سحب ملف الالتحاق بالكليه الحربيه والكليات والمعاهد العسكريه , أول يوم لك فى الكليه الحربيه

[!_ToGoO_MorY_!]

فى البدايه الموضوع منقول بس فقط للأفاده

ودلوقتى الملف ثمنه 100 جنيه مش 90 زى ما فى الموضوع

ثانيا الموضوع مفيد جدا للى عاوز يقدم فى الكليه

ثالثا : نبدأ ببسم الله ^^




نبدأ بسم الله والصلاه والسلام على رسول الله

الأول بس عايز أقولك لو انت ثانويه عامه أو فى الدراسه عامه , انصحك طول فتره دراستك تهتم بدراستك أكتر وماتخليش تفكيرك بالتقديم للكليه الحربيه أو لكليه من الكليات العسكريه يتملك تفكيرك لدرجه تخليك تهمل فى دراستك , فيمكن فعلاً درجتك الى تجيبها تفرق معاك فى التقديم فى قبولك فى احدى الكليات العسكريه , ولأنه للأسف البعض بيعتمد ع ان تنسيق الكليات العسكريه أو كليه الشرطه بيكون منخفض فى الدرجات .. فبيقولك أقدم فيها علشان كدا , فانت مش ضاامن انك تتقبل خليك منطقى واعمل الى عليك فى كل النواحى وماتقصرش فى حاجه , عل وعسى يكون لك الخير فى أى منهم إن شاء الله .

تماام . المفروض بقى دلوقت انت خلاص توكلت ع الله ونويت انك تقدم للكليه الحربيه ان شاء الله السنه دى 2013 وتتمنى انك تتقبل ان شاء الله فى أى كليه من الكليات العسكريه , فتابع بقى معايا واحده واحده وانا ان شاء الله هحاول أقولك ع كل الى انت عاوز تعرفه .


المفروض ايه هى أول حاجه هاعملها خاالص ؟


المفروض أول حاجه تعملها خالص بعد ماخلاص نويت تقدم ان شاء الله , هى انك تقرأ الشروط العامه الى لازم تتوافر فى الطلبه والشباب الى راغب الإلتحاق بالكليات والمعاهد العسكريه علشان أصلاً ماتنيش حلمك من الأول ع باطل - فى حال بعض الشروط مش مطابقه عليك ومش هاتسمحلك بالقبول بالكليات العسكريه -, والشروط دى الى اتكلمنا عنها فى الصفحات الى فاتت ممكن ترجع تشوفها لو ماشوفتهاش
والى يعنى أهمها انك تكون مصرى من أبوين مصريين وجدين بردو مصريين عن طريق غير التجنيس ( يعنى مصرى أباً عن جداً ) .
طيب انت بقى بعد ماتقرأ الشروط دى , حاول تطبقها ع نفسك , سواء المجموع الى مطلوب منك , والى تقريباً 70% , أو اللياقه البدنيه الى طبعاً هاتعدى بيها الإختبارات بتاعت الكليات العسكريه أو اختبارات كليه الشرطه , وهنا طبعاً بتسمع كتير عن الأكاديميات التدريبيه دى , والى أعتقد انك مش بحاجه خالص ليها ولا أى حاجه , عادى انت لو تمام وبتعرف تجرى وكدا وعندك بعض اللياقه والشروط التانيه بتتطبق عليك , انت ممكن تشتغل ع نفسك , وع فكره والله بردو عادى فى ناس بيتقبلوا لياقتهم أقل مليون مره من ناس طلعوا من الإختبارات ( يعنى زى مابقول هى بردو قسمه ونصيب ) بس لازم يكون عندك الحد الأدنى من اللياقه , والى ممكن تشتغل عليه بسيط مع نفسك سواء بالتمرينات الرياضيه أو أى الألعاب الرياضيه , وياسيدى يعنى مش أحسن لك انك تحافظ ع لياقتك الرياضيه لنفسك ولصحتك حتى بعيد عن الكليه الحربيه أو كليه الشرطه , كمان لو حاجه زى السباحه فى الإختبارات لو مش بتعرف تعوم وكدا , جهز نفسك ليها وفى الوقت دا بيكون الأنديه الرياضيه الى فى المدينه بتاعتك , بيكونوا فاتحين الباب للحاجات زى دى , تعليم سباحه أو تدريب ع قفزه الثقه , وزى لو عندك مشاكل فى الوزن وكدا حاول تجهز نفسك للحاجات دى , وأعتقد المعظم أو فيه طلاب كتيير أصلاً مابيحتاجوش ولا لأى حاجه من دى وتمام كل دا متوافر فيهم والحمد لله.




