تــــوضيـــــح هــــام

[osama_husien]

بسم الله الرحمن الرحيم

أولا أتمنى إن كل الناس تكون بخير

ثانيا أنا حبيت أوضح للناس بس شوية حاجات عشان انا بجد مستغرب لحال المصريين ومستاء جدا من اللي بيحصل

دلوقتى وبجد خايف جدا من بكره ومن اللى ممكن يحصل فيه

أحب فى الأول أوضح إنى كنت من المتظاهرين يوم الجمعه أو جمعة الغضب وليا الشرف وكنت اتمنى إنى أكون

معاهم يوم 25 يناير بس للأسف مقدرتش لظروف إمتحاناتى

طبعا مش هاشرح اللى حصل يوم الجمعه عشان معظم الناس عارفه اللى حصل بس أحب أوضح شوية حاجات

دلوقتى كلنا شوفنا الناس فرحت قد أيه بعد اللى حصل يوم الجمعه طبعا مش فرحت عشان الخراب والسلب والنهب

اللى حصل بليل واللى المتظاهرين ماكنش ليهم اى دخل فيه لاء فرحوا عشان الشباب قدر يكسر حاجز الخوف

وقدر يعبر عن اللى بداخل كل المصريين و طبعا الكلام ده مش أنا اللى بقوله ده اللى شوفناه فى كل وسائل الإعلام

مصريه وعربيه يعنى الناس كلها كانت مع الشباب دي لإنها بطالب بمطالب شرعيه وكله قال دول أبطاااااااال

عاوز بس اوضح حاجه هنا الشعار كان يوم الجمعه الصبح ( عيش - حرية - عدالة إجتماعية ) وبعد الصدام العنيف اللى

حصل مع الشرطه وإنسحاب الشرطه وإختفائها تماما ونزول الجيش الشعار بدأ يتغير لـ ( الشعب يريد إسقاط النظام )

وأنا واحد من الناس مكنتش عاوز كده ومش ده طلبي لإنى عارف إن ماينفعش إن الرئيس يسيب الحكم لأسباب

كتير ومعظم الشباب ماكنوش عاوزين كده بس ازاي الشعار ده دخل ويمكن بقه هو الشعار الرئيسي فى المظاهرة

مش عارف يمكن بعض منهم بعد اللى حصل وبعد ما شاف ناس كتير ماتت غير اللى إتصابوا قال كده والناس إتفاعلت

معاه أو يمكن ناس تبع الإخوان أو البرادعي الله أعلم المهم إن كله بقه يردد الشعار ده

أنا بقول ليه الكلام ده دلوقتى(( لإن أنا اليومين دول شايف إن ناس كتيره عماله تقول إن الشباب دي هيا اللى خربت

البلد وإن هيا اللى عاوزه تولع فى البلد وبعد مش شوفت سيل المكالمات والإتهامات والتوبيخ لشباب المظاهرة ))

الناس إتحولت بعد ما كانوا فرحانين باللى حصل وشايلينهم من فوق الأرض دلوقتى وبعد خطاب الرئيس أمس

خدوا العاطل مع الباطل

طبعا أنا مش مع الناس اللى لسه فى التحرير لحد دلوقتى لإن معظم شباب مظاهرة 25 يناير وجمعة الغضب رجعوا

بعد خطاب الرئيس لإن خطاب الرئيس حقق كل المطالب الرئيسيه ليهم اما الناس اللى موجوده دلوقتى دي هيا اللى

كانت بتنادى برحيل الرئيس وقلب نظام الحكم واللى دخلت الشعار ده واللى منهم ناس تبع الإخوان وناس مرتزقه

بتاخد فلوس عشان تعمل كده وناس تبع البرادعى ودول طبعا مالهومش اى علاقه بشباب مظاهرة 25 يناير .

حاجه كمان الناس كلها نسيت إن الشباب ده ضحي بنفسه عشان التغيير والإصلاح ؟؟!!!

أنا واحد من الناس أخويا خد طلق خرطوش فى وشه ودلوقتى عينه مش بيشوف بيها وغيره كتير ماتوا فى اليوم ده

وكله أول ما سمع خطاب الرئيس إمبارح إتغير وقال الشباب دي مش محترمه والشباب دي عاوزه تخرب البلد

وإحنا عايشين فى حريه والمظاهرات دي دليل على الحريه !!!!!!

حرية إيه يا جماعه طب لو فى حريه ليه الشرطه تضرب والناس دي ماتت ليه !!!!!

