°¨¨™¤¦( مـسـلسـل : مراهقـــين و مـن ربنــا قريبيــن ) ¦¤™¨¨°تمت¨¨

[The_Mask]

: : فترة المراهقة : :

فتــرة صعبة , فتـرة حساسة , بالتأكيـد كلنا مررنا بها

, فإذا كنت " قائد نفسك " , " قائد شهواتك " , " قائد أهوائك "

فأبشــــــــر :))

فانت بذلك قد ( نجـوت ) من هول تلك المرحلة الصعبــة .

اما لو اتبعت شهواتك و انجرفت وراء أهوائك و تركت إلتزامك ..

فلا شـك انك بذلك تكتب لنفسك " حزناً و ضيقاً "

ربما سيظل مُلازماً لكَ طوال عمُرِكَ

بيدكِ أنت القرار ,, بيدِك انت مصيركَ ..

فأىٌ الإحتمالين ستختار ؟؟!!

هذا يرجِع لكَ

هخدكم فى جولــة لتلك العائلة البسيطة الساكنة فى أحد المساكن الشعبية

الشهيرة بالقاهرة .. أسرة بسيطة تمتلك العادات و التقاليد .. و لكن هل

تمتلك الوعى الكآفى لتربية أولادها الذين باتوا فى سن حرج ؟ سن يحتاج إلى

الرعاية و الإهتمام و التوجيه ؟؟

هذا ما سنراه فى مسلسلنا ...


تاابعونى ...

لو لاقيت تعليق واحد هنزل اول مشهد .. انا مجهز كام مشهد كدا عندى

[Kemo Eagle]

تمــام اوووى ،،

هتنزل اجزاء المسلسل على هيئة مواضيع ولا مشاركات هنا ؟ ولا تجديد للموضوع ؟

[The_Mask]

المشاركة الأصلية كتبت بواسطة Kemo Eagle

تمــام اوووى ،،

هتنزل اجزاء المسلسل على هيئة مواضيع ولا مشاركات هنا ؟ ولا تجديد للموضوع ؟

مشاركات هنا

[داعيه اسلامى]

حينما تقدم شئ لوجه الله لا تخف لأن الله سيبارك لك فيه

[Kemo Eagle]

تمام ماشى اول ماتنزل المشاركات هيتم مسح جميع الردود
بما فيهم ردودى عشان يبقى الاجزاء فى مشاركات ورا بعض

[The_Mask]

نبدأ مع ابطال القصة :)

على : طالب فى اولى ثانوى ,, عماد : صاحب " على " الأنتييم ..

محمود : العُقدى المكلكع _ كما يطلقون عليه فى الشلة _

فوزية : اخت على إلهام : صاحبة فوزية الأنتيييم ..

الحاج عبد الرحيم : والد " على " ...



و نبــدأ

المشهد الاول

على : مامااااا .. يا ماماآآآآآآآ .. انتى يا ست الحاااجة !!!

الام : !!! فى ايه يابنى سرعتينى ..و بتعلى صوتك عليا كده ليه يا واد انت ؟؟؟

على : اومال عيزانى اكلمك بهدوووء و انتى لسة معملتيش الغدا و انا بطنى بتصوصو من الجووع ؟؟!!!!

الام : احترم نفسك ياض بدل ما اجبلك ابووووووك !

الحاج عبد الرحيم : انا جيييت اصلا يا " ام على " من صويت الواد و زعيقه

.. الواد اللى ناقص رباية ده !

على : فى ايييه ؟؟ هو كلكم داخلين فيا شمال كده لييييه ؟؟؟ده ايه العيشة اللى تقررف دى ؟

الحاج : تقرف !!! قرف يشيلك يا بعيييد يللا يا واد من هنا منتاش واكل يللا اطلع بررررررررره ...

على : انا اصلا ماشى من غير ما تقول .. هو انا هستناك يا حاج هههههه


الحاج : شوفى الواد البجح اللى معندوش ذرة دم .. اللى موتى عيكون على ايده ان شاء الله .......

آآآه


آآآه


آآآآه يا قلبـــى !!

الحقييينى بالدوا يا ام على بسررعة ..

على : اهو ده اللى انت فالح فيه ( آآه .. آآه يا قلبى )

و طبعاً " على " جرررى بعد ما قال الكلمتين دول لانه لو وقع تحت ايدين

الحاج هيطلع من تحتها " بطاطس مهروسة " ده اذا طلع اصلا :D

[The_Mask]

المشهد الثانى ...

الام : بت يا فوووووزية انتى يابت يا مقصوفة الرقبة انتى !! يا بت انتى يا بت

.. زورى وجعنى الله يهدّك يا شيخة ..

فوزية _ و هى لسة صاحية من النوم و شكلها عامل زى اللى طالع من حادثة

_ : اييييييييه فى ايييييييييه ياحاجة عايزة منى اييييه ؟؟

ابوووس رجلك سبيينى انااام ..

الام : يا بت يا بروتة تعالى ابوووكى تعباان ..