بعد تتطابق الشروط عليا إيه هى أول حاجه المفروض أعملها فى تقديمى للكيه الحربيه ؟
فأول حاجه ياسيدى بعد مانويت خلاص التقديم للكليه الحربيه وقريت الشروط العامه الواجب توافرها للتقديم ولقيتها متتطابقه عليك وكله تمام , هى انك تتابع بقى الأخبار وتستنى الإعلان عن ميعاد فتح باب القبول بالكليات والمعاهد العسكريه وفتح باب سحب ملف التقديم .

طيب وفتح باب سحب ملفات التقديم بيبقى إمتى كدا ؟


فتح باب القبول وفتح باب سحب الملفات , تقدر تتابعه مع أواخر شهر 6 وأول شهر سبعه , يعنى على آخر امتحانات الثانويه العامه , زى السنه الى فاتت 2012 كان فى 29/6 , وماتقلقش يعنى دا بيبقى يوم مصر كلها متابعاه , لأنه طبعاً عدد كبير من أبناء الشعب المصرى بيقدم للكليه الحربيه , فساعت فتح باب التقديم بيكون الخبر منتشر وهاتسمع عنه , وكمان ان شاء الله احنا مع بعض فى الصفحه الى ع الفيس بوك هانبقى نعلن ع طول عن فتح التقديم أو مايتم فتح التقديم فعلاً .
والباب انفتح بالفعل للتقديم


طيب بيفضل باب التقديم مفتوح لإمتى ؟

ماتقلقش بيفضل باب التقديم وسحب الملفات مفتوح لمده طويله وكافيه جداً انك تكون عرفت وفكرت أكتر من مره وقررت كمان .
فهوا زى ماقلتلك بيفتح من تقريباً أول شهر 7 , وبيفضل حوالى شهر أو حتى شهر ونص ودا بيكون حسب التقديم والأعداد الى بتقدم وبيبقى فيه امكانيه لمد فتره التقديم , زى السنه الى فاتت بردو , فضل باب سحب الملفات مفتوح لحد آخر شهر رمضان , يعنى لأول يوم فى العيد الصغير .. وكُل سنه وانت طيب ..:) , بس أنصحك تقدم فى فتره مش متأخره علشان يكون ليك أولويه فى الإختبارات وكدا .