طيب خلينا معاكوا وان مش الشرطه اللى ضربت الناس دي طب ما حصل مظاهرة مليونية فى حراسة الجيش

محدش حتى حدف طوبه ليه !!!!! مشكلتنا إننا شعب عاطفي

أنا طبعا مش مع الناس اللى لسه موجوده فى ميدان النحرير والناس اللى بتشتم فى الرئيس بالعكس أنا شايف إن

الناس دي لو بتحب مصر بجد لازم تمشي خصوصا إن مطالبهم إتحققت مع إن وضحت قبل كده إن معظمهم مش

شباب مظاهرة 25 يناير وجمعة الغضب

الرئيس مبارك قدم الكتير لمصر وزيه زي اى إنسان معرض للخطأ لإنه بشر مش معصوم من الخطأ وعشان كده

لازم لما يحاول يصحح ويصلح نقف معاه ونسانده صحيح كان فى عناصر فاسد فى النظام لكن خلاص الرئيس أقالهم

وبخصوص الدستور قال هايحصل تعديل فى المادتين 76 و 77 اللى كان عليهم الخلاف والمشاكل وكمان مش هايرشح

نفسه فى الإنتخابات الرئاسيه اللى جايه يعنى الراجل بدأ فى التصليح وخلاص فاضل 6 شهور على فترة الرئاسه

يبقه مافيش أى داعي من المظاهرات وندي بقه الفرصه للحكومه تصلح خصوصا إن الوضع لو فضل كده البلد هاتولع

ولا هانلاقى أكل ولا شرب و إحنا مش ناقصين ده غير بقه الناس اللى بتحاول تعمل فتنه بين المتظاهرين والجيش

واللى لو قدروا فى الفتنه دي يبقه خلاص وصلنا لمرحلة العراق وكل الدول الخارجيه بتتمنى إن ده يحصل

يا جماعه والله العظيم كلنا متفائلين خير فى الحكومه الجديده بس نعدى المرحله الصعبه اللى إحنا فيها دي الأول

ولازم الناس تعرف ان فى أيادى أجنبيه بتلعب بالناس اللى فى التحرير دلوقتى عاوزينهم ما يسبوش الميدان وبيدولهم

فلوس وأكل محاولة منهم فى إثارة الجيش او خلق فتنه بينهم وبين مظاهرات تأييد الرئيس واللى لو حصل هاتبقه كارثه

عشان كده أى حد منا ليه صحاب فى المظاهرات سواء مظاهرات تأييد الرئيس او المظاهرات المعارضه يحاول يقتعوا

إنوا يرجع ويسيب الميدان لو بيحب مصر وبيخاف على مصر بجد وندي فرصه أو هدنه عشان الحكومه تقدر تصلح وتغير

خصوصا إن الرئيس ماينفعش بأي شكل من الأشكال يسيب الحكم يعنى اللى بتعملوه ده بيضر مصر مش أكتر

ومينفعش الرئيس حسني مبارك بتاريخه مع مصر يخرج بالطريقه دي كمان لازم نفتكرله كل شيء حلو عمله مش

بس نشوف السلبيات ونتجاهل الإيجابيات

رساله للبرادعي : إوعي تفكر فى يوم أو يصورلك خيالك المريض ان شعب مصر معاك او عاوزك او حتى بيحبك وان

فى يوم من الأيام هاتبقى رئيس مصر لإن ده من رابع المستحيلات وكل الشعب عارف إنك عميل وإنتمائك للدولار

أخر حاجه أحب أقولها إن مصر إن شاء الله هاترجع أحسن وأقوي من الأول (( نعـم للتغير ... لا للتخريب ...))

[netm0]

(( نعـم للتغير ... لا للتخريب ...))

احسن كلمه في الدش دا كلو

[desoky]

يا نااااااااااااااااااااااس حرام عليكووو
الناس بتموت في محطه الرمل وميدان التحرير وانت تقولي داا راجل عظيم ازااااااااي
يا عم انا معااك داا راجل عظيم داا رجل مصري مش عميل دااا كان معيشنا احسن عيشه
بس خلاص بقي زهقنا .. كفااااااايه كفااااااااااااااايه . لو عندو شويه دم يمشي . مش عايزينوااااا
الناس بتمووووووووووووووووووووووووووووووت
وعايز افهم حاجه للناس اليي بتقول نعم لمبارك لحد الانتخابات الرئاسيه القادمه
يا جماعه انتو مش فاهميين الراجل ده بيفكر ازاي .. الراجل ده دماغه سياسيه بطريق جباااره
كل الكلام اليي قاله ده حيجي وقتها ومش حيحصل عشان خاطر حضرتكو ياللي بتقولو نعم لمبارك واجابا لرغباتكو حينزل الانتخبات تاني وطبعا حيكون اتمكن من الناس اليي كان موعيي الناس عن طريق الكلاب بتوعو (( الشرطه ))

وانا حاسس اني اكيد حكون من الاول المعتقليين .. بس مش مهم . عادي . كده كده الدنيا كانت بايظه معايا .. وانا بقولك اهو يا مبارك [color="red"] انا مش عااااااااااااااااااااااااااايزك[/color

[Saloo7a]

المشاركة الأصلية كتبت بواسطة netmo عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

(( نعـم للتغير ... لا للتخريب ...))

احسن كلمه في الدش دا كلو

اه والله ^___^