فوزية : ماله الحاج ؟؟ سلااامته

الام : اجرى يابت اندهى للدكتور سامى اللى فوقينا .. اجرررى يللا .

فوزية : يوووووووووه حااضر افففففففف مفيش غيرى فى البيت ده ولا ايييه ؟؟؟

و جه الدكتور و كشف على الحاج و قاله : ياعم عبد الرحيم متعصبش

نفسك و تاخد كل حاجة على اعصابك مفييش حاجة مستاهلة !!

الحاج : حاضر يا بنى هحاااول .. الله يكرمك يا بنى ياارب ..

فوزية : عايزين منى حاجة تانى .. انا داخلة انااااااااام ..


الام : اييييه يا شيخة ؟؟! انتى هتقضى طول اليوم نوووم و هتفضلى قالبة

ليلك نهارك و نهارك ليلك لحد امتى يا مقصووفة الرقبة انتى ؟!!

فوزية : هااا عندك كلام تانى يا حاجة تقوليه ؟؟! عشان انا صدعت ..يللا بلا

مؤاخذة انا هنااااام ..

[The_Mask]

المشهد الثاالث .. "مش هنزل حاجه تانى انهارده"

عماد : ايه ياواد ناوى على ايييه ؟؟

على : ابداً ولا حاجة .. نتمشى شوية و على ما الليل ييجى هبقا اروح البيت

!!

عماد : الله .. شايف البت الحلوة اللى هناك دى ؟

على : فييييييين وريهااانى ؟؟

عماد : اللى بتاكل فشار هناك اهييه !

على : ايوه ايوووه .. تعالى نشوف الحوار ايه ؟

عماد : اشطااا ^_^

على : ايه يا جميييل ما تدينى فشرااية لحسن انا همووت من الجووع .. و لسة متغدتش ..

البنت : يللا يا عيل منك له من هنآآ ..

عماد : عيااال !!! احنا عيال يا بت يا اللى شبه عمود النور المكسور انتى ؟؟

يللا يابنى نمشى من هنا شكنا اختارنا غللط !

على : شايف الراجل اللى هناك ده ابو كرش عامل كأنه بالع بطيخة و وقفت

فى بطنه هههههههه ده حتى اقرررع .. شكل البطيخى كانت قرعة ولا اييه ؟؟


عماد : طب شايف الست اللى هناك دى ؟؟ اللى شكلها ضربت شعرها فى

الخلاط قبل ما تنزل الشارع

على : ولا الراجل ده اللى وشه شبه الأوطاية المفعووصة



عماد : طب شايف انت الاتنين دول اللى عاملين فيها روميو و جوليت و هما

اساسأ محصلوش ( عدلات و برعى )



و " على " و " عماد " فضلوا ماشيين فى الشوارع يتريقوا على خلق الله

و يعاكسوا البنات .. لحد اما الليل جه و روح " على "البيت ..

ورجع لقاه ابوه فى وشه و معاه الخرزااانة



و نكمل العلقة اللى جاية .. اقصد الحلقة

[The_Mask]

احنا باذن الله هحول الموضوع من مشاهد الى حلقات كل حلقة فيها 3 او 4 مشاهد .

(( الحلقة الثانية ))

المشهد الأول

وصلنا فى المرة اللى فاتت لحد اما دخل " على " البيت و لقى الحاج مستنيه

بالخرزانة :))

الحاج : ما لسة بدرى يا اخويا !! ما تبات فى الشارع أحسن .

على : ليه يا عم الحج بس !! ده انا بحبك ^_*


الحاج : حبك برص و عشرة خرص يا شيخ .. يلاا انجر اداامى علشانة

الناس متسمعش حسينا ..


و دخل " على " و كان " الحاج " فى ايده الخرزانة و طبعا عينكم ما تشوف

الا النوور أخد علقة محترررمة جدا و الشاهد على ذلك ان الخرزانة اتقطعت

عليه :)


الام : تستاهل علشان بعد كده تحترم نفسك و متقلش ادبك علينا ..


على : والله لوريييكوا كلكوااا و هتشووفوا ايه اللى هعمله !!



المشهد الثانى

الام : رايحة فين يا بت يا فوزية ؟؟


فوزية : رايحة اجيب هدوم ..فيها حاجة دى كماان ؟!

الام : و هتجييبى ايييه يا ست هاانم ؟ و انتى لسة مطلعتيش من البيضة و كل

يوم و التانى عمالة تخرجى و تقوليلى بجيب هدوم !!

فوزية : يوووووه بقا يا حاجة .. هو كل يوم نفس الإسطوانة دى .. زهقت

بقاا .. غيرى الكلام شوية

الام : يللا ياختى من هناا امشى يللا ..

و من بير السلم .....

فوزية : الو يا " ريهام " انتى فين ؟؟

ريهام : انتى اللى فين انا مستنياكى من بدرى و معايا " تامر " و " رامى "

يللا يا بنتى شهلى شوية .. خلينا نلحق السينما ..


فوزية : خلاص جاية اهو مسافة السكة ..




المشهد الثالث ..