وبعد الإعلان عن قبول فتح باب سحب الملفات والتقديم للكليه الحربيه , أعمل إييه ؟
أكيييد يعنى مش مستنى أقولك ( هاترووح تقدم ) , فتختار الوقت المناسب ليك علشان تروح تسحب ملف التقديم , وتجهز نفسك وتروح تسحب ملفك .
إيه المفروض أعمله قبل ما أروح أسحب ملف التقديم , وآخد معايا إيه , وإيه ماخدوش ؟
إحلق شعر راسك
خلاص انت حددت اليوم الى هاتروح تسحب فيه ملف التقديم , تروح تحلق شعرك , ومش لازم خالص يعنى , يعنى تقصر شعرك , وحتى لو ماحلقتوش عادى , بس مش يكون شكله فظيع ياجدع , هى الحكايه من انك تحلق شعرك انك هاتتصور فى اليوم دا , وصورتك دى هاتتحط فى الملف , والملف دا الى هايبقى بتاعك , والملف بتاعك دا الى هايتبص فيه من قبل الممتحنين فى الكليه , وأول ماهاتروح هناك هتلاقى ناس عمالين يقولوا عاوز تحلق وبتاع ومعاهم مقصات , وروايه , فبلاش توجع دماغك وظبط نفسك من الأول يعنى ظبط نفسك واحلق شعر راسك .
خد بطاقتك معاك
فالناس الى ف الثانويه عامه ولسه ماطلعوش البطاقه بتاعتهم وهايقدموا للحربيه , يروحوا يطلعوا بطايقهم , علشان الدخول فى الكليه الحربيه بيكون بالبطاقه , فانت هاتاخد البطاقه بتاعتك معاك وانت رايح تسحب ملف التقديم
علشان زى ماقلتلك مش بيدخلوا حد الكليه إلا بالبطاقه بتاعته .
ماتاخدش الموبايل بتاعك معاك
فهما فى الحربيه مابيدخلوش حد الكليه الحربيه بالموبايل بتاعه , أياً كان نوعه بيفتشوك برا ع باب الكليه قبل ماتدخل , ولو معاك موبايل بيقولك تسيبه برا , وساعتها بقى هاتحتاس فهتلاقى واحد أو أكتر واقفين برا الكليه وجايين بس علشان كدا , فيقولك لو معاك موبايل هاته أشيلهولك ع ماتخرج , وياخد منك ع الأقل 10 جنيه علشان بس خلى الموبايل معاه , فأحسن لك ماتوجعش دماغك وماتخدش الموبايل معاك , إلا لو كان حد هايجيى معاك الكليه ويفضل مستنيك برا ممكن تسيب موبايلك معاه .
هاتستخدم القلم الجاف
هاتستخدم القلم الجاف وانت بتسحب الملف بتاعك , ففيه هناك حاجات هاتكتبها , ممكن عادى تبقى تستلف قلم من حد جنبك من المتقدمين بردو , بس وليه ياعم , خلى حاجتك معاك وخلاص وبلاش كلمه هات دى , فانت خد معاك قلم جاف أزرق أو أسمر مش حكايه يعنى ,المُهم انه قلم .
اعمل حساب فلوس شراء ملف التقديم
افزى ماقلتلك ملف التقديم دا بيتشرا , مش بتسحبه كدا وخلاص , فانت بتشتريه , وثمن الملف (90 جنيه ) , ودا ثمن الملف الى كان السنه الى فاتت ( 2012 ) ممكن فعلاً ثمنه يزيد أو يبقى زى ماهوا 90 جنيه الله أعلم , بس ان شاء الله ع الصفحه هانبقى نعلن عن ثمن الملف السنه دى , ويعمواً يعنى هوا أكيد مش هايزيد عن 100 جنيه يعنى انت اعمل حسابك ع 100 للملف وخلاص , و ع فلوس المواصلات .



أروح على الكليه الحربيه أسحب ملف التقديم ع الساعه كام كدا ؟
الكليه الحربيه باب سحب الملفات بيكون مفتوح فى اليوم , من تقريباً الساعه 7 الصبح للساعه 2 أو 3 العصر .
فحاول تعمل حسابك تروح الكليه الحربيه بدرى علشان تسحب ملفك بدرى , قبل الجو الحر بقى , والزحمه الموووت , والى كدا كدا أصلاً هتلاقى زحمه وانت بتسحب الملف , بس بدرى بيكون أحسن والجو أحسن , فحاول تعمل حسابك انك تكون قدام الكليه الحربيه ع الساعه 7 أو 8 أو 9 أو حتى 10 الصبح , ولو اتأخرت شيويه يعنى الدنيا ماخلصتش بس المهم تلحق باب التقديم وتسحب ملفك بدرى قبل ماباب سحب الملفات فى اليوم دا يقفل .

طيب أصلاً إيه هى أماكن سحب ملف التقديم للكليات والمعاهد العسكريه وأروح فيين وإزااى ؟
سحب ملفات التقديم للكليه الحربيه , أو بالأصح يعنى شراء ملف التقديم للكليات والمعاهد العسكريه بيكون من 4 أماكن فى مصر وهما بس الى تقدر تسحب ملف التقديم منهم حسب موقع الكليه الحربيه والجيش المصرى وهما :
القـــاهـــره ( مصر الجديده ) , وهو المقر الرئيسى لسحب ملفات التقديم .
الإسكندريـه (بالمدرسه الرياضيه بسموحه ) .
أســيـــــوط (بقياده المنطقه الجنوبيه العسكريه ) .
إلمنـــيــــــا (بالمدرسه الرياضيه العسكريه ) .
وهـذة هـى الأمـاكــن الـوحيـــده المعتمــدة لبيــع الملفـــات الخاصـــة بالكليـــات والمعــاهـــد العسكـريـــة
ولهــا أسلــوب خــاص مـرقـــم تـرقيمــــاً خـاصــــاً .... فـلا تنخــدع بشـــــراء أى ملــــف مـن أى جهـــة أخـرى مستغلـــة
ولــن تقبــــل هـــذة الملفــــات أســاســـاً عنــد التقـديـــم . وأظن واضح الكلام واضح .

