج سليم ... وضبلى 20 كيلو لحمة ضانى
الجزار : ايه يا بيه ... انت مش ناوى تشترى صاحى السنة دى ولا ايه ؟؟ ... ده انا عندى شوية حاجات هاتعجبك اوى
ابويا : لالالالالالالالالالا ياعم ... كدة اروق ... هابقى ادبح السنة الجاية ان شاء الله ... خلينى السنة دى اشترى جاهز احسن
المهم وقفت انا وابويا خارج محل الجزارة انتظارا لانتهاء الجزار من العشرين كيلو
ابويا مشاورا على قطيع الخرفان : اهو بص كدة على الخروف ده ... بص بيترعب من خياله ازاى ... يعنى هو اصلا اطيب من ما تتصور ... مش تقولى بيجيب من الرجلين
انا : ولو .. بارضو الحذر واجب .. ده كفايه قرنه اللى جايب للدور الاول ده !!!
ابويا : طب تعالى بس قرب منه شوية ....
انا مقتربا وناظرا فى بلاهه : والله هو طيب بس من بعيد لبعيد
ابويا : طب تعالى بقى اركب عليه !!
انا : اركب علي ايه يا حاج .. هو انت بتلاعب عيل فى الحضانه ؟!!
ابويا : يابنى ما هو عشان تكسر العقدة اللى جواك لازم تركب عليه ؟؟!!
انا : عنها ما اتكسرت .. طب الناس تقول عليا ايه والنبى ؟!!
ابويا : طب على الطلاق لو ما دخلت وركبت عليه لاطلق امك واشردكوا فى الشوارع واخليكوا عبره لمن لا يعتبر
انا : ياعم الحاج فى ايه بس .. انت مالك سخنت كدة ليه ؟!!
ابويا : خش ياض ... وراح زاققنى بأيده الاتنين جوه ....
انا اول ما لقيت نفسى داخل الحظيرة وسط القطيع ... نطيط فجأة وقعدت اجرى جوه .. ولا كأن الكهرباء لسعانى ... طبعا الخرفان كمان عماله تجرى جوه عشان خايفة اكتر منى .. وحدث هرج ومرج شديد ... وصل الامر الى ان كثير من الخرفان قفزت خارج السور الخشبى من فرط رعبها وخرجت الى شارع ... وانا كمان اول ما السكة فضيت روحت ناطط برة السور الخشبى
ابويا : الله يخربيتك !!
وانا بنط خارج السور الخشبى ... كان فيه خروف واقف برة ... وفجأة لقيت نفسى بنط وبستقر تماما على ضهره !!
الخروف حس بيا على ضهرة .. بقى عامل زى الحصان الوحشى بتاع الكاو بوى ... واليكم ما فعله الخروف :
اول حاجة عملها وانا على ضهره .. انه انطلق معلنا عن بدء السباق ... وللاسف اكتشفت ان كم القميص بتاعى دخل فى قرن الخروف ومش عارف افكه ولا حتى اقلعه عشان انزل !!
طبعا مسكت فى قرن الخروف جامد وهو بيجرى انتظارا لتوقفه عشان ما اتقلبش من عليه ... لكن مين اللى يقف ... 5 دقائق من الجرى الماراثونى ... دون توقف وجرى بالزيج زاج ... عمال يشيل البشر اللى فى سكته .. واللى مش فى سكته ... وانا راكب على ضهره ...
الخروف وهو بيجرى : مااااااااااااااااااء
انا وانا على ضهر الخروف : اوعى ضهرك !!
وطبعا الناس عماله تنط من قدامى انا والخروف على اليمين وعلى الشمال زى الافلام العربى ... لدرجة ان فيه واحد نط .. ووقع فى قفص طماطم ... وطالع منه وشه احمر ولا اقوى افلام الاثارة الامريكية ( زى الفيلم العالمى حنفى الابهة كدة !! )
المهم وانا على ضهر الخروف لقيت ان الحكاية ممتعة اوى ... يعنى مش زى ما انا كنت متصور خالص .. وان العمليه مسليه جدا ...
وأخيرا عرفت اتحكم فى اتجاهات الخروف بس ماعرفتش اتحكم فى سرعته ... فقولت اخلى الخروف يلف ويرجع للجزار تانى
وفعلا لف الخروف وحول وجهته صوب محل الجزارة بعد 4 دقائق من الاثارة والسرعة فى الدورى الانجليزى قصدى فى الشارع ....
لكن زى ما قولتلكوا انى ما عرفتش اتحكم فى السرعات ... فلقيت الخروف واخدها طيران على المحل ..
انا مناديا من بعيد وانا على ظهر الخروف : على جميع من فى المحل اخلاءه فورا لاسباب امنيه !!
واقترب الخروف اكثر ... فأكثر ... فأكثر ... فأكثر ... والسرعة تقارب سرعة الحصان وشكل الثور الهايج
الجزار من داخل المحل : حاسب حاسب الله يخربيتك
ابويا من الداخل ايضا : حاسب يا اعمى
وطاااااااااااااااااااااااااااااااااخ ... آآآآآآآآآآآآآآآآآآآآآآآآآآه
الطاااااخ دى صوت الاصطدام ... والآآآآآآآآآآآه دى ... صوت ابويا بعد ما اترفع على قرن الخروف
احد المارة ببلاهه : جووووووووووووون
انا ناهضا من على الارض : مساء الخير جميعا !!
صوت من داخل التلاجة : آآآآآآآآآآآآآآآآآآآآه
انا : ايه الصوت ده ؟؟
قربت من التلاجة اللى كانت مفتوحة اشوف ايه الصوت ده ... لقيت ابويا جوه بيقوللى : نشنت يا فالح !!
انا للجزار : خلصت العشرين كيلو يا عم سليم ؟!!!
الجزار بأسى : 20 كيلو ايه بس الله يخربيتك .. دمرتلى المحل .. اهم مرميين عندك اهم
انا بعد ما أخدت العشرين كيلو تحت باطى : طاب ياحاج هاروح انا بقى باللحمة ... حاسب انت عم سليم وابقى حصلنى !!
ابويا بمنتهى التلقائية : آه .. حسـ .. حسابك كام يا عم سليم ؟!!
عم سليم شاتما : ده انا هادخلك التلاجة النهاردة يا ابن الـ********
ابويا : الحقوناااااااااااااااى
الخروف : مااااااااااااااااااااااااء
انا عائدا اللى المنزل مصفرا : اهو انا كدة فعلا اتكسرت عقدتى !!
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههههههههههههههههههههه
مسخرههههههه
نصيحه لمرضي القلب عدم قرأه جميع القصص هههههههههههههههههههههههههههههههههههههههههههههههههه ههههههههههههههههههه
مش ادييييييييييررررر
التعديل الأخير تم بواسطة ™SHETOOOS™ ; 23-04-2011 الساعة 09:42 PM
الجزء الاول انا كنت جايبو قبل كدة فى قسم بعيدا
عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]
بس عادى بس الجزئين الجداد جامدين بجد
شـريـط الاهـداءات
23-04-2011, 08:58 PM
.gif){kind=icon}
العرض العادي