عماد : ايه يا واد ماالك مأريف كده ليه و مش على بعضك ؟!

على : دمااااغى حاسس انها هتنفجر يا عمااد .. ابويا امبارح قطع الخرزانة عليا

هو فاكرنى لسة صغير ولا اييييه ؟؟؟ دى بقت عيشى تقرف يا اخى !!


اووووووووففففففففف

عماد : الحل عندى يا واد انا هظبطك على الآخرررررر .. بس فكك انت من

حوار ابوك ده و طنش يا عم و سيبك منه ..

على : قووول يابنى ابوووس ايدك دماااغى مش قااااااادر ..

عماد : خد دى ..

على : ايه دى !! سجاير .. لأ لأ لأ يا عم انا مبشربش و مش عايز اشرب ده

ابويا لو عرف يقتلنى ..

عماد : ايه يا واد انا قولتلك انك هتدمنها ؟؟ لأ جرب واحد بس و صدقنى

مش هتندم و هتعمل دماااغ انما اييييه و هتعمرلك الطاسة كماان يا عم


على : لا يا عم برضو مضمنش ..

عماد : يادى النيلة عليك .. يا واد ده نوع معتبر ...

على : نوع ايه ده يعنى ؟؟


عماد : ملكش دعوة انت تشرب و انت ساكت خاالص ..

على: طيب هات اما اجرب .. ميضرش برضو !!

و " على " طاوع " عماد " و الواحدة جرت اتنين جرت تلاتة جرت العلبة

كلــها !!



المشهد الرابع ..

الحاج : رايح فين يا " على " ؟؟ انت يابنى مبتزهقش من الخروج كل يوم ده

؟؟ و بعدين تعااالى هنا !!!!


ايه السواد اللى تحت عينك ده ؟؟ و مال وشك مصفر كده ليه و خاسس

كده ليه يابنى ؟؟


انت عيان يا " على " ؟؟

على و هو بيتمايل : لالالا مش عيان ولا حاجة .. ده بس من السهر !!

و الحاج عبد الرحيم صدقه !! و سابه ينزل و هو فى الحالة دى ..


على : عمااااااااد انا هموووووووووت هات سيجارة !!

عماااد : لا يا حلو .. من النهادره كله بحسابه ..


على : يعنى ايييييه ؟؟ بقولك هموووت دماغى خلاااص هتفرقع ..


عماد : لحد كده يا صاحبى و كنت بديلك الصنف ببلاش .. اما انا دلوقتى


فلست و ابويا مش راضى يدينى الفلوس .. هات فلوس و انا اجبلك


مش معاك خلااص يبقا تستنى بقاا

على : صنف !!! صنف اييه ؟؟ هو ايه اللى انا بشربه ده ؟

عماد : لهوا انت لسة متعرفش يا نوغّا ؟!!


ابداً اللى بتشربه ده ( حشيــش )


ضحكتنى و انا مليش نفس

على : يعنى اييييييييه ؟؟


انا ( مدمــــن مخدرات ) !!!!!!!!!!!!!!!!



نكمل الحلقة الجاية مع تحياتى The_Mask

[CError]

جاري القراءة ومنتظرين وجزاك الله خيرا

[The_Mask]

(( الحلقة الثالثة ))

المشهد الأول

رجع " على " للبيت و كانت حالته حااااااااالة ..

على : يا بابا انا عايز فلوس !!

الحاج : ليه يا واد عايزهم فى ايه مش لسة مديك مصروفك اول امباح ؟؟

على : خلصوا .. كل حاجة غليت يا عم الحاج .. محتااااج الفلوس اووى الله يكرمك .


الحاج : محتاجهم فى ايه الاول ؟؟

على : هاا؟؟ آآه .. اممممممم ..

الحاج : متنطق ياللا ..


على : آآه .. واحد صاحبى البيت وقع عليه هو و امه و قاعدين فى الشارع فإحنا بنلم فلوس من بعض علشان نساعدهم .


الحاج : طيب إذا كان كده ماشى .. خد الفلوس اهى .

على : طب سلاااام انا بقا ...

عماد : قشطة علييييك يا ابو على .. هات الفلوس و انا اديك الصنف .


على : خد بسررررعة ابوس ايدك ..


عماد : ده انت باين عليك غرقان لشوشتك ..

عماد و على كانوا واقفين جمب المخزن اللى فيه " تجار المخدرات " اللى بيشتروا منهم ..

و فجأة !!!!!!


كلـــه يقف مكانه .. محدش يتحرك !!!!!!!

امسك العيال دى يا شاويش بسرررعة ..

عماد : الحق ياض كبســــــة ..

على : يانهااااااااااااااااااااار اسوووووووووح !!


عماد : اجررررررررررررى بسررررررعة ..

على و عماد جريوا بسرررعة جدااا و عرفوا يتوهوا كويس ظباط البوليس لأنهم عارفين المنطقة اكتر منهم ..


على _ و هو بينهج _ :

عماد : آآآه يا قلبــى يآآآنا ..