تمام ودا زى ماقلتلك زى ماموقع الكليه الحربيه قايل , بس أنا سحبت ملفى السنه الى فاتت من المقر الرئيسى دا الى ف القاهره , ودا الى معظم الناس بيسحبوا منه ملفات تقديمهم للكليات والمعاهد العسكريه , بالنسبه للمقرات التانيه بصراحه ماقدرش أفيدك فيها , ممكن الناس الى من المناطق دى أو الى حواليها , يقدروا يفيدوك فى الحاجه دى .

لكن المقر الرئيسى دا الى فى القاهره ( مصر الجديده ) دا ياسيدى الى ف منطقه صلاح سالم
فبُص بالنسبه للطلاب الى من المنصوره , هاتروح إزاى ياسيدى للكليه الحربيه ؟
طيب لكن أنا بقى أى حاجه أعرفها عاوز أقولها , يمكن فعلاً تفيد حد , فبالنسبه للطلاب الى من المنصوره يروحوا الكليه الحربيه إزاى ويركبوا مواصلاتهم منين وازاى ؟ ( لأنى من المنصوره ) .
فانت ياسيدى الفاضل هاتركب عربيات مصر من أى موقف بقى فى المنصوره أو تبع المنصوره وهاتدفع من المنصوره كدا 10 جنيه فى العربيه الى من المنصوره و 7 جنيه من أجـا :) لمصر , وتقريباً هاتاخد وقت ساعتين أو أزيد قليل أو أقل قليل , وتقله نزلنى عند الدائرى أو زى مابنقول عليها السلم , وبعدين تسأل عن أوتوبيس العاشر , هتلاقيه ع طول مكان مانزلت فى السلم , وهاتركب الأوتوبيس دا الأجره تقريباً بجنيه , تقريباً ربع ساعه أو 20 دقيقه وهاتنزل فى الآخر خالص عند العاشر ( يعنى تفضل راكب لحد ما الأتوبيس يقف ويقول كدا آخرنا ) فى العاشر ودا موقف , هتسأل ع أتوبيسات صلاح سالم , رمسيس .. الأجره تقريباً 2 جنيه , وتقريباً وقت 10 دقائق , تركب وتقوله نزلنى عند الكليه الحربيه , آخر السور , باب سحب ملفات التقديم , أى حاجه من دى , هوا بيكون عارف وهاينزلك عند الشارع بتاع الكليه الحربيه ,
تنزل وتروح بقى ياسيدى عند باب سحب الملف .
ولما تيجى تروح هاتقف آخر الشارع , وتركب أوتوبيس رمسيس بردو , وبردوا ب 2 جنيه , وتنزل بردو فى الآخر فى رمسيس ,
وتسأل ع عربيات المنصوره , وبس .
كـــل دا بقى فى الأيام العاديه وع طوووول , تقدر تروح الكليه الحربيه كدا ,
لكن أصلاً فى وقت التقديم للكليه الحربيه أو لكليه الشرطه , بيكون فيه عربيات مواصلات مخصوص توديك لباب الكليه الحربيه ( وطبعاً بيغلوا الأجره ) . فنفس الكلام هاتركب المنصوره مصر , وتنزل الدائرى , وهناك بقى عاوز تركب عربيات الكليه الحربيه , لو لقيتها , يبقى تمام , عاوز تركب زى ماقلتلك ف الأول بردو تمام . المهم تكون عامل حسابك ع فلوس المواصلات رايح جاى , والى تقريباً بتكون من المنصوره حوالى 35 جنيه . والوقت رايح حوالى 3 ساعات , وجاى بردو نفس الكلام .طيب لباقى الطُلاب فى كل محافظات مصر تروحه إزاى ؟
وربنا الأمر سهل وبسيط وماتقلقش من انك تروح مكان سحب الملف ازاى , فهتسحبه هاتسحبه .
بُص انت كل الى عليك تنزل القاهره وتسأل أى حد وأول واحد تشوفه تقوله أروح الكليه الحربيه إزاى , هتلاقيه هوا بنفسه ع طول يقولك عاوز تسحب الملف ؟ , وهتلاقيه بيشرحلك تركب ايه وتروح فين ,
الكل بيكون عارف انها فتره تقديم للكليه الحربيه , فكله هايدلك عليها . وتوصل لباب الكليه بكل سهوله ومن غير مشاكل خالص ان شاء الله
ونفس الكلام بردو بيكون عربيات مخصوص توديك سواء لباب الكليه الحربيه أو لكليه الشرطه .