على : هنتصرف ازاى دلوقتى ؟؟؟

عماد : يللا كل واحد فينا على بيته عدل ..

و روحوا البيت هما الاتنين .. لكن المرة دى ربنا ستر ..

و دى كانت رسالة من ربنا ل " على " يمكن يفوق من اللى فيه !

لكن .........................



المشهد الثانى

الام : كنتى فين لحد دلوقتى يا فوزية الساعة 10 يا بت و انتى خارجة من هنا العصر ..؟؟؟؟

فوزية : ايه ؟؟ آآه !! مانا قولتلك كنت بجيب هدوم و بلف بقا و كده ؟


الام : و فين الهدوم دى ؟؟


فوزية : نعــم !


الام : انطقــى لجيب رقبتك .


فوزية : لا ابداً .. ده انا فضلت الف لف .. لحد اما رجلى ورمت و ملقتش

الحاجة اللى انا عيزاها فرجعت و هبقا اروح يوم تانى ان شاء الله .

الام : قسماً بالله يا بت يا فوزية لو بتضحكى عليا لهوريكى النجوم فى عز الضهر و ادينى اقسمت .


فوزية خااافت وقتها لأمها تعرف .. و بطلت خروج من البيت ييجى اسبوع كده ..

ريهام : ايه يا فوزية فييييييييينك ؟؟ " رامى " بيسأل عليكى .. و بيقولى انه بيتصل بيكى ع التليفون و مش بتردى .!!


فوزية : امى بتشك فيا .. ف " هديت " اللعب اليومين دول .. فترة و هتعدى اصبرى ..


ريهام : طيب اما اشوف آخرتها معااكى ,, انا هكلم رامى و اطمنه عليكى

لحسن ده كان هيموت من القلق عليكى .




المشهد الثالث ..

فى المدرسة الثانوية ..


وقف على جمب سور المدرسة مش قاااااادر يتحرك ولا قادر ياخد نفسه !
و ده كان فى حصة الالعاب ..

محمود : ايه يا على مالك ؟؟ انت تعبان ؟


على : هاا ؟؟ لالالا ابداً .. ده بس من المجهود


محمود : طب ما كلنا عملنا نفس المجهود و عارفين نصلب طولنا اهو ..

>> الله اكبــر .. الله اكبـــر <<

الآذان أذن .. تيجى معايا يا " على " نصلى الضهر ؟؟

على : اصلى !!!!! لالا انا مش متوضى

محمود : و فيها يه ؟ تعالى نتوضى انا و انت و نروح نصلى مع بعض .


عماد : فى ايه يا " على " مالك ؟؟ و واقف مع المكلكع ده لييه ؟؟

محمود : الله يسامحك يا عماد مش زعلان منك برضو :)


عماد : يا عم روح العب بعيد .. عملت ايه فى الواد يا كلاكيعووو .. ؟


على : بس بقا انت و هو انا مش قادر .. حاسس انى همووووت ..

و فجأة ..


وقع " على " من طوله على الأرض ..

جُم المدرسين شالوه و ودوه عند ( طبيب المدرسة )

عماد : يالهوووووى ؟؟!! ده راح عند الدكتور و هيكشفوا عليه .

محمود : ماهو ده اللى لازم يحصل !! هو فى ايه ؟؟

عماد : اسكت انت مش فاهم حاجة ياعم .. دى وقعتنا سودة

محمود راح مع " على " عند الدكتور .. و عماد مراحش علشان الدكتور ميحسش بحاجة هو كمان ..


الدكتور : قولى يا " على " انت بتشرب حاجة ؟؟

على : حاجة !!! حاجة ايه يا دكتور ..

الدكتور : لازم تعملى تحليل دم بسرررعة .. و نعرف فيك اييه ؟؟

على : لالالا انا كويس و مفييش اى حاجة .. ده شوية ارهاق بس .


الدكتور : ارهاق !!! ارهاق ايه اللى يعمل فيك كده ؟؟ قول الكلام ده لميكانيكى مش ( دكتور ) ..

اتصلوا بوالد " على " بسرعة " ييجى يشوف ابنه ماااله ؟

على _ فى سره _ : انا ضعت !!!



و نكمل الحلقة الجاية ان شاء الله .. مع تحياتى The_Mask

[The_Mask]

بسم الله الرحمن الرحيم .. توكلت على الله

(( الحلقة الرابعة ))



المشهد الأول

الحاج عبد الرحيم : و عليكم السلام , مين معايا ؟؟

الدكتور : معاك دكتور أحمد يا حاج .. ابنك " على " وقع من طوله فى حصة

الألعاب و لازم تتجى علشان تعمله شوية تحاليل و نطمن عليه .

الحاج : " علــى " ياااارب استر .. طيب طيب انا جاى حااالاً .

وصل الحاج المدرسة و دخل يشوف " على "

الحاج : ايه يابنى مالك ؟؟

الدكتور : تعالى يا حاج عايزك فى كلمتين كده على جنب ..


الحاج : خير يا دكتور !!