المنظر قدام الكليه الحربيه , باب سحب ملفات التقديم ؟
تمااام دلوقت انت نزلت من الأوتوبيس أو الميكروباص أو العربيه الملاكى أو أى حاجه ياسيدى , المُهم انك نزلت دلوقت ووصلت بالسلامه لقدام الكليه الحربيه باب سحب الملف , هنــا بقى هاتشوف الزحمه بجد , هتلاقى ناااس زى ماقلتلك مقابلينك والى يقولك عاوز تحلق ياباشا , عاوز تشترى قلم ياباشا , معاك موبايل ياباشا , كُل دا بقى احنا مالناش دعوه بيه فاحنا مجهزين نفسنا وعارفين كل دا , فانت تماام , روح بقى ع باب الكليه , وقبل ماتدخل هايفتشك عسكرى فى الجيش زى ماقلتلك , علشان يشوف معاك موبايل أو أى حاجه , وهايدخلك بس ببطاقتك .

إيه بقى الى انا هاعمله داخل الكليه الحربيه لأول مره ؟

خليك عارف انك فى مكان للرجاله بس , مشيتك تكون باحترام , هدومك تكون معدوله , الحزااااااااااام يكون متدارى , وبلاش البوكسرات والحاجات دى , علشان هاتتعلق هههههههههه لو شافوا حد بالشكل دا . تمااام ؟ ,,,
طيب وبعد ماتدخل بقى إيه الى انت هاتعمله ان شاء الله جوا الكُليه ؟؟؟؟؟ فتابع بقى معايا واحده واحده ...