الدكتور : بص انا هكلمك بصراحة لأن ده واجبى .. ابنك بيتعاطى حاجة ؟؟


لحاج : ؟؟؟؟؟؟؟؟؟!!!!!!!! يعنى ايييييه !!!!

الدكتور : احنا لازم نعمل تحاليل الأول عشان نتأكد و بعد كده نشوف حل ...


الحاج : .......................

الدكتور : مالك يا حاج فى ايه ؟؟

يا حاج ..

يا حاج ..


فى ايييه ؟؟ مااالك !!

الحاج _ و هو على الأرض _ : ابنى الوحيد بيشرب مخدرات !!

يا خسارة تربيتى فيه , يا خسارة تعبى فيه ...

آآآآآه ... ياااارب ارحمنى ..

الدكتور : قوم يا حاج خد الدوا ده عشان الضغط !

و رجع " الحاج عبد الرحيم " البيت .. و ساب " على " فى معمل التحاليل ..


الأم : خيييير يا حاج " على " عامل ايه طمنى ؟؟

الحاج : عمله اسود و مهبب على دماغه


الأم : فى ايييه الواد ماله رد عليا ؟!!


الحاج : ابنك بيتعاطى مخدرات .. ابنك البكر هنلف بيه دلوقتى على المصحات

علشان يتعالج و هو لسة مطلعش من البيضة ..


الأم : يالهووووووووى !! ابنى ؟؟!! ابنى انا ؟؟

فوزية : ايه يا ماما فى ايييه ؟؟

الأم : اخوكى مدمن مخدرات يا فوزية ..!!


فوزية : انا كنت حااسة ان الواد ده وراه حاجة .. حسبى الله و نعم الوكيل

فيك يا عماد ..

الحاج : انا رايح معمل التحاليل دلوقتى .. و معرفش هرجعلكم امتى ؟؟




المشهد الثانى

الدكتور : متخافش يا حاج نسبة الهيروين فى الدم مش خطيرة للدرجة ..

يقدر يتعالج فى اسبوعين بس فى اى مصحة ..

على : سامحنى يا بابا .. انا آسف ..

"على " محسش بنفسه إلا و لقى ( قلـم ) محترم من الحاج طرقع على وشه



>> يستاهل <<

الحاج : اسكت خاااالص مش عايز اسمع حسك !!

يللا بينا على اى مصحة تاخدك و اخلص منك يا شيخ ..


و راح " الحاج " مع " على " المصحة ...


على : يا بابا ,,, يا بابااااااااا متسبنيش هنا لوحدى يا باباآآآآآآآآ ..


الحاج : هجيلك بكره يا بنى .,, خليك راجل بقا و اتعالج زى ما كنت راجل

و انت بتشرب ..!


الحاج : هجيلك بكره يا بنى .,, خليك راجل بقا و اتعالج زى ما كنت راجل

و انت بتشرب ..!




المشهد الثالث

و فى يوم الخروج ..


محمود : حمدلله على السلامة يا وحش :))

على : الله يخليك يا حودة

الأم : بصراحة يا " على " محمود مكنش بيفوت يوم إلا و يسأل عليك ..

على : مش عارف اودى جمايلك فين يا حودة ! انت احرجتينى والله .. بقا انا

اللى كنت مش بطيقك و كنت علطول ادايقك بكلامى و اشتمك تعمل معايا

ده كلــه !!

بجد انت انسان جميييل و صديق مخلص و وفى

محمود : يا حبيب قلبى ده واجبى , الرسول عليه الصلاة و السلام أمرنا بأننا

نعود المريض و ده من حقك عليا .. و ربنا قال " إنما المؤمنون إخوة "

و كمان من أحب الأعمال إلى الله " سرور تدخله على مسلم "

انا بس بنفذ كلام ربنا و الرسول عليه الصلاة و السلام :)

و انا الكسبان مش انت

على : عليه الصلاة و السلام :))

ماشى ياعم اديك اخدت ثواب على حسابى انا مردودالك يا حودة :)


الحاج : يللا يا " على " عشان نروح البيت بقا ..

على : حاضر يا بابا ,, بابا ؟؟

الحاج : نعم

على : انت زعلان منى ؟؟


الحاج : خلاص يابنى مش زعلان ولا حاجة المهم انك تكون اتعلمت من

خطأك ده و ميتكررش تانى ... و كمان انا و امك راجعنا نفسنا ولقينا اننا كنا

من الأسباب الرئيسية انك تعمل كده .. يللا بقا بلاش غلبة هبقا اشرحلك

الموضوع ده بعدين :))




و نمكل الحلقة الجاية إن شاء الله :) مع تحياتى The_Mask

[_HitIer_]

الله ينور قريتوا كلوا والله العظيمـ جميل يا ماسك ^ ^
بس الغريبة ان منتدى اغلب ال فيه Spam, محدش رادد لحد دلوقتى ليه
استمر يا حوبى وان شاء الله تكون فى يوم من الايام مشرف ف الدينى

[The_Mask]

بسم الله الرحمن الرحيم .. ازيكم عاملين ايه يا شباب . يلا نكمل الحكاية "صلى على النبى ياض منك ليه قبل ما تقرا "

(( الحلقة الخامسة ))

المشهد الأول ..

وصل " على " البيت و استريح شوية .. و بعين راح يكمل كلام مع الحاج ..

على : يا بابا انا آسف مرة تانية :(

الحاج : خلاص يا " على " المهم تكون اتعلمت من خطأك ده و اوعاااك

تكرره تانى و لا اشوفك تمشى مع الصايع اللى اسمه " عماد " ده !!

مااااله " محمود " ادب و أخلاق و دين .. بالله عليك يابنى عايز اطمن عليك

قبل ما اموت .. صاحب صـح .. الاصحاب والله بيودوا فى داهية لو

اختارتهم غلـط .. خلينى اموت و انا مطّمن عليك ..

على : بعد الشر يا بابا , متقولش كده ..

الحاج : بلاش بقا تجيب فى سيرة الموضوع ده كتير , يللا بينا نتعشى ..

و على السفـرة ..


الحاج : اومال فين فوزية يا ام على ؟؟؟

الام : هاا !! آآه .... اكيد راحت تذاكر عند واحدة صاحبتها متقلقش يا حاج !


الحاج : مقلقش !!!

هو ايه ده اللى مقلقش ؟ هى قالتلك انها خارجة ؟؟

الام : آآه ,, ايوه قالتلى >> الام بتكذب <<

الحاج : ابوس ايدك يا ام على تخلى بالك من البنت .. دى البنت " سمعة "

و لو انتى اللى مأخدتيش بالك منها مين اللى هياخد بس ؟؟؟

الام : متحملش هـم انت بس .. روّق كده و ان شاء الله كل حاجة هتبقا تمااام ...


على : انا ليا تصرف تانى معاها البت دى !!

الساعة 10 بالليل ..

فوزية رجعت و اول ما دخلت من الباب , " على " شدها من شعرها و وقعها على الأرض ..


على : كنتى فين يا بت لحد دلوقتى ؟؟؟

فوزية : انت مالك انت , انت ملكش كلمة عليا طول ما بابا عايش ! فاهم ولا لأ ؟؟


على : لأ ليا ياختى , مادام محدش عارف يشكومك فى البيت ده انا بقا اللى هوريكى العين الحمرا ..


فوزية : مبقاش إلا انت إلا تقولى رايحة فين و جاية منين ؟؟ يا مدمــن المخدراااات !!!


على وقتها شااااط عليها و مسكها ضربهـا و اداها علقة محترمة و الحاج

والحاجة معلقوش على اللى عمله ..

على : هااا يا بت هتنطقى كنتى فين ولا اخلى وشك شوراع عشان تحرمى

تنزلى الشارع تانى ؟؟

فوزية : يا مامااااااا , يا بابااااااااااااا حوشوا المجنون ده عنى !!


على : محدش حيحوشك عنى يا ست هاانم .. على العموم انا هعرف بطريقتى !!!




المشهد الثانى ..

فى المدرسة

عماد : ايه ده !! " ابو على " بالحضـــن يا بطـل :))

على : واحشنى والله يا عماد , فينك يابنى مكنتش بتيجى تزورنى ليه ؟؟


عماد : ازورك !!

ليه ؟؟ انا اتجننت

انت ناسى ان دى مصحة و لو دخلت هتقفش فيها انا كمان و هتبقا ليلتى سودا

المهم انت ايه اخبارك دلوقتى ؟؟


على : الحمد لله أحسن بكتيير انا كنت فين و بقيت فين ؟

عماد : يعنى خلاص بطلت ؟؟

على : آه طبعاً , انت عايز ابويا يقتلنى ؟

محمود جاى عليهم ..


محمود : حمدلله على السلامة يا " على " المدرسة نورت يا عم :)


على : ده نورك يا حودة

عماد : حودة !!! من امتى ده ؟؟

على : من النهادره يا سيدى , بجد محمود ده انسان جمييل جداااً :)


عماد بإستهزاء : لا بجـد

انت هتبقا منهم ولا إيه يا " على " ؟؟

على : يعنى ايه منهم ؟؟

عماد : لاا متاخدش فى بالك :)

محمود اتضايق من كلمة عماد لكن كظم غيظه و تذكر حديث الرسول صلى

الله عليه و سلممحمود اتضايق من كلمة عماد لكن كظم غيظه و تذكر حديث الرسول صلى

الله عليه و سلم

و ابتسم فى وجهه

عماد : اهو انت متعرفش تعمل حاجة فى حياتك غير الإبتسامة المستفزة

بتاعتك دى !! ايه اللى يضحك يا عم انت ؟؟ انت علطول منشكح كده!! فى

ايه ؟ انت مبتتضايقش ؟ ولا بتزعل ؟ ده انت كائن فضائى عجييب يا اخى !!

شوف الوا يا اخواتى عمال اهزق فيه من الصبح و هو شغال يوزع إبتسامات !!

ماهو من ضعفك انك مش قادر ترد عليا .. يا ضعييف يا ضعييف ..