الأول هاتتجمعوا مجموعه مجموعه تحت مظله , ويتم القاء بعض التعليمات ليك وللى معاك
أول ماهتدخل الكُليه الحربيه , هتلاقى قدامك ع طول مظله , وفيها شبابا زييك وفيه ملازم أو ظابط بيكلم الطُلاب , وانت هاتدخل تقعد معاهم , الظابط دا هايتكلم شيويه هايقلكوا ع شيويه حاجات , زى انت ثانويه عامه , علمى ولا أدبى , شيويه تعليمات , ( ماتتشنجش قوى يعنى مش كل كلمه انت هاتسمعها عليك انك تحفظها ) عادى يعنى معظم الكلام عادى مجرد تعليمات ,
وبعدين هايقلكوا قوموا فى طابورين اقفوا , طابور الناس الى ف علمى , وطابور الناس الى فى أدبى ( وسواء انت علمى أو أدبى مش ماتقللش من امكانيه قبولك ) فعادى مُجرد لأن فى كليات بتقبل تخصصات وكليات تانيه لأ , وفيه كتير من أدبى بيدخلوا زى بردو كتير من علمى , فمتفكرش كتير فى دى .
المهم بعد ماتقفوا فى طابورين , هاتسمع بقى لأول مره الكلمه الى هاتسمعها طول مانت فى الكليه دى , وهى , ( ياطالب ) . هههههه يعنى هى كلمه مش غريبه ولا بتاع , وعادى مانت طالب وطول عمرك بتسمعها , لكن هنا هاتسمعها كتيييير , اجرى ياطالب , روح ياطالب , تعالا ياطالب .
وهايقلكوا اتحركوا فى الطابورين هاتروحوا فى مكان , لو فيه زحمه هاتقعدوا ع كراسى بقى ف الشمس وكدا , مافيش هاتدخل ع طول ع أول حاجه هاتعملها .
تقيس وزنك وطولك ويتسجلوا فى كارت الوزن والطول
وهى هاتكون الوزن والطول , ف وإنت فى الطابور بتاعك الأول هايوزعوا عليكوا ورق كدا , زى كارنيه ولونه أزرق فاتح تقريباً , وفيها خانه لإسمك , ولشعبتك فى الثانويه العامه ( علمى أو أدبى ) وخانه لطولك وخانه لوزنك , ومكان هايقولك أكتب فيه اسم رائد كدا أو عقيد , زى ماهيقولك
وبعدين وانتوا فى الطابور هايدخلكوا واحد واحد عشان مقاس الطول والوزن , ودا عادى هيكون أول مره بالهدوم والبالجزمه أو الكوتش الى انت لابسه ( يعنى زى مانت ) , وهايقيسوا طولك ووزنك , وهايتكتب فى الكارت الى معاك دا ,
والى هايبقى اسمه ( كارت الطول والوزن ) وهاتخليه معاك , علشان دا هايتحط فى الملف بتاع التقديم .
تشترى ملف التقديم
بعد مايتقاس طولك ووزنك وتكتبه فى كارت الطول الى معاك , هاتدخل ع شباك شراء الملف , بردو هاتكونوا فى طابور , وهايتقال بردو فى شباك لطلبه علمى وشباك لأدبى , ولما الدور يمشى ويجى عليك , وتشترى ملفك , هاتاخد الملفين , واحد أزرق كدا والتانى أبيض , ودول بيكون الأول دا فى المرحله الأولى من التقديم والتانى بتملاه فى المرحله التانيه من التقديم ( والى بتكون بعد اختبار الطبى أو الرياضى ) وهايديك كارت التردد , ودا بقى الى هاتدخل بيه ع طول بعد كدا للكليه وللإختبارات ( كارت التردد , وبطاقتك الشخصيه ) , وهايديك اسطوانه كدا بيكون فيها بعض المعلومات وفيديو عن ملء ملف التقديم -- وأكييد انت لازم تديله الأول الفلوس بتاعت الملف -- ( ال90 جنيه ) .
هاتروح تتصور
بعد ماتاخد ملفك , هايودوكوا ع لجان كدا , زى غرف كدا من الى بيتاخد فيها الدروس , وهاتقعدوا هايوزعوا عليكوا ورق , ويقلكوا اكتبوا فيه لجنه كذا فصل كذا , ودى هتبقى لجنتك , ودى الى فى الآخر هاتستنى فيها الصور الى هاتتصورها كمان شيويه , بعد ماتكتب فى الورقه , هايقولك اقطعها نصين , وبعدين هايدخلكوا واحد واحد ع التصوير .
والتصوير بيكون بوضع معين , فهيقولك اقف ع مكان كدا جنبه مقاس طول , ويقولك افرد دراعاتك واقبض كفك , واقف مستقيم واعمل رجلك على شكل سبعه مفتوحه من عن أصابع رجله ( يعنى المهم انها وضعيه كدا سهله بيكون عاوز منها يشوف بعض الحاجات ) زى التقوص والطول .
وتقريباً هاتكون 8 صور 4*6 وصوره كارت طولى لك ... وع طول بقى , كلكوا هاتتصوروا كدا بسرعه .
هاتروحوا ع قاعه وهايتم فيها , شرح التقديم , وطريقه ملء الملف
بعد ماتتصور مش هاتاخد الصور ع طول هاتبقى تاخدها فى الآخر , هايودوكوا ع قاعه كدا زى الأوبرا , هاتدخل تلاقى ظابط أو مش عارف ناسى الصراحه رتبته , المهم انه بيشرح لكل الى بيدخلوا بعض الحاجات زى الشروط العامه وبعض التعليمات لملء الملف وحاجات من دى .
وغالباً انت هاتدخل تلاقيه بيشرح , فهيقلك انت والمجموعه الى فيها استنونى ورا لحد مايخلص شرح للمجموعه الى قدامه , وبعدين هايشرحلكوا من الأول , وهوا معظم الكلام الى بيتكلم فيه , موجود فى السطوانه الى معاك والى انت استلمتها مع الملف , وهايقلكوا محدش يسألنى ع حاجه , فى حد قاعد آخر القاعه ابقى اسأله فى الآخر ... ( وطبعاً كتير بيروحوا وبردو كلها إجابات مختصره ومافيش حاجه تفيييد ) .
المهم انت ماتقلقش عادى هوا كلام معظمه عااام , وماتقلقش احنا ان شاء الله مع بعض فى أى حاجه عاوز تعرفها هانقلها هنا , ونجاوب بعض ان شاء الله , وان شاء الله ساعت ملء الملف والى معظم الشباب بيكون تايه فيه وعنده أسئله كتيير وعاوز يعرف كل حاجه يعملها ازاى فيه , ودا بالرغم من انهم بيحطوا فيديو عن طريقه ملء الملف ,, لكن مبيكونش كافى فى معظم الأحيان خصوصاً للطلاب الى ماشيين فى الطريق دا لوحدهم .
خلاااص آخر حاجه هاتخرج بقى من القاعه دى , وهاتنستنى فى اللجنه بتاعتك برا علشان تستلم الصور بتاعتك
خلاص بعد ماتخرج من القاعه دى - طبعاً كل دا وانت خلاص معاك وماسك فى ايدك الملف بتاعك والحاجات الى معاه والى بتكون فى دوسيه كدا -
- هاتخرج بقى من القاعه دى على آخر حاجه لك فى اليوم دا , وهى انك هاتروح ع اللجنه بتاعتك ( ودى الى وانت جيت تتصور كان حد اداك ورقه وقالك اكتب فيها "لجنه كذا فصل كذا" ) , أهى هى دى بقى لجنتك سواء لجنه رقم 1 , أو لجنه رقم 2 , أو 3 , وهكذا ممكن تقريباً هما 8 لجان أو أزيد , المهم يعنى تعرف لجنتك وتروح تقعد فيها , وتستنى بقى الصور بتاعتك والى هيكون واقف ع لجنتك دى واحد بيستلم الصور الى بتجيله من جوا الكليه والى بتخلص أول بأول ,وبتكون ع شكل فصول زى ماقلتلك , انت لجنه كذا فصل كذا والجنه الى بتقعد فيها , الفصل دا الى هاتيجى صورك فى مجموعته , وهوا بينده الى واقف ويقول دى صور فصل كذا , وبيرفع الصور كدا ليكوا والى بيشوف صورته بياخدها .