محمود : الله يسامحك

عماد : الواد يا هيجننى , يا هيموتنى بغيظى

على : .. طب استأذكوا انا بقا علشان اروح ..




المشهد الثالث ..

على روح البيت و قبل ما يطلع الشقة شاف " فوزية " و هى نازلة ..

راح و مشى وراها عشان يعرف بتروح فين ؟؟

و فضل ماشى وراها ييجى محطتين .. و عند الموقف ..

لقاها راحت سلمت على واحد كان واقف مستنيها ! و بيضحكوا و بيهزروا مع بعض ادام كل الناس ..

" على " دمــه غلى , و معرفش يعمل ايه ؟؟

هل يروح يجيبها من شعرها ادام الناس و يدى كيس الجوافة اللى واقف معاها

ده علقة محترمة و يفضح اخته ادام الناس ؟؟ , ولا يستنى لحد اما ترجع البيت

و وقتها يشوف شغله معاها و برضو مش هينسى كيس الجوافة ؟!

على اختار الإختيار التانى ... و شوية ومشيت فوزية مع كيس الجوافة :)

اقصد الولد اللى معاها ..

و على رجع البيت و هو بيفكر هيعمل اييه ؟؟

يقول للحاج .. اللى لسة تعبان من صدمته فيه ؟!!

ولا لأمه اللى شايلة الهـم علطوول ؟؟

على فى نفسه : لأ انا هتصرف فى الموضوع ده من غير اما اى حد يحس !!



المشهد الرابع ..

فى المدرسة .


محمود : علــى ازيك يا حبيبى عامل ايه ؟

على : تماام الحمد لله :)


محمود : بقولك ,انا سمعت امبارح الشريط ده و عجبنى جداً .. قولت اديه

لصاحبى و حبيبى يسمعه زى :)))

على : شريط لمين ؟ انا ليا فى نانسى و إليسا و هيفاء

محمود : نعــم !!! مين دووول ؟؟

لا يابنى ده شريط لشيخ اقصد .


على : شيخ ؟؟!! آآه ,, لالالا مش بسمع معنديش وقت ..

محمود : يا عم مش هياخد من وقتك حاجة :)) اسمع كلاااامى الله يكرمك :)

على : حاضر يا عم عشان خاطرك بس .. هات الشريط ..

محمود : اتفضل




العنوان شــد " على " .. يا ترى هيروح البيت هيعمل ايه مع " فوزية " ؟؟

و هيسمع الدرس اللى محمود اداهوله و هيتأثر بيه ولا لأ ؟؟

ده اللى هنعرفه فى الحلقة الجاية ان شاء الله :)

[The_Mask]

بسم الله الرحمن الرحيم .. ازيكم عاملين ايه يا شباب . يلا نكمل الحكاية "صلى على النبى ياض منك ليه قبل ما تقرا "

(( الحلقة السادسة ))

المشهد الأول ..

فى البيت

الحاج : فوزية فين يا " ام على " ؟؟!

الأم : هاا !! آه هى راحت الدرس و لسة مرجعتش .. زمانها جاية يا حاج

متقلقش :)


الحاج : مقلقش !!! ربنا يستر ..


" على " كان مستنى فوزية فى البلكونة لحد اما تيجى ..


و لما رجعت " على " مكلمهاش و استنى لحد الصبح عشان يشوف شغله معاها .

تانى يوم كان الحاج رايح يقبض المعاش و راحت معاه " ام على " ..

الأم : خلوا بالكم من نفسكم يا عيال احنا شوية و راجعين علطول ..


فوزية : تروحوا و ترجعوا بالسلامة يا ماما ..


دخل " على " اوضة فوزية ..

على : كنتى فين امبارح بعد المدرسة يا بت ؟؟

فوزية : هاا ؟؟ آآه .. كنت فى الدرس هكون فيين يعنى ؟؟


على : بت انتى مترديش عليا سؤال بسؤال !! جاااوبى لحسن اوريكى شغلك انهارده !

فوزية حست ان " على " عارف حاجة ..

ارتبكت و خااافت ..

على : بقولك ايه من الآخر كده انا عارف انتى كنتى فين و مع مين ؟؟

فوزية : ايه اللى انت بتقوله ده ؟؟ انت اتجننت ولا ايه ؟؟

على مسكها من دراعها جاااامد و كان هيكسره فى ايده ..

على : انطقى يا بت بدل ما اكسرلك ايدك اللى بيمسكها دى !

مين اللى كنتى معاه و اسمه ايه ؟ و ساكن فين ؟؟؟


فوزية : حااضر حااضر هنطق و هقول كل حاجة بس سييييب ايدى ابوس

رجلك حرااام علييييييك يا شيخ !


على : اهو .. سبتها , يلا انطقى بقا ..

فوزية بتعيط !

على : بصى شغل البنات و السهوكة ده انا عارفه كويس مش هيخيل عليا يا

اختى يا بنت امى و ابويا !!


فوزية : ده صاحبى " علاء " انا و هو بنحب بعض و متفقين على الجواز ..

على مقدرش يمسك نفسه ..

ضربها بالقلم على وشها و نزل فيها ضررررب ..

على : جواز !!! جواز ايييييييه يا متخلفة يا هبلة انتى فكراه هيتجوزك ؟؟

ده بيتسلى بيكى يا شيخة الله ياخدك حطيتى دماغنا فى الطين منك لله !!

آدى دقنى اهيه لو دخل البيت من بابه !! هو انا مش ولد و عارفهم بيفكروا ازااااى ؟؟

ابوكى لو عرف يموت فيها ده عنده القلب , هتجبلنا الوكسة منك لله ..


و " على " شغال ضرب فى " فوزية " لحد اما لجيران كلهم اتلموا عليهم ..

و عمالين يخبطوا الباب عشان يشوفوا فى ايه ؟؟


الجيران : افتحى يا " ام علـى " فى ايييييه ؟؟

فتحلهم " على " ..

على : لا يا حاجة مفيش حاجة , بس اختى سقطت فى الامتحان فبأدبها شوية !!


الجيران : طب يابنى براحة علها حراام عليك !!

على : حاضر حاضر

و قفل الباب فى وشهم ..

هدى " على " شوية و سكتت " فوزية " من العياط و الصويت ..


على : حسك عينك اشوفك خرجتى بره المدرسة حتى ..

من انهارده مفيش دروس ! و مفيش خروج إلا للمدرسة ..

لا كده يا إما هقول لأبوكى و تبقا ليلتك اسود من قرن الخروب و هخليه

يوريكى النجوم فى عز الضهر !!


فوزية : حاضر حاضر يا على صدقنى مش هخرج ولا هكلم " علاء "

تانى ابووووس ايدك ساامحنى و متقولش لبابا ..





المشهد الثانى ...

فى المدرسة .

محمود : ابوعلــى :))) ايه اخبااااارك ؟؟؟

على : تمااام الحمد لله يا حودة :)


محمود : هاااا ؟؟ ايه الأخبار ؟ سمعت الشريط ؟


على : أخ !! لأ لسة والله يا حودة انشغلت امبارح والله و ملحقتش ..


محمود : خلاص يا عم ولا يهمك :))) المهم تسمعه فى اقرب وقت .. عشان

اديك واحد تانى

انا خلاص استلمتك

على : ههههههه مااشى يا حودة :)


عماد : اييييه يا على هو كل اما اشوفك الاقيك قاعد مع كلاكيعو ؟؟


على : عماد لو سمحت بلاش تريقة ..



عماد : نعم نعم ؟؟ ايه اللى غيرّك كده يا على ؟؟

آآه من لقى أحبابه نسى أصحابه ..

ماشى يا كبير انا ماشى ..


على : استنى بس يا عماد ؟؟ قولى بس انت ليه بتكره محمود ؟؟ انا فى الأول

كنت زيك بس دلوقتى خلاص حاسس انى اعرفه من زمااان بجد انت لو عرفته

هتحبه اووى :)

عماد : يا عــم روووح > <




المشهد الثالث

و " عماد " كان ماشى بيعدى الطريق ..


جت عربية مسررررعة جداً


خبطت عماد


وقع فى الأرض و كان بينزف ..


الناس فى الشارع : لا حول ولا قوة إلا بالله !!


طلبوله المستشفى و " على " و " محمود " معااه

عماد داخل اوضة العمليات ..


محمود بيقرأ قرآن و بيدعى ربنا يقومه بالسلامه و يشفيه


خلااص داخل الأوضة ..

محمود و هو مبتسم : متقلقش يا ميدو ربنا معااك ياارب انت حديد اهو ماشاء

الله دى شوية خدوش بسيطة ياعم :) , هتقووم بالسلامة بس انت قول ياارب ..

عماد بصوت منخفض جداً : ياارب ..


و بعد ساعة خرج الدكتور من اوضة العمليات ..

الدكتور : محتاجين حد يتبرعله بالدم يا شباب


محمود : معاك يا دكتور انا فصيلة دمى O

الدكتور : طب يلا معايا ربنا يكرمك


محمود اتبرع بالدم لعماد و مترددش لحظة ...


عماد الحمد لله قام بالسلامة و بقا كويس ..

أهل عماد جم و شكروا محمود كتيير على وقفته مع عماد ..

كان كل يوم " على و محمود " ييجوا يزوروا عماد فى المستشفى ..

لحد اما خف و بقا تمااام ...

عماد : محمود

انا متشكر اووى على وقفتك جمبى دى ..

انت ايييه يا أخى ؟؟ كائن فضائى عجيييب ؟؟ هههههههه

محمود : ههههههههههه ايوه هو العجيب ده

يا بنى ده واجبى متشكرنيش على حاجة :)

انت زى اخويا يا ميدو ^^


عماد : بجد انا وشى منك فى الأرض ..

محمود : لا فى الأرض ولا فى السما يا عم .. خلاص بقا ..

صافى يا لبن :)))

عماد : حليب يا قشطة



و نكمل الحلقة الجاية ان شاء الله :)