يبقى ألويعنى ماتحملش هم قوى مش هاتدور ولا بتاع , كل حاجه فى الكليه متنظمه وكله ورا بعضه , هاتكتشف أصلاً فى آخر اليوم ان كل اللف الى لفيته فى اليوم دا كان حاولين نفسك والأماكن كلها جنب بعضها بس علشان هما بيقولولك روح هنا وتعالا روح هناك , وادخل هنا وتطلع من هناك , هاتحس انك تايه ,, بس زى مابقولك كدا كل الأمر بسيط وماتقلقش , وبعدين كل دا وانت هاتكون فى المجموعه الى معاك يعنى الشباب الى حواليك والى رايحين يعملوا نفس الى انت هاتعمله يعنى انت مش لوحدك
وعموماً أظن مافيش أكتر من دا هاتعمله جوا .

طيب كل دا بقى هاياخد وقت أد إييه ؟
يعنى فى المتوسط ساعتين زمن وان شاء الله هاتخلص كل اليوم دا , لكن بقى فى ظروف فى كل حاجه , سواء بقى لو كانت الدنيا زحمه قوى فى اليوم دا , أو الكهربا بتقطع - وماتستغربش قوى يعنى أيوا بتقطع جوا الكليه الحربيه - ودا لما يكون فيه ضغط كبير ع الكهربا , كانت أيام التدريب ع عرض تخرج ادفعه جديده من الكليه الحربيه , ودى الى حصلت فى أيام تقديمى وخلتنى كنت داخل الكليه الساعه 9 -الصبح طبعاً- خارج منها الساعه 4.5 العصر هههههههههههههههههه يعنى حوالى 7 ساعات بلف جوا الكليه , وكان معايا بقى واحد صاحبى قاعد برا , قلت زمانه طفش والجو حر وكدا , وتبقى عطشان بقى , وعاوز تشرب تيجى تشرب من الحنفيه الى فى الكليه الى عند السور دى تلاقى المايه سخنه مولعه , دا أصلاً لو مكانشى تقديمك فى رمضان بقى .
بس اسمع , طالما هوا يوم فى طريق تحقيقك لهدف وأمنيه عندك بجد , والله هاتاخد الأمور سهله وبسيطه وهاتعمل الى عليك وكله هايعدى
وبكدا يبقى أول يوم ليك فى الكليه الحربيه وأول خطوه ليك فى التقديم للكليات والمعاهد العسكريه (( سحب ملف التقديم )) انتهت .
تخرج بقى من الكليه وقت ماتخرج , عاوز تلفلك شيويه - مش هتلاقى لف جنب الكليه - اركب بقى روح فى أى منطقه تانيه , بس اعتقد بعد اليوم دا دا , انت هاتطلع من الكليه عاوز تروح ع طول , لو لقيت بقى العربيات الى قلتلك انها بتبقى مخصوصه بتقف قدام الكليات تروحك لمحافظتك ع طول أو لمدينتك تركبها , مالقيتهاش - ودا الغالب فى يوم التقديم - يبقى روح بقى مواصلات , يعنى أمر بسيط .



تم بحمد الله

[MAXx__warrioR]

كنت ناوى اقدم والله فى كليه الطب العسكرى بس غيرت رأى بعد ما عرفت انهم هيطلبوا منى نفس الاختبارات البدنيه للبحريه والجويه !! كليه علوم وخلاص بقى :)

[CHI-VA]

Ok >>>

يثبــــت يوميــــــن ,

[!_ToGoO_MorY_!]

المشاركة الأصلية كتبت بواسطة MAXx__warrioR عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

كنت ناوى اقدم والله فى كليه الطب العسكرى بس غيرت رأى بعد ما عرفت انهم هيطلبوا منى نفس الاختبارات البدنيه للبحريه والجويه !! كليه علوم وخلاص بقى :)

ايوه بس كل كليه وبيهتموا فيها بحاجات معينه
على العموم انا هقدم وربنا يسهل

المشاركة الأصلية كتبت بواسطة ZeroTera عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

Ok >>>

يثبــــت يوميــــــن ,

ماشى يا برنجى ^^

[MAXx__warrioR]

ايوه بس كل كليه وبيهتموا فيها بحاجات معينه
على العموم انا هقدم وربنا يسهل

ربنا معاك اولا
كل الحكايه انى مش عايز اتصدم مرتين اترفض حكومى واترفض عسكرى فبلاش منها وخلاص
انا دورت فى كليه العلوم واتلاقيت فيها اقسام حلوه زى تخصص كمياء اشتغل فى معمل تكرير البترول ويبقى اسمى مهندس بترول وحجات تانيه كتير

[CError]

الموضوع يستحق التقدير طبعا بس ياريت بعد يومين التثبيت ينقل للتراحيب :)

[╣VendeTTa╠]

تسلم بجد

[MịηaTσ]

عدينا المرحلة دى خلاص

[CHI-VA]

كفايه عليه كـــده 3 ايام أهــو ^^



وينقـــل للترحيــــب بــرده علشان الكابتن محمد ميزعلش ^^

[PuppEt]

شكككككرن ولاهى افدنى كتييير انا اخلص تالته بس و هئدم ان شاء الله

[!_ToGoO_MorY_!]

تسلموا على الردود يا شباب
بس اصلا الموضوع مش بقاله يومين يبنى انت وهو ^^

[HandSome]

يــرجـع بعــيدا تــانى

مــاله بالتــرحيب ده

[CError]

مشي كلمتك عالينا ياعم توني مش هافضل افهم فيك انا عملت الي عاليا :)

وينقل للتراحيب ^^

[Emely]

^_^ يا عم عادى :D

[!_ToGoO_MorY_!]

افضلوا العبوا بالموضوع بقى :P

بس عادى عادى عيال وبتلعب :P